Սեպուհ Սիմոնեան Պիտի Մասնակցի Հայ Դատի «Ֆիլմ Եւ Արուեստներ» Խորհրդակցութեանց

ԿԼԵՆՏԷՅԼ.- Արեւմտեան Ամերիկայի Հայ Դատի յանձնախումբը կը տեղեկացնէ, թէ Գոհաբանութեան շաբաթավերջին կայանալիք Հայ Դատի խորհրդաժողովին ընթացքին տեղի ունենալիք «Ֆիլմ եւ արուեստներ» քննարկումի խորհրդակցութեանց իր մասնակցութիւնը պիտի բերէ նաեւ Սեպուհ Սիմոնեանը:
Սեպուհ Սիմոնեանի երաժշտական վերջին ծրագիրը «Քեփիթըլ Սիթիզ» նուագախումբն է, որուն «A Tidal Wave of Mystery» ալպոմէն Safe and Sound երգը աշխարհի տարածքին մեծ հռչակ ապահոված է ու շահած «Վիտէօ Միուզիք» մրցանակը: Անոր խումբը վերջերս վերադարձած է Հիւսիսային եւ Հարաւային Ամերիկաներու, Եւրոպայի ու Ասիոյ զանազան երկիրներու մէջ շրջապտոյտէ մը՝ միաժամանակ մասնակցելով շարք մը բարեսիրական նպատակներով կազմակերպուող համերգներու, ամէն առիթ օգտագործելով Հայկական Ցեղասպանութեան ճանաչման ի նպաստ աշխատանք տանելու համար:
Սուրիա ծնած ու Միացեալ Նահանգներու մէջ հասակ նետած Սեպուհ Սիմոնեանը կանուխ տարիքէն սկսած է դաշնակ նուագելու. երաժշտութեան մարզին մէջ մասնագիտացած է Քալիֆորնիոյ նահանգային համալսարանի Նորթրիճի մասնաճիւղին մէջ: Ան 15 տարեկանին կազմած է իր առաջին նուագախումբը՝ նուագելով ու երգելով սովորաբար «Փինք Ֆլոյտ»ի երգերէն. ան իր երգերը սկսած է արտադրելու 16 տարեկանէն սկսեալ, նախ իր ննջարանին մէջ զետեղուած սաքրերով, ապա՝ երաժշտական յատուկ սենեակի մը մէջ, որ կը գտնուէր Պըրպենքի մէջ:
1990ականներու վերջաւորութեան, Սեպուհ Սիմոնեան նաեւ եղած է «Ասպարէզ»ի անգլերէն բաժինի խմբագիրի օգնական:
Հայ Դատի խորհրդաժողովը տեղի պիտի ունենայ Հոլիվուտի «Լոզ» պանդոկին մէջ, ի մի բերելով մեծ թիւով մտաւորականներ, արուեստագէներ, պատմագէտներ, իրաւագէտներ ու քաղաքական անձնաւորութիւններ՝ զանազան հարցերու շուրջ խորհրդակցութիւններու համար:
Մասնակցելու համար, այցելել itsmyseat.com/ancawr կայքէջը կամ դիմել (818) 500-1918 թիւին: Յաւելեալ տեղեկութեանց համար այցելել
facebook.com/ANCAWesternRegion կայքէջը կամ ancawr.org կայքը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top