Գէորգ Հաճեանի Եւ Տաթեւիկ Արթինեանի Աննախընթաց Համերգը Սան Փաուլոյի Մէջ


ԵՐՈՒԱՆԴ ԹԱՄՃԵԱՆ

ՍԱՆ ՓԱՈՒԼՕ, «Ազդակ».- Հովանաւորութեամբ Հայաստանեայց Առաքելական եկեղեցւոյ պրազիլահայ թեմին եւ օժանդակութեամբ Սան Փաուլոյի «Համազգային»ին, Հինգշաբթի, 15 Դեկտեմբերին, Սան Փաուլոյի Ս. Գէորգ եկեղեցւոյ մէջ տեղի ունեցաւ իր տեսակին մէջ աննախընթաց հոգեզմայլ համերգ մը՝ նուիրուած անմահն Կոմիտասի ծննդեան 140ամեակին: Այս առիթով Հայաստանէն յատուկ կերպով հրաւիրուած էր համբաւաւոր թենոր Գէորգ Իգնատիոս Հաճեան, իսկ Լիբանանէն՝ նոյնքան հանրածանօթ դաշնակահար Տաթեւիկ Արթինեան:

Խուռներամ բազմութիւն մը ներկայ կը գտնուէր համերգին: Բացման խօսքով հանդէս եկաւ Եզնիկ Ա. քհնյ. Կիւզելեանը՝ ներկայացնելով Գ. Հաճեանի եւ Տ. Արթինեանի համառօտ կենսագրականներն ու գործունէութիւնը:

Յայտագիրի Ա. բաժինով, արուեստագէտները կատարեցին Զարեհ արք. Ազնաւուրեանի «Յարեաւ Քրիստոս»ը, Կոմիտասի «Հայր Մեր-1915»ը, Ֆ. Շուպերթի «Աւէ Մարիա»ն, Սեզար Ֆրանքի «Փանիս Անժելիքուս»ը, Դանիէլ Երաժիշտի «Ուր ես Մայր իմ»ը, Կոմիտասէն՝ «Մարալի եւ Շուշիկի», «Էս Առուն» եւ «Շողեր ջան», Սայաթ Նովայէն՝ «Քանի վուր ջան իմ» երգերը, իսկ Էտկար Յովհաննիսեանի «Երեւան Էրեբունի»ն, որուն երգեցողութեան մասնակցեցան բոլոր ներկաները:

Յայտագիրի Բ. բաժինով, Գէորգ Հաճեան եւ Տաթեւիկ Արթինեան ներկաները յուզեցին կոմիտասեան շարք մը ծանօթ երգերով, ինչպէս՝ «Ձայն տուր ով ծովակ», «Լէ լէ Էաման», «Չինար ես», «Բամբ որոտան», իսկ համերգը իր գագաթնակէտին հասաւ Դանիէլ Երաժիշտի «Կիլիկիա» եւ Կոմիտաս վարդապետի «Հայաստան» ազգային-ժողովրդական երգերով, ներկաներու միահամուռ մասնակցութեամբ: Յայտագիրի վերջաւորութեան, ընդառաջ երթալով որոտընդոստ ու անվերջանալի «կեցցէ»ներու եւ ծափահարութիւններու՝ արուեստագէտները ներկայացուցին այլ երգեր, իսկ ելոյթը վերջ գտաւ «Հիմի էլ լռենք» երգով եւ Էջմիածնի «Հայրապետական մաղթերգ»ով: Գէորգ Հաճեան եւ Տաթեւիկ Արթինեան իրենց սրտի խօսքը ուղղեցին ներկաներուն եւ ի մասնաւորի սոյն արտակարգ երեկոյի կազմակերպիչ յանձնախումբին ու բոլոր անոնց, որոնց նիւթական թէ բարոյական աջակցութեամբ կարելի եղաւ իրականացնել այս ձեռնարկը: Ապա տեղի ունեցաւ պատշաճ ընդունելութիւն առաջնորդարանի դահլիճին մէջ, ուր բոլոր ներկաները առիթը ունեցան անձամբ շնորհաւորելու այս երկու տաղանդաւոր արուեստագէտները:

Սոյն համերգը բացառիկ առիթ մը հանդիսացաւ պրազիլահայ գաղութին, որ տարիներէ ի վեր կարիքն ունէր յագեցնելու իր պապակը այսպիսի ազգաշունչ նախաձեռնութեամբ մը: Ներկայ անձնաւորութիւններու շարքին, թեմի գործադիր վարչութեան թէ ներկայացուցչական մարմինի վարչականներէն եւ գաղութի բոլոր միութիւններու, կազմակերպութիւններու եւ քոյր յարանուանութեանց ղեկավարներէ եւ ներկայացուցիչներէ բացի ներկայ էր Հայաստանի Հանրապետութեան Սան Փաուլոյի պատուոյ հիւպատոս Հիլտա Տիրուհի Պուրմայեանը, Յոյն ուղղափառ համայնքի առաջնորդն ու այլ հրաւիրեալներ:

Իսկ Կիրակի, 18 Դեկտեմբերին, Գէորգ Հաճեան եւ Տաթեւիկ Արթինեան իրենց յատուկ մասնակցութիւնը բերին Ս. Գէորգ եկեղեցւոյ մէջ մատուցուած Ս. պատարագի երգեցողութեան, դարձեալ խուռներամ բազմութեան մը ներկայութեան:

(Ամփոփուած)

Leave a Reply