«ՓԱՆՈՐԱՄԱ»Ի ՀԱՐՑԱԶՐՈՅՑԸ ՎԱՐԴԱՆ ՕՍԿԱՆԵԱՆԻ ՓԱՍՏԱԲԱՆԻՆ ՀԵՏ

«Եթէ Կարիք Լինի, Հանթսմանների Ընտանիքը Հանդէս Կը Գայ Յայտարարութեամբ»

Հայաստանի արտաքին գործոց նախարար, այժմ ԱԺ պատգամաւոր Վարդան Օսկանեան եւ անոր փաստաբան Տիգրան Աթանէսեան դիմած են Ազգային անվտանգութեան ծառայութիւն (ԱԱԾ)՝ ստանալու քրէական գործ յարուցելու մասին որոշումը:

«Եթէ ստանանք, բողոքարկելու ենք, որպէսզի այդ որոշումը վերացուի»,- «Փանորամա»յի թղ-թակցին հետ զրոյցի ընթացքին տեղեկացուցած է Տիգրան Աթանէսեան՝ նկատելով, որ եթէ ԱԱԾն այդ որոշումը մերժէ տրամադրել, ապա օրէնքը խախտած կ՛ըլլայ:

Փաստաբանը յայտնեց, որ Օսկանեան արդէն քանի մը անգամ ցուցմունք տուած է ԱԱԾին եւ պատմած է ամէն ինչ ու պատասխանած է բոլոր հարցումներուն, սակայն նախօրէին հրաժարած է այլեւս ցուցմունքներ տալէ: Աթանէսեան յստակացուց, որ ցուցմունք չտալու որոշումը կապուած չէ գործի հանգամանքները թաքցնելու կամ ինչ որ բան չըսելու հետ:

«Ցուցմունք տալուց հրաժարուելու որոշումը Օսկանեանինն է: Երբ պարզ է, որ քննչական մարմինը կասկածում է անձին ինչ-որ յանցանք կատարելու մէջ, ապա այդ պահից անկախ մեր ներպետական օրէնսդրութեան սահմանումներից, համաձայն Մարդու իրաւունքների եւրոպական դատարանի նախադէպային պրակտիկայի, անձը կարող է օգտուել կ՛ասկածեալի բոլոր իրաւունքներից, նոյնիսկ եթէ նրան հրաւիրում են որպէս վկայի, սա իրաւական հիմնաւորում է», բացատրեց պարոն Աթանէսեան:

Անոր խօսքով, երբ ԱԱԾն «կանխակալ վերաբերմունք» կը դրսեւորէ, ապա ելքը ցուցմունք տալէ հրաժարիլն էր:

«Նա որոշեց օգտուել իր իրաւունքից եւ այլեւս չշփուել մի մարմնի հետ, որը կանխակալ վերաբերմունք ունի իր նկատմամբ եւ իրականացնում է քաղաքական հետապնդում՝ ստեղծելով յօրինուած պատմութիւններ, փորձում է անձին մեղադրել առանձնապէս ծանր յանցագործութիւնների մէջ: Նման կարգի վարքագիծ ունեցող քննչական մարմնի հետ բնականաբար, ոչ մի պարկեշտ մարդ, առաւել եւս տուեալ գործի շրջանակներում, չի ցանկանայ շփուել եւ առհասարակ համագործակցել», աւելցուց Տիգրան Աթանէսեան: Փաստաբանի գնահատումով, իրենք ԱԱԾի կողմէ ձգտում չեն տեսներ՝ պարզելու իրավիճակը: Աւելին, ԱԱԾ պաշտօնական հաղորագրութենէն ետք, Աթանէսեանի խօսքով, իրենց համար պարզ դարձած է, որ խօսքը ոչ թէ դէպքը պարզելու, այլ՝ «սարքելու մասին եւ շինծու մեղադրանք առաջադրելու մասին» է: Ըստ փաստաբանին, ասիկա հիմնաւոր պատճառ էր, որ Օսկանեան հրաժարէր ցուցմունք տալէ:

