ՀԲԸՄ ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ- 193 Աշակերտներու Հպարտառիթ Հունձք Մը

ՀՐԱՉ ՍԵՓԵԹՃԵԱՆ

Սփիւռքահայ իրականութեան մէջ հայ դպրոցը հայապահպանման մեծագոյն կեդրոններէն մէկն է ակումբին եւ եկեղեցիին կողքին, որուն ղեկը վարողները կը նաւարկեն հոսանքն ի վեր, հասնելով իրենց նպատակներուն:
ՀԲԸՄը այդ ծիրէն ներս ունի շուրջ հարիւրամեայ փորձառութիւն մը, իսկ Լոս Անճելըսի մէջ գործող միութեան Մանուկեան-Տեմիրճեան վարժարանը շուտով կը համալրէ իր ծննդեան չորրորդ տասնամեակը: Աւելի քան 1,200 շրջանաւարտներ, այսօր տիրացած են զանազան մասնագիտութիւններու եւ որքա՜ն անուշ է տեսնել նախկին աշակերտներու վերադարձը որպէս ծնողներ իրենց հարազատ դպրոց: Մեր վարժարաններուն առաքելութիւնը է ու կը մնայ հայեցի կրթութիւն եւ ամբողջական գիտելիք փոխանցել նոր սերունդին, զանոնք դաստիարակելով որպէս տիպար քաղաքացիները իրենց ապրած երկրին:
Անցնող 2012-2013 ուսումնական տարեշրջանը տարբեր չեղաւ իր յաջողութիւններով: Շրջանաւարտ աշակերտներ կը շարունակեն ընդունուիլ ուսումնական բարձրագոյն հաստատութիւններ: Իսկ այս տարեշրջանին, մանկապարտէզի, նախակրթարանի, միջնակարգի եւ երկրորդականի ծրագիրները աւարտելով, 193 աշակերտներ վկայուեցան Մանուկեան-Տեմիրճեան վարժարանի համապատասխան վկայականներով:

ԵՐԿՐՈՐԴԱԿԱՆ ԲԱԺԻՆ

Շաբաթ, Յունիս 8, 2013

ՀԲԸՄ Մանուկեան-Տեմիրճեան վարժարանի երկրորդական բաժինէն այս տարի շրջանաւարտ դարձան 42 աշակերտ-աշակերտուհիներ, միանալով Շրջանաւարտից միութեան: Յետմիջօրէի ժամը 5:30ին Նազարեան սրահը բերնէ բերան կը սպասէր աւարտական դասարանցիներուն: Անոնց եւ ուսուցչական կազմին պաշտօնական մուտքէն ետք, Միացեալ Նահանգներու, Հայաստանի եւ ՀԲԸՄի քայլերգներու ունկնդրութեամբ սկիզբ առաւ օրուան յայտագիրը: Հանդիսավարութիւնը եւ բացման խօսքը կատարեց միջնակարգ-երկրորդականի փոխտնօրէնուհի Անահիտ Նալպանտեան-Բժշկեան: Ան պատառիկներ յիշեց շրջանաւարտ դասարանի առօրեայէն եւ փոխանցեց իր բարեմաղթութիւնները:
Դասարանին երկու բարձրագոյն գնահատականները ստացող աշակերտուհիները՝ նախ Քաթրինա Քարապօղոսեանը՝ ողջերթի եւ ապա՝ Անիսա Եուսէֆին՝ (դասարանին առաջնութիւնը շահող) հրաժեշտի իրենց խօսքերը համեմեցին լուրջ ու անկեղծ, ընկերային ու կատակախառն տողերով, խլելով ներկաներուն ուշադրութիւնն ու գնահատանքը: Այո, դժուար է, տասներկու եւ աւելի տարիներ սորվիլ ու խաղալ, սիրել ու սիրուիլ ընկերային նոյն շրջանակին մէջ, նոյն դասարանին մէջ, եւ ահա՝ բաժանում, նոր կեանք, համալսարանական նոր ու անյայտ տարիներ, միշտ վերադառնալու հաւատքով, միշտ վերամիանալու բարի ցանկութիւններով: Անոնց խօսքերը արժանացան բուռն ծափահարութիւններու: Իսկ Անիսային «Սիրելի ուսուցի»չ մեներգը (դաշնամուրի ընկերակցութեամբ Արուս Անդրէասեանի) եղաւ անակնկալ եւ գեղեցիկ նուէր մը նախկին թէ ներկայ բոլոր ուսուցիչներուն:
Վերջին եօթը տարիներուն բարի աւանդութեան վերածուած է, որ շրջանաւարտներուն ուղղուած պատգամը փոխանցէ նախկին շրջանաւարտ մը. այս տարի այդ պարտականութիւնը ինկած էր բացառիկ նախկին աշակերտի մը՝ դոկտ. Մհեր Օրջանեանի (Assistant vice-president, Trust Company of the West) ուսերուն: Անոր խօսքը դիպուկ էր, սրտամօտիկ, դէպի անծանօթ ափեր նետուող շրջանաւարտներուն համար ուսանելի եւ վստահելի փարոս մը, որուն օրինակին հետեւելով, շրջանաւարտները կրնան հարթել իրենց ուղին, քայլ առ քայլ, մինչեւ մտնեն իրենց սրտին ու մտքին խօսող հունին մէջ: Օրջանեան շեշտեց նաեւ հայկականութիւնը եւ պատկանելիութիւնը ՀԲԸՄի դպրոցական մեծ ընտանիքին:
Վկայականներու եւ մրցանակներու բաշխման համար Նալպանտեան հրաւիրեց ՀԲԸՄի փոխնախագահ եւ վարժարանիս Հոգաբարձական կազմի ատենապետ Սինան Սինանեանը, տնօրէն Յակոբ Յակոբեանը, եւ դաստիարակ ուսուցիչներ Աննա Մկրտ-չեանը, Մարք Միքայիլը եւ դոկտ. Ռէյմընտ Էլիընը:
Ապա, Յ. Յակոբեան խօսք առնելով շնորհաւորեց շրջանաւարտները, անոնց մաղթելով կանաչ ճանապարհ:
Շրջանաւարտից միութեան ատենապետ Ռաֆֆի Սուաճեան հրաւիրուեցաւ իր սրտի խօսքը փոխանցելու: Ան պաշտօնապէս ՀԲԸՄ Մանուկեան-Տեմիրճեան վարժարանի Շրջանաւարտից միութեան անդամ յայտարարեց աւարտական 42 շրջանաւարտները, գործակցելու, դպրոցին եւ իրարու օգնելու բարձր տրամադրութեամբ:
Հանդիսութեան փակման եւ օրհնութեան խօսքը կատարեց Հայաստանեայց Առաքելական եկեղեցւոյ Ամերիկայի Արեւմտեան թեմի առաջնորդ Յովնան արք. Տէրտէրեան: Ան հրաշալի բառով զարդարեց շրջանաւարտները. օրը հրաշալի, առիթը հրաշալի, իրենք հրաշալի: Ինչպէս միշտ, իրեն յատուկ ոճով, ան աւելի բարձրացուց տրամադրութիւնները ի տես նոր սերունդին, որուն կը հաւատանք բոլորս, որ պիտի գայ եւ շարունակէ ազգային մեր կեանքի բոլոր երեսները:
Շրջանաւարտներու եւ ուսուցիչներու պաշտօնական ելքով վերջ գտաւ հանդիսութիւնը: Ծնողա-ուսուցչական մարմինը կազմակերպած էր պատշաճ ու ճոխ հիւրասիրութիւն՝ դպրոցին ճաշարանին մէջ:
Մեր շնորհաւորութիւնները:

