Հարցազրոյց Շուէտի Խորհրդարանի Փոխնախագահ Իզապէլ Տինկիզեանի Հետ

Շուէտի պատմութեան մէջ առաջին անգամ ըլլալով, ընտրուած էր օտար ծագումով (ոչ շուէտացի)իրաքահայ Իզապէլ Տինկիզեան, իբրեւ խորհրդարանի փոխնախագահ:
«Հայերն Այսօր»ը թարգմանած է Տինկիզեանի հետ «Ալ-Քոմպիս» շուէտական-արբական կայքի ստորեւ ներկայացուած հարցազրոյցը.

ՀԱՐՑՈՒՄ.- Պատմեցէք, խնդրեմ, ինչպէ՞ս գաղթած էք Շուէտ։
ԻԶԱՊԷԼ ՏԻՆԿԻԶԵԱՆ.- Հօրս աշխատանքին պատճառով տեղափոխուեցանք Շուէտ, Պաղտատի մէջ հայրս կ՛աշխատէր շուէտական ընկերութեան մը մէջ, առաջարկ ստացաւ աշխատելու Շուէտի մէջ. ան լաւ կը տիրապետէր անգլերէն լեզուին, հետեւաբար կ՛աշխատէր Շուէտի եւ Մերձաւոր Արեւելքի երկիրներու հետ, իբրեւ միջնորդ ինքնաշարժներու ընկերութեան մը: 1965 թուականին ընտանեօք գաղթեցինք Շուէտ:

ՀԱՐՑՈՒՄ.- Ե՞րբ սկսաք զբաղելու քաղաքականութեամբ։
ԻԶԱՊԷԼ ՏԻՆԿԻԶԵԱՆ.- Ես մեծցած եմ Մալմօ քաղաքին մէջ , այնտեղ չէի զբաղեր քաղաքականութեամբ, 1989ին մայրաքաղաք Սթոքհոլմ փոխադրուեցայ աշխատելու, 1998ին Պոթքիրքա քաղաքի քաղաքապետարանի խորհուրդի անդամ ըլլալէս ետք, 2006ին կուսակցութեան կողմէ առաջադրուեցայ խորհրդարանական ընտրութիւններուն, ուստի, քուէարկութեան արդիւնքով, ընտրուեցայ խորհրդարանի անդամ:

ՀԱՐՑՈՒՄ.- Ինչո՞ւ որոշեցիք զբաղիլ քաղաքականութեամբ։
ԻԶԱՊԷԼ ՏԻՆԿԻԶԵԱՆ.- Ես միշտ ձեւով մը եղած եմ ըմբոստ, չեմ ընդունած անարդարութիւնը, ընտանիքիս մէջ յայտնաբերած էի տղու եւ աղջկայ միջեւ խտրականութիւնը, ապա՝ ընկերութեան եւ ամբողջ աշխարհի մէջ: Մի մոռնաք, որ մինչեւ հիմա կանայք չեն ստանար նոյն աշխատավարձը, զոր կը ստանան տղամարդիկ:
Առկայ մորթի գոյնի խտրականութենէն բացի, Շուէտի մէջ կայ շուէտական անուն չկրողներուն դէմ խտրականութիւն, անկախ անկէ, թէ մարդը կը խօսի շուէտերէն շատ լաւ կամ ունի բարձր աստիճանի վկայական:
Ես կ՛ուզեմ պայքարիլ մեր ընկերութեան մէջ առկայ բոլոր տեսակի անարդարութիւններու եւ խտրականութեան դէմ եւ աշխատիլ ստեղծել աւելի գեղեցիկ կեանքի հնարաւորութիւն:

ՀԱՐՑՈՒՄ.- Արդեօք Բնապահպանութիւն կուսակցութի՞ւնը որոշեց ձեզ եւ միւս թեկնածուները առաջադրել այս պաշտօնին:
ԻԶԱՊԷԼ ՏԻՆԿԻԶԵԱՆ.- Անձամբ կը կարծեմ, որ կուսակցութիւնը կարեւորեց օտար արմատներ ունեցող մէկը ներկայացնելու հարցը, նաեւ չմոռնանք քաղաքականութեան մէջ իմ ունեցած փորձառութիւնը, որ նոյնպէս ազդեց ընտրութեան, քանի որ այդ հարցին մէջ առաւելապէս մեծ դեր ունի փորձառութիւնը, քան քաղաքականութեան տեսական ուսումնասիրութիւնը:
Ես կը կարծեմ, որ կան շարք մը այլ գործօններ այս պաշտօնին ընտրուելուս մէջ, քանի որ կուսակցութեան անդամներուն մեծամասնութիւնը նոր մտած է դատախազութեան խորհուրդ, մինչդեռ ես եւ Կանաչներ կուսակցութեան երեք անդամները 8 տարուան փորձառութիւն ունինք խորհրդարանին մէջ (երկու յաջորդական խորհրդարանական յանձնաժողովներ), եւ գիտելիքներս այդ ուղղութեամբ հարուստ են։

ՀԱՐՑՈՒՄ.- Ձեր ընտանիքը երկար ատեն է, որ Շուէտ տեղափոխուած է. տան մէջ ի՞նչ լեզուով կը խօսիք։
ԻԶԱՊԷԼ ՏԻՆԿԻԶԵԱՆ.- Երբ Իրաքէն գաղթեցինք, երեխաներ էինք, եւ մեզի համար հնարաւոր չէր սորվիլ արաբերէն. տան մէջ ընտանիքիս հետ հայերէն կը խօսիմ։
Ծնողներս արաբերէնը կ՛օգտագործէին, երբ ուզէին բան մը խօսիլ, որ մենք չհասկնանք. անիկա իրենց գաղտնի խօսակցութիւններու լեզուն էր, այդ իսկ պատճառով ինծի համար հետաքրքրական էր սորվիլ արաբերէնը, եւ ես խնդրեցի արաբ ընկերներէս, որ արաբերէն սորվեցնեն ինծի. հիմա շատ լաւ կը հասկնամ, բայց պէտք է աւելի շատ խօսիմ, որ կարենամ կատարելագործել զայն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top