Յունահայոց Թեմը Պետական Իրաւական Ճանաչում Ստացաւ

ԱԹԷՆՔ, «Ազատ Օր».- Յունաստանի խորհրդարանի Ամառնային Գ. նստաշրջանը սկզբունքային որոշում որդեգրեց՝ քննարկելով երկիրէն ներս կրօնական համայնքներու այսուհետեւ իրաւական բնոյթ տալու հարցը:
Չորեքշաբթի, 1 Հոկտեմբերին վաւերացուած օրինագիծին նկատմամբ դրական կեցուածք ցուցաբերեցին խորհրդարանի մեծամասնական ուժերը, մինչ համայնավարները մնացին ձեռնպահ, իսկ «Ոսկեայ արշալոյս»ը դէմ քուէարկեց:
Կրթութեան նախարար Անտրէաս Լովերտոս դիտել տուաւ, թէ այս օրինագիծը կու գայ լուծելու 1946էն ի վեր առկախ մնացած հարցեր, որոնք կը խոչընդոտեն Յունաստանի մէջ կրօնական համայնք կազմող հաւաքականութիւններու բնականոն գործունէութիւնը:
Նշենք, թէ յունահայոց Ազգային վարչութեան տարիէ մը աւելի ի գործ դրած ճիգերուն իբրեւ արդիւնք, Յունահայոց թեմը եւս ներառուած է տուեալ օրինագիծին մէջ: Հելլէն խորհրդարանին կողմէ ընդունուած օրէնքին համաձայն՝ Յունահայոց թեմը այսուհետեւ ճանաչում կը ստանայ՝ իբրեւ առաջնակարգ մակարդակի «Եկեղեցական իրաւական անձ» («Առաջնորդարան Յունաստանի Ուղղափառ Հայոց, Եկեղեցական Իրաւական Անձ» բնորոշումով):
Օրինագիծի քննարկման նախորդած ժամանակամիջոցին, խորհրդարանի յանձնաժողովի նիստին յատուկ հրաւէրով ներկայացան Յունահայոց Ազգային վարչութեան կողմէ Ստեփան Փափազեանը, իսկ հայ համայնքին կողմէ՝ Քերոբ Էքիզեանը, որոնք պարզեցին Յունահայոց թեմի դիրքորոշումներն ու պահանջները:
Յայտնենք, թէ նոր օրէնքին համաձայն՝ կրօնական համայնք մը «Եկեղեցական իրաւական անձ» նկատուելու համար, անհրաժեշտ նախապայման է, որ անոր մաս կազմեն առնուազն երեք Կրօնական իրաւական անձեր: Յունահայոց թեմի պարագային, օրէնքի թիւ 12.5.դ յօդուածին համաձայն, իբրեւ Ազգային առաջնորդարանին ենթակայ ուրոյն Կրօնական իրաւական անձ կը ճանչցուին Աթէնքի, Նէոս Քոզմոսի, Քոքինիոյ, Թեսաղոնիկէի, Քաւալայի, Քսանթիի, Քոմոթինիի, Ալեքսանտրուպոլսոյ եւ Տիտիմոթիխօ-Օրէսդիատայի եկեղեցիները, որոնք առանձին կը յիշատակուին:
Օրէնքը ի զօրու պիտի դառնայ պետութեան պաշտօնաթերթին՝ «ՖԷՔ»ի մէջ հրատարակուելէ ետք, որմէ ետք առաւելագոյնը մէկ տարուան ընթացքին, պէտք է ամբողջացած ըլլան իրաւական բոլոր ձեւակերպումները ու թեմի նոր կանոնագրութիւնը։
Հելլէն մամուլը կ՛անդրադառնայ տուեալ օրինագիծի որդեգրման՝ նշելով, թէ այս քայլը կ՛ողջունեն Վատիկանի եկեղեցին, Եկեղեցիներու համաշխարհային խորհուրդը ու շարք մը եւրոպական պետութիւններ, որոնք անհրաժեշտ յառաջդիմութիւն կը նկատեն երկրէն ներս որդեգրուած սոյն օրինագիծը՝ դիտել տալով, թէ անիկա մեծապէս կը սատարէ կրօնքի ու մարդոց իրաւունքներու պաշտպանման հարցերուն եւ կ՛ապահովէ կրօնական համայնքներու գոյութիւնը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top