ՄԻæՆԱԿԱՐԳ ԲԱԺԻՆ

Չորեքշաբթի, Յունիս 5, 2013ի երեկոյեան ժամը 7ին, Նազարեան մարզասրահին մէջ տեղի ունեցաւ Մանուկեան-Տեմիրճեան վարժարանի միջնակարգի 8րդ դասարանի ծրագիրը ամբողջացնող աշակերտներուն նուիրուած հանդիսութիւնը: Անոնք վարժարանէն կը ստանան վկայագիրներ եւ ընդհանրապէս բոլորն ալ կը շարունակեն իրենց ուսումը յաջորդ տարեշրջանին, երբ իրենց կը միանան նաեւ այլ դպրոցներու 8րդ դասարանէն եկող տղաք ու աղջիկներ:
44 աշակերտ-աշակերտուհիները սրահ մուտք գործելէ ետք, օրուան հանդիսավար, հայերէնի բաժանմունքի վարիչ Հրաչ Սեփեթճեան բացումը կատարեց հանդիսութեան եւ որպէս նորութիւն, հրաւիրեց այս տարուան 9րդ դասարանէն երկու աշակերտներ՝ Նորա Գալուստեան եւ Քեւըն Առաքելեան, որպէսզի որպէս երեցներ հրաւիրեն ութերորդցիները երկրորդական բաժին:
Վկայագիրներու բաշխման հանդիսաւոր արարողութիւնը կատարելու համար բեմահարթակ հրաւիրուեցան դաստիարակ ուսուցչուհիներ՝ գիտութեան ուսուցչուհի Եոլանտա Յովսէփեան եւ անգլերէնի ուսուցչուհի Թինա Փափազեան, ինչպէս նաեւ փոխտնօրէնուհի Անահիտ Նալպանտեան-Բժշկեան եւ տնօրէն Յակոբ Յակոբեան:
Աշակերտները վկայագիրներուն կողքին ստացան նաեւ բարձրագոյն միջինի, հայերէնի եւ հայոց պատմութեան գնահատագիրներ, «Առաջնորդ Յովնան Տէրտէրեան» անունը կրող շարադրութեան մրցանակներ:
Սրտի իր խօսքը փոխանցեց տնօրէնը, որ շնորհաւորեց աշակերտները եւ շնորհակալութիւն յայտնեց ծնողներուն, որոնք իրենց զաւակները կը վստահին ՀԲԸՄին եւ Մանուկեան-Տեմիրճեան վարժարանին: Փակման խօսքով եւ պահպանիչով հանդիսութիւնը փակելու համար հրաւիրուեցաւ Սանթա Քլարիթայի Ս. Սարգիս Հայց. Առաքելական եկեղեցւոյ հոգեւոր հովիւ Ներսէս քհնյ. Հայրապետեան: Անոր բարի եւ արի խօսքերով վերջ գտաւ միջնակարգի հանդիսութիւնը:
Աւարտին, կազմակերպուած էր ընթրիք՝ ի պատիւ շրջանաւարտ դասարանին:

ՆԱԽԱԿՐԹԱՐԱՆ

Կիրակի, Յունիս 2, 2013

Օրը Կիրակի էր, տրամադրութիւնները՝ բարձր: 58 Մարի Մանուկեանցիներ հինգերորդ դասարանը աւարտելով, այդ օր իրենց կեանքի ամէնէն մեծ ոստումը կը կատարէին. անցում՝ դէպի միջնակարգ: Ցտեսութիւն նախակրթարան. դպրոցաշէնքեր, խումբ մը փորձառու թէ նորեկ ուսուցչուհիներ, ուրախ մանկութիւն, կարծէք կը մնային ետին, երբ հասունութեան իրենց վկայականները կը ստանային տղաքն ու աղջիկները:
Դէպի «Նազարեան» սրահ շրջանաւարտներուն մուտքէն եւ քայլերգներէն ետք, բացման խօսքով ելոյթ ունեցաւ օրուան հանդիսավար, նախակրթարանի հայերէնի ծրագիրը համակարգող եւ վերի կարգերու հայոց լեզուի ուսուցչուհի Մարալ Ոսկեանը: Ապա, խմբային արտասանութիւններով եւ երգչախմբային կատարումներով (խմբավար՝ Արուս Անդրէասեան) հանդէս եկան շրջանաւարտները հայերէն եւ անգլերէն լեզուներով, մեծապէս գնահատուելով ներկաներուն կողմէ:
Դաստիարակ ուսուցչուհիներ՝ Դանիա Միքայէլեան, Արեգ Մոմճեան եւ Քարինա Ուղուրեան փոխանցեցին իրենց հակիրճ խօսքերը, շնորհաւորելով եւ բարեմաղթանքներ փոխանցելով շրջանաւարտներուն:
Վկայականներու յանձնման պաշտօնական արարողութիւնը կատարեցին վարժարանիս տնօրէն՝ Յակոբ Յակոբեան եւ նախակրթարանի փոխտնօրէնուհի՝ Մարի Սթիուըրթ, որոնք նոյնպէս շնորհաւորեցին եւ յաւուր պատշաճի իրենց խօսքը փոխանցեցին շրջանաւարտներուն: Հանդիսութիւնը փակուեցաւ Շնորհք Ա. քհնյ. Տէմիրճեանի պատգամով ու պահպանիչով: Շրջանաւարտները դուրս եկան հանդիսասրահէն «Միասնութեան շուրջպար»ը երգելով ու պարելով:
Հանդիսութենէն ետք դպրոցին շրջափակին մէջ տեղի ունեցաւ ճաշկերոյթ, ի պատիւ նախակրթարանի շրջանաւարտներուն:

ՄԱՆԿԱՊԱՐՏԷԶ

Կիրակի, Մայիս 19, 2013

Մայիս 19ի յետմիջօրէին, ՀԲԸՄ Մանուկեան-Տեմիրճեան վարժարանի «Նազարեան» սրահին մէջ տեղի ունեցաւ մանկապարտէզի ամավերջի հանդէսը: Զոյգ դասարաններու 49 աշակերտ-աշակերտուհիներ այդ օրը ստացան իրենց առաջին վկայականները: Ժպիտը անպակաս էր ծնողներուն դէմքերուն վրայ ու հոգիներուն մէջ: Ուսուցչուհիներուն եւ տնօրէնութեան՝ նոյնպէս:
Բացման խօսքը կատարեց օրուան հանդիսավար, մանկապարտէզի հայերէնի նուիրեալ ուսուցչուհի Սեւան Տէր Պետրոսեան: Ան շնորհաւորեց ծնողները, մեծ հայրերն ու մեծ մայրերը, իսկ աշակերտներուն մաղթեց նորանոր յաջողութիւններ: Շրջանաւարտներուն մուտքէն ետք երգուեցան քայլերգները: Ներկայացուեցաւ աշակերտական կոկիկ յայտագիր մը հայերէն եւ անգլերէն երգերով ու արտասանութիւններով: Վկայականներու բաշխումը կատարեցին վարժարանիս երկարամեայ եւ վաստակաւոր տնօրէն՝ Յակոբ Յակոբեանը եւ նախակրթարանի փոխտնօրէնուհի՝ Մարի Սթիու-ըրթ, որոնք վկայականներու բաշխումէն ետք իրենց սրտի ու շնորհաւորական խօսքերը փոխանցեցին ծնողներուն եւ շրջանաւարտներուն: Հանդիսութիւնը փակուեցաւ Ս. Պետրոս եկեղեցւոյ հոգեւոր հովիւ Շնորհք Ա. քհնյ. Տէմիրճեանի պատգամով ու «Պահպանի»չով:
Հանդիսութենէն ետք, դպրոցին ճաշարանին մէջ տեղի ունեցաւ ճոխ հիւրասիրութիւն:
***
Ջերմօրէն կը շնորհաւորենք այս տարուան բոլոր շրջանաւարտները, անոնց ծնողներն ու հարազատները: Շնորհակալութիւն վարժարանիս ուսուցիչներուն, ինչպէս նաեւ գրասենեակի պաշտօնէութեան իրենց անսակարկ օժանդակութեան համար: Այստեղ, պարտք կը զգանք յիշել անունը Վարդուհի Գոճայեանին, որ տասնամեակներ շարունակ կը կազմակերպէր դպրոցական ներքին թէ հրապարակային բոլոր հանդիսութիւնները: Առողջական պատճառներով, այս տարեշրջանի կիսուն ան ակամայ հեռացաւ մեզմէ եւ ներկայիս ապաքինման շրջան մը կը բոլորէ: Մեր բարի մաղթանքները փոխանցելով, կը յուսանք զինք կրկին տեսնել՝ գործօն եւ ժպտադէմ:

ԱՆԴՐԱՆԻԿ ԵՒ ԱՐՓԻ
ՍԻՆԱՆԵԱՆՆԵՐ
Սրտանց Կը Շնորհաւորեն Սփիւռքի
Եւ Հայաստանի Բոլոր Շրջանաւարտները

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top