«Ներպետական օրէնսդրութեան առումով նա դիտւում է որպէս վկայ, բայց Եւրոպական դատարանի նախադէպային իրաւունքով, երբ անձը ունի ողջամիտ հիմքեր, որ իրեն մեղադրելու են, այդ դէպքում նա կարող է օգտուել իր լռութեան իրաւունքից», նկատեց փաստաբանը:

ՅԱՍՄԻԿ ՀԱՄԲԱՐՁՈՒՄԵԱՆ.- Այսինքն, դուք չէ՞ք բացառում, որ այնուամենայնիւ, Օսկանեանին մեղադրանք կը ներկայացուի:

ՏԻԳՐԱՆ ԱԹԱՆԷՍԵԱՆ.- Հարցը ճիշդ հասցէատէր չունի, ես ասում եմ այն, ինչ որ կայ. թէ ԱԱԾ անքննելի ջրհորդաններում ինչեր են մոգոնւում, ինչեր են որոշւում, ես բացարձակ չեմ կարող պատասխանել:

ՅԱՍՄԻԿ ՀԱՄԲԱՐՁՈՒՄԵԱՆ.- Պարոն Աթանէսեան, դուք եւ պարոն Օսկանեանը պնդում էք, որ քաղաքական հետապնդում է իրականացւում, դա արդեօք չի՞ խանգարում իրաւական գործընթացներին:

ՏԻԳՐԱՆ ԱԹԱՆԷՍԵԱՆ.- Ես կարող եմ յայտարարել, որ մեր երկրում առհասարակ, իրաւական գործընթացներ շատ քիչ են ընթանում: Սովորական գործերով տեղի է ունենում դատախազութեան պատուէրների կատարում, եւ անուանել այս պրոցեսը (գործընթացը-Խմբ.) իրաւական գործընթաց, նոյնն է, թէ սեւն ասես սպիտակ է:

ՅԱՍՄԻԿ ՀԱՄԲԱՐՁՈՒՄԵԱՆ.- Այսինքն, դուք պնդում էք, որ սա քաղաքական հետապնդո՞ւմ է:

ՏԻԳՐԱՆ ԱԹԱՆԷՍԵԱՆ.- Գիտէք, ես դա չեմ կարող պնդել, իմ ներկայութեամբ որեւէ մէկը չի ասել, թէ պարոն Օսկանեանին պէտք է անպայման դատել: Դա պարոն Օսկանեանի գնահատականն է, որ սա քաղաքական հետապնդում է: Ես, որպէս փաստաբան, չեմ կարող նման յայտարարութիւն անել: Ես որպէս անձ, իհարկէ, իմ կարծիքներն ունեմ, բայց որպէս փաստաբան կարող եմ ասել հետեւեալը՝ սա ամբողջութեամբ, անհիմն, սխալ քրէական գործ է եւ քրէական հետապնդում:

ՅԱՍՄԻԿ ՀԱՄԲԱՐՁՈՒՄԵԱՆ.- Պարոն Աթանէսեան, ԱԱԾ հաղորդագրութեան մէջ խօսւում է հարկային պարտաւորութիւններից խուսափելու մասին, դուք ծանօ՞թ էք խօսքն ինչի մասին է:

ՏԻԳՐԱՆ ԱԹԱՆԷՍԵԱՆ.- Ես շատ լաւ ծանօթ եմ դրան, պարզապէս, պարոն Օսկանեանին, իմ տեղեկութիւնների շրջանակներում, նման մեղադրանք առաջադրելը, ազգային իրաւաբանական մտքի ողբերգութիւնն է եւ կատարեալ սնանկութիւնը:

ՅԱՍՄԻԿ ՀԱՄԲԱՐՁՈՒՄԵԱՆ.- Այսի՞նքն:

