Կլենտէյլի Մէջ «Հարսնաքար»ի Ոճիրին Դէմ Բողոքի Ցոյց

ԿԱՐԷՆ ԵՂԲԱՅՐԵԱՆ

Լուսանկարները՝ Յարութ Պրոնոզեան

Լոս Անճելըսի մօտ հայկական հիւպատոսարանին առջեւ, Ուրբաթ, Յուլիս 13ին, առաւօտեան ժամը 11ի շուրջ, խումբ մը հայորդիներ հաւաքուած էին՝ արտայայտելու համար

իրենց բողոքը «Հարսնաքար» ճաշարանային համալիրին մէջ տոքթ. Վահէ Աւետեանի սպանութեան առթիւ, եւ այս հարցին առնչութեամբ Հայաստանի Հանրապետութեան կառավարութեան ուղղուած իրենց պահանջները փոխանցելու համար հիւպատոսին:

Ցուցարարներուն մէջ էր Աւետեանի զարմիկը, որ սրտաշարժ կոչ մը յղեց Հայաստանի իշխանաւորներուն՝ պահանջելով, որ յանցագործները ստանան իրենց արժանի պատիժը:

Շուրջ մէկ ժամ տեւած ցոյցը նկարելու եկած էր «Կլենտէյլ Նիուզ Փրէս» թերթի լուսանկարիչը: Ցոյցը կը հսկէին Կլենտէյլի ոստիկանական բաժանմունքի աշխատակիցներ:

Հիւպատոսարանի պատասխանատուները համաձայն գտնուեցան ընդունելու ցուցարարներէն մէկ ներկայացուցիչ, որ յանձնէ խումբին հինգ պահանջները պարունակող նամակ մը:

Ցուցարարներու պահանջները հետեւեալներն էին.

ա.- Հայաստանի Ազգային ժողովի արտահերթ նիստի գումարում՝ քննելու համար «Հարսնաքար»ի ոճիրը:

բ.- Հայաստանի գլխաւոր դատախազութեան կողմէ Ռուբէն Հայրապետեանի մեղադրումը՝ իբրեւ Վահէ Աւետեանի սպանութեան գործի մեղասկից:

գ.- Հայրապետեանի հրաժարականը Ազգային ժողովէն (պատգամաւորը յայտարարած է հրաժարելու մասին իր մտադրութիւնը, սակայն տակաւին գործնականապէս չէ հրաժարած):

դ.- Հայրապետեանի յանցանքն ու Աւետեանի սպանութիւնը քննող անաչառ յանձնաժողովի մը ստեղծումը:

ե.- Հայրապետեանի հրաժարումը Հայաստանի Ֆութպոլի համադաշնութեան նախագահի պաշտօնէն:

Ցուցարարները ծրագրած են դարձեալ հաւաքուիլ Կիրակի օր, կէսօրէն ետք ժամը 1ին, նոյն վայրը, ինչպէս եւ մտադիր են յատուկ ոգեկոչական ձեռնարկով մը նշել Աւետեանի սպանութեան քառասունքը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

One Comment;

  1. Pingback: Կլենտէյլի Մէջ «Հարսնաքար»ի Ոճիրին Դէմ Բողոքի Ցոյց » ՆԵՄԵՑ ՌՈՒԲՈ

*

Top