Հրատարակուած Է Մելինէ Անումեանի «Ճանաչում Եւ Դատապարտում. Երիտթուրքերի Դատավարութիւնները (1919-1921թթ. Եւ 1926թ.)» Մենագրութիւնը

ԵՐԵՒԱՆ.– Հայոց Ցեղասպանութեան թանգարան-հիմնարկը հրատարակած է պատմական գիտութիւններու թեկնածու Մելինէ Անումեանի «Ճանաչում եւ դատապարտում. երիտթուրքերի դատավարութիւնները (1919-1921թթ. եւ 1926թ.)» գիրքը:
Մենագրութիւնը նուիրուած է 1919-1921 թուականներուն Օսմանեան կայսրութեան Ռազմական արտակարգ ատեաններուն մէջ հայերու տեղահանութեան եւ կոտորածներու մեղադրանքով յարուցուած դատական գործերու եւ 1926 թուականին Թուրքիոյ Անկախութեան դատարաններուն մէջ կայացած երիտթուրքերու դատավարութիւններու ուսումնասիրութեան:
Գիրքի առաջին բաժինին մէջ ներկայացուած է քաղաքական մթնոլորտը Թուրքիոյ մէջ՝ Մուտրոսի զինադադարի կնքումէն ետք, ինչպէս նաեւ՝ հայերու տեղահանութեան եւ կոտորածներու խնդիրի քննարկումները օսմանեան մամուլին եւ երկպալատ խորհրդարանին մէջ, 1918 թուականի վերջերուն: Հեղինակը այս բաժինին մէջ կ՛անդրադառնայ նաեւ այն հետաքննութիւններուն, որոնք Հայոց Ցեղասպանութեան պատասխանատուներուն հաշուոյն կատարուած են Թուրքիոյ մէջ՝ նշեալ ժամանակահատուածին:
Երկրորդ բաժինին մէջ կ՛ուսումնասիրուի 1919-1921թուականներուն հայերու տեղահանութեան եւ կոտորածներու մեղադրանքով Պոլսոյ Ռազմական արտակարգ ատեաններուն մէջ քննուած դատական գործերը եւ 1919-1920 թուականներուն երիտթուրքերու դատավարութիւնները:
Երրորդ բաժինին մէջ անդրադարձ կը կատարուի 1923-1926 թուականներուն Թուրքիոյ մէջ տեղի ունեցած քաղաքական զարգացումներուն: Հեղինակը կը ներկայացնէ ազգայնական պայքարին մէջ էական դերակատարութիւն ունեցած երիտթուրքերուն՝ Թուրքիոյ Հանրապետութեան հռչակումէն ետք ընդդիմութեան ճակատին վրայ յայտնուելուն պատճառները եւ հանրապետութեան նախագահ Մուսթաֆա Քեմալի դէմ ծրագրուած Իզմիրի մահափորձը: Երրորդ բաժինին մէջ ուսումնասիրուած է նաեւ 1926ին Թուրքիոյ Հանրապետութեան անկախութեան դատարաններուն մէջ քննուած Իզմիրի մահափորձի եւ Անգարայի կամ «Սեւ աւազակախումբ»ի դատական գործերը: Վերջին բաժինով հեղինակին կողմէ համեմատութիւն կը կատարուի երիտթուրքերու 1919-1921 թուականներու եւ 1926 թուականի դատավարութիւններուն միջեւ եւ կ՛ընդգծուի Թուրքիոյ Հանրապետութեան քաղաքական կեանքին մէջ, գաղափարախօսութեան եւ պետական կառավարման մէջ իթթիհատական աւանդոյթի պահպանման փաստը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top