Ասմունքի Մրցանակ Եւ Մրցանակաբաշխութիւն Ազգային Առաջնորդարանին Մէջ

ԼԱ ՔՐԵՍԵՆԹԱ.- Ինչպէս ծանօթ է, Շաբաթ, 10 Մայիս 2014ին, հովանաւորութեամբ Ազգ. Առաջնորդարանին, համագործակցութեամբ Հայաստանի Հանրապետութեան Լոս Անճելըսի գլխաւոր հիւպատոսութեան եւ կազմակերպութեամբ Ազգ. վարժարաններու Խնամակալ մարմինին, «Աւան Շուշի Փլազա» հիւրանոցի տնօրէնութեան, «Ասպարէզ» օրաթերթի եւ «Հորիզոն» պատկերասփիւռի ընկերութեան, Ազգ. առաջնորդարանի «Տիգրան եւ Զարուհի Տէր Ղազարեան» սրահին մէջ տեղի ունեցաւ Քալիֆորնիոյ վարժարաններու ասմունքի համահայկական առաջին մրցումը։
Մայիսեան այդ ձեռնարկին մրցանակներու արժանացողները գնահատելու եւ մրցանակաբաշխութիւնը կատարելու համար, Չորեքշաբթի, 23 Յուլիսի երեկոյեան, նմանապէս Ազգ. առաջնորդարանի յարկին տակ եւ նոյն սրահին մէջ տեղի ունեցաւ հանդիսութիւն մը՝ նախագահութեամբ թեմի առաջնորդ Մուշեղ արք. Մարտիրոսեանի: Ներկայ էին Ազգային վարչութեան ատենապետ Վահէ Յովակիմեան եւ անդամ դոկտ. Տիգրան Պապիկեան, Խնամակալ մարմինի համա-ատենապետ Մակի Սարգունի եւ անդամ Շարլոթ Սասունեան, կազմակերպիչ յանձնախումբի անդամներ, դատական յանձնախումբի անդամ Թագուհի Արզումանեան, Ազգ. վարժարաններու տնօրէններ եւ ուսուցիչներ, մրցանակաւոր աշակերտներ եւ ծնողներ:
Բացման խօսքը արտասանեց եւ հանդիսավարութիւնը կատարեց դոկտ. Տիգրան Պապիկեան: Ան անդրադարձաւ այս մրցանքի կազմակերպման շարժառիթին եւ նպատակներուն, գնահատեց մասնակցող աշակերտներն ու դաստիարակները՝ յոյս յայտնելով, որ այս մրցումը վերածուի գեղեցիկ աւանդութեան:
Խօսք առին նաեւ Ալեք Պաղտասարեան եւ Մակի Սարգունի: Ա. Պաղտասարեան հակիրճ կերպով անդրադարձաւ վերջին տարիներուն Շուշիի մէջ համագաղութային աշակերտական արտասանական մրցում կազմակերպելու գաղափարին եւ նպատակներուն՝ յոյս յայտնելով, որ այս նախաձեռնութիւնը տարուէ տարի ներգրաւէ աւելի մեծ թիւով մասնակիցներ: Ան գոհունակութիւն յայտնեց, որ մեր շրջանէն այս տարի 6 աշակերտներ պիտի մասնակցին Շուշիի մրցումին: Մակի Սարգունի իր կարգին շնորհակալութեան խօսք ուղղեց կազմակերպիչներուն՝ գնահատանքով արտայայտուեցաւ ո՛չ միայն մրցանակ շահողներուն, այլեւ բոլոր մասնակիցներուն մասին՝ վեր առնելով նման նախաձեռնութիւններու կարեւորութիւնը մեր նոր սերունդի կեանքին մէջ:
Կազմակերպիչ յանձնախումբի անդամներէն Միհրան Թումայեան եւ Նանէ Աւագեան կատարեցին մրցանակաբաշխութիւնը: Երկու աշակերտներ հանդէս եկան արտասանութիւններով՝ ասմունքելով «Սասնոյ Պարը» եւ «Կռունկ»ը:
Հանդիսութեան փակման եւ օրհնութեան խօսքը արտասանեց առաջնորդ սրբազանը: Ան առաջին հերթին գնահատանքով արտայայտուեցաւ այս ու նման նախաձեռնութիւններու կազմակերպիչներուն մասին՝ նշելով, որ հայ աշակերտին մէջ մշակոյթի սէրն արթնցնելու կողքին, այս մրցումը նաեւ ուղղակի հաղորդակցութեան մէջ կը դնէ մրցանակաւորն ու Արցախ հայրենիքը: Առաջնորդը նշեց, որ արուեստի այլ մարզերու մէջ աւանդութիւն դարձած մրցանքներու կողքին, ասմունքի նման մրցումի մը կազմակերպումը կարեւոր բաց կը լրացնէ: Ան գնահատեց կազմակերպողներն ու մասնակիցները, դաստիարակներն ու ծնողները՝ մաղթելով, որ նման նախաձեռնութիւններու ճամբով հայեցի դաստիարակութիւնը նոր ծաւալ ստանայ: Իր խօսքի աւարտին, առաջնորդը յայտարարեց, որ իբրեւ շօշափելի գնահատանք՝ մրցանակաւորներուն եւ դատական կազմին, Ազգ. առաջնորդարանը անոնց կը նուիրէ գիրքեր՝ իբրեւ յիշատակ սոյն ձեռնարկէն:
Շահող մրցանակաւորները նաեւ թանկարժէք նուէրներ ստացան Ալեք Պաղտասարեանի եւ Նազ Աթիկեանի կողմէ: Յաղթողներուն հայ դասականներու մասին ելեկտրոնային գիրքեր տրամադրեց Armenian iBOOKS-ը, նաեւ գիրքեր նուիրեց «Սարդարապատ» գրատունը:
Արարողութեան ընթացքին յայտարարուեցաւ նաեւ Շուշիի մէջ՝ Օգոստոս 4էն 8 կազմակերպուելիք Ասմունքի համահայկական փառատօնին՝ Միացեալ Նահանգներէն ժամանող վեց մասնակիցներու անունները: Փառատօնի հիմնադիր Ալեք Պաղտասարեան յայտնեց, որ այս տարի Շուշիի փառատօնին պիտի մասնակցին պատանիներ Վրաստանէն, Ռուսիայէն, Իրանէն, Միացեալ Նահանգներէն, Պէյրութէն, Հայաստանի շրջաններէն, ինչպէս նաեւ՝ Քաշաթաղ եւ Լաչին բնակող սուրիահայ աշակերտներ:
Պաղտասարեան անգամ մը եւս նշեց ձեռնարկին նպատակը՝ Համահայկական ասմունքի փառատօնին միջոցով նպաստել Շուշիի մշակութային կեանքի աշխուժացման, հայ մանուկներն ու պատանիները համախմբել հայ գրականութեան շուրջ եւ հնարաւորութիւն ստեղծել տարբեր երկիրներէ ժամանած մասնակիցներուն՝ իրարու հետ ծանօթանալու:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top