Նիւ Եորքի Մէջ Անուշաւան Եպս. Դանիէլեանի Քահանայական Ձեռնադրութեան 40ամեակի Նշում

ՆԻՒ ԵՈՐՔ.- Կիրակի, Մարտ 25ին, Նիւ Եորքի մէջ նշուեցաւ Արեւելեան թեմի առաջնորդական փոխանորդ Անուշաւան եպս. Դանիէլեանի քահանայական ձեռնադրութեան 40ամեակը:

1984ին Միացեալ Նահանգներ ժամանելէ ի վեր, Անուշաւան սրբազանը հոգեւորականի, մտաւորականի եւ անձնական իր ձիրքերը ի սպաս դրած է Արեւելեան թեմին՝ յոգնութիւն չգիտցող եռանդով ու պատրաստակամութեամբ ծառայելով ամէնուրեք: Հովուական, յարաբերական, կազմակերպչական ու գիտական իր գործունէութիւնը միշտ բարձր գնահատուած է հաւատացեալներուն կողմէ, որոնք փութացած էին խուռներամ ներկայ գտնուելու մեծարանքի երկու պահերուն:

Առաջինը՝ Կիրակի առաւօտեան, Ս. պատարագի յիշարժան արարողութիւն էր Տակլըսթընի (Նիւ Եորք) եկեղեցւոյ մէջ, որուն հոգեւոր հովիւը եղած էր Անուշաւան սրբազան՝ ամբողջ 14 տարի: Ան մատուցեց Ս. պատարագը՝ թեմիս առաջնորդ Օշական արք. Չօլոյեանի նախագահութեամբ:

Պատարագի ընթացքին, Մեծի Տանն Կիլիկիոյ կաթողիկոս Արամ Ա.ի յատուկ կոնդակը թափօրով խորան բերուեցաւ, եկեղեցւոյ այժմու հովիւ Նարեկ քհնյ. Թրթռեանի կողմէ, մինչ դպրաց դասը կ՛երգէր «Ուրախ լեր»ը:

Վեհափառին կոնդակը հանդիսաւորապէս կարդաց առաջնորդ սրբազանը:

Կէսօրէն ետք տեղի ունեցաւ յոբելինական ճաշկերոյթ մը՝ 360 հանդիսականներով, «Terrace on the Park» ճաշարանի վերնայարկը (Նիւ Եորք):

Հանդիսավարութիւնը կատարեց տոքթ. Արամ Գազազեան: Յայտագիրին մէջ յատկանշական էր ներկայութիւնն ու մասնակցութիւնը երիտասարդութեան, որ միշտ եղած է Անուշաւան սրբազանի յատուկ գուրգուրանքի առարկան: Այսպէս, խօսք առին երեք երիտասարդներ՝ յոբելեար հոգեւորականի ձեռակերտը եղող կամ անմիջական հովանաւորութիւնը վայելած երեք կառոյցներէ:

Գեղեցիկ անակնկալ մըն էր 40ամեակի կարկանդակը կտրելու պահուն՝ յայտնութիւնը երկրորդ կարկանդակի մը, որով կը նշուէր առաջնորդ Օշական արք. Չօլոյեանի քահանայական ձեռնադրութեան 45ամեակը:

Քսան վայրկեաննոց տեսաերիզ մը, Անուշաւան եպս. Դանիէլեանի անցած ուղին վերակենդանացուց ներկաներու աչքին՝ հիներուն, որոնք վերյիշեցին անցած օրերու պատկերներ, եւ նորերուն, որոնք ծանօթացան արժանաւոր եկեղեցականին կեանքի ու վաստակի գլխաւոր յանգրուաններուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top