Հայ Դասականները՝ Համաշխարհային Էլեկտրոնային Առաջատար Գրախանութներում

ՆԱՆԷ ԱՒԱԳԵԱՆ

Հայ դասական ու ժամանակակից գրողների էլեկտրոնային գրքերը մայրենի լեզուով այսուհետ կարելի է գնել համաշխարհային ամենախոշոր եւ առաջատար առցանց գրախանութներից՝ Apple ընկերութեան «iTunes» խանութի «iBooks» բաժնից եւ Google Play-ից:
Armenian iBOOKS նախաձեռնութեան շնորհիւ, հայերէն էլեկտրոնային գրքերն այլեւս հասանելի են աշխարհասփիւռ հայ ընթերցողին iPhone հեռախօսների, iPad դիւրակիր համակարգիչների, eBook Reader-ների միջոցով:
«Բարձր տեխնոլոգիաների ներկայ ժամանակաշրջանում առաւել քան անհրաժեշտ է ժամանակակից միջոցներով հայկական գրական ժառանգութիւնը՝ մեր դասականներին ու ժամանակակից ստեղծագործողներին հասանելի դարձնել յատկապէս Սփիւռքում», նախաձեռնութեան նպատակն են ներկայացնում Armenian iBOOKS-ի հիմնադիրները՝ Երեւանի Պետական Համալսարանի երիտասարդ դասախօսներ Ռուբէն Միրաքեանն ու Մարատ Եաւրումեանը:
«Գրքերը միշտ կենսական եւ բացառիկ նշանակութիւն են ունեցել հայ մշակոյթում: Այսօր, ողջ աշխարհի ընթերցողների համար գրեթէ անսահման հնարաւորութիւնների շրջանում, էլեկտրոնային գրքերն առաւել մեծ պահանջարկ ու ճանաչում են ձեռք բերում, եւ դրանց հիմնական սպառման վայրը հանդիսանում են էլեկտրոնային գրախանութները: Մինչդեռ, հայ գրականութիւնն այդ տարածքում շատ քիչ է ներկայացուած», նշում է Ռուբէն Միրաքեանը:
Չնայած ստեղծման կարճ ժամանակահատուածին, այսօր Armenian iBOOKS-ն առաջարկում է երկու տասնեակից աւելի գիրք, որոնց շարքը համալրւում է ամէն շաբաթ: Էլեկտրոնային հայկական գրախանութում առանձին բաժին է յատկացուած մանուկներին ու պատանիներին, որտեղ առաջարկւում է Յովհաննէս Թումանեանի՝ հայկական ժողովրդական հեքիաթների մշակումները, հեղինակի երկու տասնեակից աւելի բալլադներն ու պօէմները, «Սասնայ ծռեր» հայկական ժողովրդական էպոսի Դաւթի ճիւղի՝ Յովհաննէս Թումանեանի մշակումը (1903թ.) Յակոբ Կոջոյեանի նկարազարդումներով: Խնկօ Ապոր ժողովածուն ներառում է հեղինակի առաւել յայտնի առակները:
Գրախանութն առաջարկում է նաեւ այլազգի դասականների հայերէն թարգմանուած գործերը նոր նկարազարդմամբ, որոնց թւում են Չարլզ Դիկենսի «Սուրբ Ծննդեան երգը», Ռոբին Հուդը:
Հայ դասականների գրադարակը ներկայացնում է նաեւ Յակոբ Պարոնեանի «Մեծապատիւ մուրացկաններ» գործը՝ Յովհաննէս Շաւարշի նկարազարդումներով, «Քաղաքավարութեան վնասները», Վահան Տէրեանի «Մթնշաղի անուրջներ» եւ «Գիշեր եւ յուշեր» բանաստեղծութիւնների ժողովածուները, Եղիշէ Չարենցի «Երկիր Նաիրի»ն:
Հոգեւոր գրականութեանը նուիրուած հատուածում ընթերցողը կարող է գտնել Նոր կտակարանը, Կոմիտասի Սուրբ Պատարագը՝ նոտաներով եւ ձայնային (audio) կատարմամբ, Յովհաննէս Յովհաննիսեանի մենագրութիւնը նուիրուած 20րդ դարասկզբին Հայ առաքելական եկեղեցում սկիզբ առած բարենորոգչական շարժման քննական վերլուծութեանը:
Armenian iBOOKS նախաձեռնութեան շրջանակներում իրականացւում են թուայնացման, խմբագրման, նկարազարդման աշխատանքներ: Նախագծի հեղինակները նշում են, որ բաց են համագործակցութեան համար, եւ իւրաքանչիւրը կարող է իր ներդրումն ունենալ համահայկական նշանակութեան այս ծրագրում:
«Աշխարհասփիւռ հայ գրողներին առաջարկում ենք իրենց ներկայութեամբ հարստացնել հայկական առաջին էլեկտրոնային ամենամեծ գրախանութը: Համագործակցութեան ենք հրաւիրում նաեւ երիտասարդ կամաւորների, ովքեր

կ՛օգնեն նկարազարդել գրքերը՝ այդպիսով իրենց ներդրումն ունենալով էլեկտրոնային գրքերի ստեղծման գործում: Ի դէպ, երիտասարդ արուեստագէտ Բեն Քարամեանի, Արա Ասլանեանի օգնութեամբ արդէն ունենք սիրուած հեղինակների պատկերազարդ գրքեր», նշում է Ռուբէն Միրաքեանը: Նրա համոզմամբ, հայ արուեստագէտների ու գրողների համագործակցութիւնը Armenian iBOOKS-ի շրջանակներում կարող է վերածուել մշակութային իւրատեսակ երկխօսութեան, նաեւ՝ բացառիկ հնարաւորութիւն է աշխարհասփիւռ հայ գրողների համար հանդիպելու եւ ծանօթանալու վիրտուալ այս տարածքում:
Armenian iBook նախաձեռնութիւնը կենսական նշանակութիւն ունի յատկապէս հայրենիքից դուրս բնակուող հայ նոր սերնդի համար: Հայ գրականութիւնը հայազգի պատանիներին ու երիտասարդներին այս դէպքում ներկայացւում է նրանց մատչելի ու ընդունելի միջոցներով: Ըստ այդմ, այս ծրագրին աջակցութիւնը նաեւ ներդրում է մասնաւորապէս Սփիւռքում մեր ազգային ինքնութեան պահպանման գործին եւ բխում է իւրաքանչիւր հայի շահից: Նախաձեռնութեան հեղինակները նշում են, որ բաց են գործնական առաջարկների համար:  «Նախաձեռնութեանը մասնակցութիւնը կարող է լինել ներդրման ձեւով՝ այսինք, մեզ ֆինանսաւորում են աշխատանքի դիմաց, նուիրատուութեան պարագայում էլ՝ էլեկտրոնային գրքերը անվճար կը տեղադրուեն Apple iBookstore ու Google Play-ում», նշում է Միրաքեանը: Հարկ է նշել, որ գրախանութում առաջարկուող գրքերը բաւական մատչելի են:
Armenian iBOOKS գրախանութում վաճառուող գրքերի, նոր համալրումների, ինչպէս նաեւ նախաձեռնութեան շրջանակներում իրականացուող աշխատանքների մասին տեղեկութիւններ կարելի է ստանալ ArmLib.am բլոգից, որ գործում է http://armlib.blogspot.com/ հասցէում, ինչպէս նաեւ՝ Ֆէյսբուք սոցիալական ցանցում գործող Armenian iBOOKS անուանումով էջից:
Ի դէպ, Apple iBookstore եւ Google Play խանութները դեռեւս հասանելի չեն Հայաստանում: Էլեկտրոնային գրքերը հայաստանեան ընթերցողին եւս մատուցելու նպատակով Armenian iBOOKS նախաձեռնութիւնն անցկացնում է ստորագրահաւաք, որին կարելի է մասնակցել հետեւեալ կայքում՝ https://www.change.org/en-GB/petitions/make-the-apple-ibookstore-available-in-armenia#:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top