Ազերի Լրագրողը Ձերբակալուած Է՝ Հայաստանի Ի Նպաստ Լրտեսելու Ամբաստանութեամբ


Ատրպէյճանցի նշանաւոր քաղաքագէտ, լրագրող, Թուրքիոյ մէջ «Այնա Զերկալօ» ատրպէյճանական թերթի յատուկ թղթակից Ռաուֆ Միրքատիրովը մեղադրուած է պետական դաւաճանութեամբ:
Շուրջ երեք տարի ընտանիքին հետ Անգարայի մէջ բնակող գործիչը՝ Պաքուի իշխանութիւններուն դիմումին հիման վրայ արտայանձնած են Ատրպէյճանին, եւ ան այժմ կը պահուի Ատրպէյճանի ազգային անվտանգութեան նախարարութեան քննչական մեկուսարանին մէջ: Կասկած կայ այն մասին, որ ան կը համագործակցի Հայաստանի անվտանգութեան մարմիններուն հետ:
Ապրիլ 18ին, երբ Ռաուֆ Միրքատիրով իր ընտանիքին հետ փորձած է լքել Թուրքիան, ձերբակալուած է: Ատրպէյճանցի իրաւապահները լրագրողի փաստաբանին չեն ներկայացուցած յստակ ու ճշգրիտ փաստեր եւ վկայութիւններ:
Խաղաղութեան եւ ժողովրդավարութեան հիմնարկը հրապարակած է յայտարարութիւն՝ նշելով, որ Ատրպէյճանի քրէական օրէնսգիրքի 274 յօդուածը՝ պետական դաւաճանութիւն, լր-տեսութիւն, որուն իբրեւ պատիժ սահմանուած է 10 տարիէն մինչեւ ցմահ ազատազրկում, ակնյայտ ապացոյց է մենատիրական համակարգի սանձարձակ ճնշման, նաեւ Հայաստանի քաղաքացիական հասարակութեան հետ որեւէ կապի լիարժէք արգելք է: Կազմակերպութիւնը նաեւ նշած է, որ Միրքատիրովը «Խաղաղութեան եւ ժողովրդավարութեան հիմնարկ»ի նախագիծերուն մէջ հայ ոչ կառավարական կազմակերպութիւններուն հետ համատեղ բազմաթիւ նախագիծերու աշխոյժ մասնակից է, բազմիցս այցելած է Հայաստան:
«Այնա Զերկալօ» թերթի գլխաւոր խմբագիր Էլչին Շահլինսքին յայտնած է, որ դիմած է Թուրքիոյ դեսպանատուն, որպէսզի քննեն գործը, եւ եթէ ատրպէյճանցի լրագրողին փաստաթուղթերը յստակ ըլլան, պաշտօնական բացատրութիւն պիտի պահանջէ թրքական իշխանութիւններէն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top