26 Գիտական Խումբեր Դրամաշնորհ Պիտի Ստանան Հայկական Ազգային Գիտակրթական Հիմնադրամէն


ԵՐԵՒԱՆ, «Նիուզ».– Հայաստանի մէջ աշխատող 26 գիտական խումբեր 2013ին պիտի ստանան Հայկական ազգային գիտակրթական հիմնադրամի (ՀԱԳԿՀ, Armenian National Science and Education Fund–ANSEF, http://www.ansef.org) դրամաշնորհները՝ իւրաքանչիւրը 5000ական ամերիկեան տոլար: Ներկայացուած 184 դիմումներէն յաղթողները ընտրուած են ՀԱԳԿՀ յանձնաժողովին կողմէ՝ 40 անկախ գրախօսողներու կարծիքներու հիման վրայ: Յաղթողներուն մէջ են 15 խումբեր՝ Հայաստանի Գիտութիւններու ազգային ակադեմիայի (ԳԱԱ) հիմնարկներէն, 7՝ Երեւանի պետական համալսարանէն, 2՝ Հայկական պետական ճարտարագիտական համալսարանէն եւ մէկական՝ Հայկական պետական բժշկական համալսարանէն եւ Ալիխանեանի անուան բնագիտութեան հիմնարկէն: Ըստ հիմնարկներու թիւին, ամէնէն աւելի դրամաշնորհներ ստացած են Հայաստանի ԳԱԱ Բնագիտական հետազօտութիւններու հիմնարկի,  ՀՀ ԳԱԱ Բիւրականի աստղադիտարանի (3ական) եւ ՀՀ ԳԱԱ Մոլեքուլային կենսաբանութեան հիմնարկի (2) գիտական խումբերը: Ճշգրիտ գիտութիւններու (հիմնականօրէն բնագիտական եւ աստղաբնագիտական) ներկայացուցիչները արժանացած են 12 դրամաշնորհի, բնական գիտութիւնները՝ 13 եւ հասարակական գիտութիւնները՝ 1 դրամաշնորհի:
Դրամաշնորհները կ՛օգտագործուին աշխատավարձերու, սարքաւորման ձեռքբերման, գործուղումներու եւ գիտական գործունէութիւնը ապահովող այլ ծախսերու համար: ՀԱԳԿՀ դրամաշնորհներուն պատճառով զգալիօրէն աշխուժացած է գիտական խումբերու գործունէութիւնը. կարելի է արձանագրել բազմաթիւ նոր արդիւնքներ, տպագրուած են հարիւրաւոր նոր գիտական յօդուածներ, հաստատուած են նոր համագործակցութիւններ:

Leave a Reply