ՏԻԳՐԱՆ ԱԹԱՆԷՍԵԱՆ.- Այսինքն, դա մի այլ կարգի սուտ է եւ որեւէ կապ չունի օրէնքի հետ, որեւէ կապ չունի հարկային օրէնսդրութեան հետ: Պարոն Օսկանեանը շատ հեռու է հարկային խախտումներից, դա բացարձակ իր հետ կապ չունի: Եւ եթէ հարկային խախտում այնտեղ կայ, ապա դա վերաբերում է լրիւ այլ անձանց:

ՅԱՍՄԻԿ ՀԱՄԲԱՐՁՈՒՄԵԱՆ.- Դուք գիտէ՞ք այդ անձանց:

ՏԻԳՐԱՆ ԱԹԱՆԷՍԵԱՆ.- Ի հարկէ: Իրենք էլ չունեն այդ հարկային խախտումները: Ուղղակի վերաբերում է այլ անձանց միջեւ փոխյարաբերութիւններին, որոնց հետ Օսկանեանը կապ չունի:

ՅԱՍՄԻԿ ՀԱՄԲԱՐՁՈՒՄԵԱՆ.- Կը մասնաւորեցնէ՞ք պարոն Աթանէսեան, ո՞ր անձանց, ի՞նչ շրջանակների, ինչքա՞ն գումարի մասին է խօսքը, որքանը չի վճարուել պետբիւջէ:

ՏԻԳՐԱՆ ԱԹԱՆԷՍԵԱՆ.- Չէ, չէ, իրաւունք չունեմ, գործը նախաքննութեան փուլում է, եւ գաղտնիքներ չեն հրապարակւում: Ես ձեզանից ոչինչ չեմ թաքցնում, եթէ նախաքննութիւնն աւարտուի, ձեզ մանրամասն ամէն ինչ կը ներկայացնեմ, եւ այնքան ծիծաղելի ու պարզ է այս պատմութիւնը: Եթէ խօսում ենք առհասարակ փողերի լուացման մասին, նախ եւ առաջ պէտք է լինեն կեղտոտ փողեր, իսկ դրանք չկան, պարզապէս չկան: Բոլոր գումարների ծագումնաբանութիւնը յս-տակ պարզ է եւ թափանցիկ:

ՅԱՍՄԻԿ ՀԱՄԲԱՐՁՈՒՄԵԱՆ.- Իսկ տեղեա՞կ էք նշուած շուրջ 2 միլիոն ԱՄՆ դոլարը որտեղ եւ ի՞նչ նպատակներով է ծախսուել, կա՞յ էդպիսի հաշուետուութիւն:

ՏԻԳՐԱՆ ԱԹԱՆԷՍԵԱՆ.- Ամէն ինչ արուել է բաց, թափանցիկ եւ մինչեւ վերջին ցենտը կարող են տեսնել: Շատ ծիծաղելի է, երբ խօսում են հարկերի մասին, անգամ իրենք խօսում են եւ չգիտեն՝ ով պէտք է այդ հարկերը վճարի, չեն կարդացել շահութահարկի մասին օրէնքը եւ չգիտեն, թէ ով պէտք է այդ հարկը վճարի: Ես անձամբ հարցրել եմ, թէ ձեր նկարագրած դէպքում ով պէտք է հարկը վճարեր եւ սխալ են ասում: Պարոն Օսկանեանը, որպէս ֆիզիկական անձ, շահութահարկ չի կարող վճարել: Դա վճարում են իրաւաբանական անձ առեւտրային կազմակերպութիւնները:

ՅԱՍՄԻԿ ՀԱՄԲԱՐՁՈՒՄԵԱՆ.- Այս պահին գործով մեղադրեալ կա՞յ:

ՏԻԳՐԱՆ ԱԹԱՆԷՍԵԱՆ.- Ես չունեմ այդպիսի տեղեկութիւն:

ՅԱՍՄԻԿ ՀԱՄԲԱՐՁՈՒՄԵԱՆ.- Ի՞նչ էք կանխատեսում, ի՞նչ ճակատագիր կ՛ունենայ այս գործը:

ՏԻԳՐԱՆ ԱԹԱՆԷՍԵԱՆ.- Կարող եմ մի բան ասել՝ այս երկրում կայ մէկ դատաւոր, մէկ դատախազ, մէկ քննիչ առհասարակ այս երկրում որոշում կայացնում է մէկ անձ, որը կայացնում է բոլոր մակարդակների որոշումները: Քանի որ տուեալ դէպքի համար դատական-դատախազական համակարգը յստակ վերահսկւում են եւ ենթարկւում են մէկ անձի, ապա ինչ էլ անունը դնեն՝ կը լինի դա փողերի լուացում, մանկահասակ աղջկայ բռնաբարութիւն, ահաբեկչութիւն եւ մեղադրանքը որեւէ կապ չունենայ իրականութեան հետ, հաւատացած եղէք, մեր դատաւորները իրենց երեխաներին մատաղ կանեն, բայց անպայման կը ստորագրեն այդ դատավճիռը: Արդարադատութիւն չունենք մեր երկրում:

ՅԱՍՄԻԿ ՀԱՄԲԱՐՁՈՒՄԵԱՆ.- Վերջին հարցազրոյցներից մէկում Օսկանեանը մօտաւորապէս յայտարարեց, որ թող հարկային մարմինները գան ստուգեն, եթէ ապացուցեն, որ կայ խախտում, կ՛ուղղենք մեր սխալը: Դուք տեղեա՞կ էք, եղե՞լ է նման ստուգում:

ՏԻԳՐԱՆ ԱԹԱՆԷՍԵԱՆ.- Ոչ, հարկային մարմինն առհասարակ որեւէ կերպ իմ աչքով չի ընկել այս պատմութեան մէջ: Եթէ սա քաղաքական պատուէր է, ապա դրա յետեւում կանգնած մարդիկ շատ յստակ հաշուարկ են արել: Եթէ պայմանական ընդունենք, որ պարոն Օսկանեանը մի իրավիճակում է, երբ հարկեր չեն վճարուել: Նա իրաւաբան չի, հաշուապահ չի, բնականաբար մարդուն սխալ խորհուրդ են տուել, որը շատ հեշտ է ուղղել՝ գործը վարչական վարոյթով կ՛աւարտուէր, պարտքը կը մարուէր: Բայց փողերի լուացում են որակում, որը աշխարհով մէկ մարդուն սեւացնելու միջոց է: Հանթսմանը մորմոն է, դէ պատկերացրէք՝ Օսկանեանը մորմոնների փողերը լուանում է Հայաստանում, ինչ տգեղ հաշուարկ է: Ես համոզուած եմ, որ այս հաշուարկը չի աշխատելու:

(Մեր դիտարկմանը թէ պարոն Օսկանեանն իր վերջին հարցազրոյցներում նպատակաուղղուած շրջանառութեան մէջ է դնում բարերար Հանթսմանի անունը, Աթանէսեանն ասաց, որ Օսկանեանն ամենեւին էլ միտումնաւոր «չի շահարկում Հանթսմանի անունը» ՅԱՍՄԻԿ ՀԱՄԲԱՐՁՈՒՄԵԱՆ.-:)

ՏԻԳՐԱՆ ԱԹԱՆԷՍԵԱՆ.-  Այդպիսի բան չկայ եւ չի կարող լինել: Պարոն Օսկանեանն ինչ արել է, ապա միմիայն արուել է Հանթսմանի համաձայնութեամբ, օժանդակութեամբ, կամեցողութեամբ: Այսինքն, ոչ մի շահարկում չկայ: Պարոն Հանթսմանի անունը շահարկում է Ազգային անվտանգութեան ծառայութիւնը: Ես համոզուած եմ, որ եթէ կարիքն էլ լինի, Հանթսմանների ընտանիքը հանդէս կը գայ համապատասխան յայտարարութեամբ: