Լեւոն Էքմէքճեանի Աճիւնները Ֆրանսա Փոխադրել Կ՛արտօնուի

ՊՈԼԻՍ, «Մարմարա».- Երեքշաբթի, Ապրիլ 2ի թիւով, թրքական «Սապահ» թերթին մէջ Ուղուր Պեճերիքլի Անգարայէն գրած է. «Ինչպէս ծանօթ է, Լեւոն Էքմէքճեան «ԱՍԱԼԱ» հայկական ահաբեկչական կազմակերպութեան անդամներէն մէկն էր, որ Օգոստոս 7, 1982ին, իր ընկերոջ՝ Զօհրապ Սարգիսեանի, հետ Անգարայի «Էսենպողա» օդակայանին մէջ իրագործած էր զինեալ յարձակում մը, որուն հետեւանքով 8 հոգի, ներառեալ՝ Սարգիսեանը, մահացած եւ աւելի քան 70 հոգի վիրաւորուած էին։ Էքմէքճեան վիրաւոր վիճակի մէջ ձերբակալուած էր, դատուած ու Սեպտեմբեր 7, 1982ին մահապատիժի որոշումով կախաղան հանուած էր, ապա Անգարայի Ճեպեճի գերեզմանատան մէկ անկիւնը թաղուած էր։ Անոր հողակոյտին վրայ որեւէ յուշաքար չէր դրուած։ Էքմէքճեանի ֆրանսաբնակ ազգականները, այդ թուականներուն, որոշ մտավախութիւններով Թուրքիա չէին կրցած գալ՝ այցելելու համար իրենց հարազատին գերեզմանը։ 30 տարի ետք, Յունուար 28, 2013ին, Էքմէքճեանի եղբայրը՝ Համբարձում Էքմէքճեան, դիմում ներկայացուց Թուրքիոյ կառավարութեան, իր եղբօր աճիւնները Ֆրանսա փոխադրելու համար։ Առողջապահութեան նախարարութիւնը նիւթի քննարկումէն ետք, հաւանութիւն յայտնեց Էքմէքճեանի աճիւններու Ֆրանսա փոխադրութեան ուղղութեամբ»։
Յայտնենք, թէ Էքմէքճեանի ընտանիքի փաստաբան Էրեն Քեսքինի միջնորդութեամբ աղերսագիրը յղուած էր Թուրքիա: Քեսքին յիշեցուցած էր, թէ իշխանութիւնները խոստացած էին ենթական կախաղան չհանել, եթէ ան խոստովանութիւններ ընէ: Հակառակ անոր, որ Էքմէքճեան խոստովանութիւններ ըրած է, դատարանը, առանց փաստաբան մը շնորհելու Լեւոնին՝ զայն միայն մէկ նիստի ընթացքին մահուան դատապարտած է: «Եթէ պատահարը քննենք, կրնանք տեսնել, որ դատավարութիւնը կատարուեցաւ ծայր աստիճան հակաժողովրդավարական պայմաններու մէջ», ըսած էր Քեսքին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top