Թոնիրի Հացի Փառատօն Արցախի Մէջ

ՍՏԵՓԱՆԱԿԵՐՏ, «Ապառաժ».– Մարտ 8ին՝ Կանանց միջազգային տօնին օրը Ասկերանի շրջանի Խանցք համայնքին մէջ կազմակերպուեցաւ Արցախի թոնիրի հացի փառատօն: Առաւօտեան ժամը 5էն սկսեալ Խանցք համայնքի կիները վառած էին իրենց տան թոնիրները եւ սկսած էին հաց թխել: Կէսօրին մայրաքաղաք Ստեփանակերտէն փառատօնին ներկայ գտնուելու համար գիւղ եկած էին Լեռնային Ղարաբաղի Հանրապետութեան նախագահ Բակօ Սահակեան, Ազգային ժողովի նախագահը, վարչապետը եւ գործադիր իշխանութեան ներկայացուցիչներ:
Հիւրերը թոնիրին մօտ համտեսած են տաք թոնիրի հացը, այնուհետեւ ուղղուած են գիւղի դպրոցին բակը, ուր տեղի ունեցած է հիմնական ձեռնարկը: Թոնիրի հացի փառատօնին կը մասնակցէին Խանցքէն 42 կիներ, որոնք ներկայացուցած են թոնիրի մէջ իրենց ձեռքով թխած հացը: Խանցք համայնքի ղեկավարը հաստատած է, որ Խանցքը այն եզակի գիւղերէն է, որ մինչեւ օրս կը պահպանէ հինէն եկած աւանդութիւնները, եւ խանցքեցիները խանութէն հաց չեն գներ ընդհանրապէս. «Խանցքի բնակիչները ամուր կառչած են իրենց արմատներից, մեր գիւղից արտահոսք առհասարակ չկայ, արդէն 16 տարի է, ինչ Խանցք համայնքի ղեկավար եմ եւ բնակչութեան թիւը այս տարիների ընթացքում նոյնն է մնացել», նշած է Խանցք համայնքի ղեկավար Զօրիկ Յարութիւնեանը:
Խանցքեցիները իրենց արտերուն մէջ մշակուած ցորենէն հաց կը թխեն, եւ թխած հացը շուկային մէջ չեն ծախեր: Խանցքեցի տարեց կանայք կէս կատակ կէս լուրջ կ՛ըսէին, որ իրենց գիւղը հարս եկողներն ալ կարճ ժամանակի ընթացքին կը սորվին հաց թխել եւ կը շարունակեն տարեց կեսուրներուն գործը:
Գիւղապետին համաձայն՝ գիւղի բնակիչները մեծ ոգեւորութեամբ ընդունած են հացի փառատօն կայացնելու գաղափարը, եւ մօտ մէկ ամիս ամբողջ գիւղը պատրաստուած էր միջոցառման պատշաճ կերպով կայացման: Օրը խանցքեցիներուն եւ հիւրերուն համար իսկապէս տօնական էր, որովհետեւ արցախեան հիւրասիրութեան կ՛ընկերակցէին ժողովրդական երգերն ու շուրջպարը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top