Հայ Զոհեր Եւ Վիրաւորներ Հալէպի Մէջ

ՀԱԼԷՊ, «Գանձասար».- Անցնող օրերուն Հալէպի ապահովական վիճակը զգալիօրէն վատթարացաւ: Սուրիական օրինաւոր բանակին եւ զինեալ ընդդիմադիրներուն միջեւ բուռն բախումներ տեղի կ՛ունենան Զահրաա (քաղաքի արեւմտեան կողմը), Լերամուն (հիւսիսարեւմուտք), Ռամուսէ (հարաւարեւմուտք), Համտանիէ (արեւմուտք) եւ Շէյխ Մաքսուտ (հիւսիս) շրջաններուն մէջ:
Ռամուսէի բախումներուն հետեւանքով, ժամանակաւորապէս վտանգուած է Հալէպէն դուրս գալու միակ ճանապարհը՝ Խանասերը: Խանասերի ճանապարհը տակաւին բաց է, սակայն բախումներու սաստկացման պարագային՝ ապահովական նկատառումներով անիկա ժամանակաւորապէս կը փակուի:
Միւս կողմէ, կը շարունակուի զինեալ խմբաւորումներուն կողմէ հրասայլերու արձակումը Հալէպի զանազան թաղամասերուն վրայ: Երկուշաբթի, Ապրիլ 14ին չորս հրթիռեր պայթեցան Նոր Գիւղ շրջանի տարբեր թաղամասերուն մէջ: Անցած շաբաթավերջին տեղի ունեցած բախումներուն ընթացքին, տասնեակներով հրասայեր եւ արկեր արձակուած են Հալէպի զանազան շրջաններու եւ յատկապէս Նոր Գիւղ շրջանին վրայ՝ մարդկային եւ նիւթական լուրջ վնասներ հասցնելով բնակչութեան: Արձանագրուած են հայ եւ տեղացի վիրաւորներ եւ զոհեր: Վիրաւոր հայորդիներու անուններն են՝ Վրէժ Եագուպեան, Ժագ Տէկիրմէնճեան, Յարութ Աբիկեան, Արաքսի Օրուլեան, Յասմիկ Մանուէլ-Թիւթիւնճեան, Կարօ Քարակիւլլիւեան, իսկ զոհերուն մէջ կը գտնուին երկու հայեր՝ Սագօ Աշնալըքեան եւ Լեւոն Գէորգեան։
«Արմէնփրէս»ի հետ զրոյցի մը ընթացքին, Բերիոյ թեմի Ազգային առաջնորդարանի մամլոյ քարտուղար Ժիրայր Ռէիսեան ըսած է, թէ ստեղծուած լարուած իրավիճակը անմիջապէս իր բացասական ազդեցութիւնը ունեցած է շուկայի մթերքներուն վրայ, որոնց գիները բարձրացած են՝ նշելով, որ կրկին հացի կարգեր սկսած են գոյանալու փուռերու առջեւ:
Միւս կողմէ, Կիրակի, Ապրիլ 13ին, հալէպահայութիւնը պատշաճ շուքով, հոծ բազմութեան ներկայութեամբ եւ հանդիսաւոր Ս. պատարագի մատուցմամբ նշեց Ծաղկազարդի տօնը՝ խաղաղութիւն մաղթելով սուրիական հայրենիքին, ապահովութիւն ու համբերութիւն՝ Սուրիոյ տագնապահար ժողովուրդին: Ըստ վերոնշեալ աղբիւրին՝ մարդիկ թէեւ սովորական իրենց ցնծութիւնը չզգացին այս տարի, որովհետեւ երկրի տագնապը, օրական արձանագրուող մարդկային զոհերն ու նահատակները համարեա խլած էին Սուրիոյ ժողովուրդին երբեմնի խանդավառութիւնը, սակայն հաւատքը կը շարունակէր ապրիլ իւրաքանչիւրի սիրտին մէջ:
Նաեւ, Ապրիլ 14ին, Լաթաքիոյ Ճապլէ շրջանի մերձակայքը քանի մը հրթիռ ինկած է՝ միայն նիւթական վնասներ պատճառելով: «Լաթաքիոյ տեղեկատուական ցանց» կայքէջը աւելուցած է, թէ բախումները կը շարունակուին Քեսապի մէջ, մասնաւորապէս՝ թիւ 45 դիտարանի տարածքին:
Սուրիական օրինաւոր բանակի գործողութիւնները վերջին քանի մը օրերուն կեդրոնացած են Սալիտրին գագաթի ուղղութեամբ, որ ճանապարհ պիտի բանայ դէպի Չալմայի գագաթ, ինչպէս նաեւ դէպի Նապալէյն եւ Սամրա շրջանները:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top