ՀՄԸՄ-Ի ՆԱՒԱՍԱՐԴԵԱՆ ՄԱՐԶԱԽԱՂԵՐՈՒ ՍԵՄԻՆ Յաղթանակի Պարահանդէսը Վաղը՝ 1 Յուլիսին, Իսկ Եզրափակիչ Մրցումներն Ու Ձեռնարկները՝ 3-7 Յուլիսին

Այսօր կը գտնուինք Նաւասարդեան 37րդ մարզախաղերու սեմին: Ուրախ է ՀՄԸՄի ողջ ընտանիքը: Մեղուի փեթակի նման արդիւնաւէտ կը գործեն Նաւասարդեանի յանձնախումբն ու ենթայանձնախումբերը՝ կազմակերպական բծախնդիր աշխատանքներ տանելով մարզախաղերու եւ այդ առիթով կազմակերպուած ձեռնարկներու յաջողութեանց համար:

Նուաճումներու եւ յաղթանակներու նոր էջ մը եւս կը բացուի ՀՄԸՄի պատմութեան մէջ, Նաւասարդեան մարզախաղերու իրագործման ուրախ առիթով: Գովքը կը հիւսուի 37 տարիներ անընդմէջ իրականացուող երիտասարդական եւ բազմանդամ մարզական այն իւրայատուկ նախաձեռնութեան, որ ոչ միայն հազարաւոր երիտասարդներ մրցակցութեան կը հանէ, այլ նաեւ անոնց շուրջ կը համախմբէ շրջանի հայութիւնը:

Նաւասարդեան մարզախաղերուն առիթով կազմակերպուած կարեւորագոյն ձեռնարկներէն է՝ Յաղթանակի պարահանդէսը, որ այս տարի տեղի պիտի ունենայ Կիրակի, 1 Յուլիս 2012ի երեկոյեան ժամը 7ին, «Եունիվըրսըլ Հիլթըն» պանդոկի գլխաւոր սրահէն ներս՝ 555 Universal Hollywood Drive, Universal City, CA 91608: Նոյն օրը տէր եւ տիկ. Գագիկ եւ Մատինէ Գէորգեանները պաշտօնապէս պիտի ստանձնեն իրենց Պատուոյ նախագահութիւնը՝ զայն խորհրդանշող Եռագոյն երիզի ստանձնումով, ինչպէս նաեւ պիտի ներկայացուի «Տիպար ՀՄԸՄական-2012» տիտղոսին արժանացած ՀՄԸՄական Մարօ Քէշիշեանը:

Գալով Նաւասարդեանի գլխաւոր առանցքը հանդիսացող մարզական մրցումներուն՝ անոնք պիտի շարունակուին 30 Յունիսի եւ 1 Յուլիսի շաբաթավերջին եւ իրենց ճակատագրական աւարտին պիտի հասնին Շաբաթ, 7 Յուլիսի կէս գիշերին:

Երեքշաբթի, 3 Յուլիսէն սկսեալ, ծրագրուած յայտագիրներով պիտի շարունակուին պասքեթպոլի, ֆութպոլի եւ վոլիպոլի մրցումները: Թենիսի եւ փինկ-փոնկի մրցումները տեղի պիտի ունենան 3 Յուլիսին, իսկ ճատրակին՝ 7 Յուլիսին, «Պըրմինկհամ հայ սքուլ»էն ներս:

Ուրախութեամբ կը հաղորդենք, թէ Շաբաթ, 16 Յունիսին, «Պըրմինկհամ հայ սքուլ»ի լողաւազաններուն մէջ, իսկ Կիրակի, 17 Յունիսին՝ անոր շրջափակէն ներս, յաջողութեամբ պսակուեցան թեթեւ աթլեթի եւ լողի բոլոր դասակարգերու մրցումները:

Հետաքրքրական եզրափակիչ այս մրցումներուն առընթեր, նոյն վարժարանի շրջափակէն ներս տեղի պիտի ունենայ հինգօրեայ փառատօնը, որուն պիտի մասնակցին շրջանի սիրուած արուեստագէտները: Պիտի վաճառուին համադամ ճաշեր: Փոքրիկները պիտի ունենան իրենց արուեստի անկիւնը:

Իբրեւ նորութիւն՝ այս տարի տեղի պիտի ունենայ դասական ինքնաշարժներու ցուցադրութիւն, Հինգշաբթի, 5 Յուլիսի երեկոյեան ժամը 5-11, «Պըրմինկհամ հայ սքուլ»ի շրջափակէն ներս:

Նաւասարդեան մարզախաղերու փակման հանդիսութիւնը տեղի պիտի ունենայ Շաբաթ, 7 Յուլիսի երեկոյեան ժամը 6:30ին. ընթացքին պիտի տողանցէ ՀՄԸՄի ողջ ընտանիքը, ինչպէս նաեւ պիտի յանձնուի յաղթանակի բաժակները: Հանդիսութիւնը պիտի աւարտի հրավառութեամբ եւ գեղեցիկ անակնկալով մը: Այնուհետեւ Նաւասարդեան խրախճանքը պիտի շարունակուի փառատօնի շրջափակէն ներս:

Ստորեւ՝ Հինգօրեայ փառատօնի գեղարուեստական յայտագիրին մասնակցող երգիչներու ցուցակը.

Երեքշաբթի, 3 Յուլիս 2012

Տեղի պիտի ունենայ հրավառութիւն.

* Գառնիկ Սարգիսեան

* Սագօ

* Հրաչ Պողարեան

* Սեդրակ Ովիկեան

Չորեքշաբթի, 4 Յուլիս 2012

* Յարութ Յակոբեան

* Սահակ Սիսլեան

* Ժամկոչեան Ճազ Թրիօ

* Մանվէլ Ոսկերչեան

* «Շէյտ աֆ Թրու»չ

Հինգշաբթի, 5 Յուլիս 2012

Տեղի պիտի ունենայ դասական ինքնաշարժներու ցուցադրութիւն.

* Ատիս Հարմանտեան

* «ՎԻԶԱ»

* Արա Շահպազեան

* Շիրազ

* Սամվէլ Սահակեան

Ուրբաթ, 6 Յուլիս 2012

* Գառնիկ Սարգիսեան

* Յարութ Յակոբեան

* Արնօ

* Արթին Պետրոսեան

* Ար-Մին

Շաբաթ, 7 Յուլիս 2012

* Յարութ Փամպուքճեան

* Անթուան Պէզճեան

* Արման Պաղչէճեան

* Սահակ Սիսլեան

* Արշամ

* Հայրօ Սարապեան

Մեր ակնկալութիւնն է, որ շրջանի հայութիւնը ամբողջական ներկայութիւն ըլլայ Նաւասարդեան մրցումներուն եւ ձեռնարկներուն, որպէսզի քաջալերէ ՀՄԸՄական մարզիկ-մարզկուհիները, որոնք յաջող ապագայ կը խոստանան:

Նաւասարդեան մարզախաղերուն եւ այդ առիթով կազմակերպուած ձեռնարկներուն մասին, նաեւ այլ տեղեկութիւններ ստանալու համար, կարելի է այցելել Նաւասարդեան մարզախաղերուն առիթով ստեղծուած www.navasartiangames.com կայքը, կամ հեռաձայնել Շրջանային վարչութեան գրասենեակ՝ (323) 344- 4300 թիւին: