Յասմիկ Շահինեանի «Այն Օրը, Երբ…» Մանկական Գիրքի Շնորհահանդէսը Լիբանանի Մէջ

Կազմակերպութեամբ Համազգայինի Լիբանանի Շրջանային վարչութեան, Կիրակի, 22 Փետրուարին երեկոյեան, Համազգայինի «Լեւոն Շան»չ կեդրոնի «Գ. եւ Հ. Արմէնեան» սրահին մէջ տեղի ունեցաւ Յասմիկ Շահինեանի հեղինակած «Այն Օրը, Երբ…» մանկական գիրքի շնորհահանդէսը:
Բացման խօսքը կատարեց Սիլվա Քիւրքճեան, որ բարի գալուստ մաղթելէ ետք ներկայ փոքրիկներուն, բացատրեց Համազգայինի նախաձեռնութեան պատճառը եւ հրաւիրեց փոքրիկները ըմբոշխնելու Յասմիկ Շահինեանի հեղինակած «Այն Օրը, Երբ…» գիրքը:
Բացման խօսքէն ետք, Սօսէ Ճինպաշեան մանուկներուն հասկնալի ոճով ներկայացուց մանկական գրականութեան կարեւորութիւնը եւ ազդեցութիւնը երեւակայութեան ու հոգեկան աշխարհին վրայ՝ ներկայացնելով մանկական գրականութեան սեռերը, ինչպէս նաեւ օրինակներ տալով մէջբերումներ կատարեց անոնց մասին:
Գեղարուեստական յայտագիրով հանդէս եկան Համազգայինի «Բ. Կանաչեան» երաժշտանոցի աշակերտներ Սելա Սուաքճեան եւ Կասիա Լեւոնեան:
Ապա Լենա Արապօղլեան կատարեց գիրքին վերլուծումը՝ նշելով, որ գիրքը կը յատկանշուի իր պատկերաւոր ոճով, պատկերազարդ կողքով եւ կարճ ու հասկնալի նախադասութիւններով:
Արապօղլեան յայտնեց, որ պատմուածքներուն կարճ ու թէեւ անջատ, սակայն նոյն դերակատարներով իրարու կապուած ըլլալը յաւելեալ յատկանիշ մըն է՝ երեխաները չյուսահատեցնելու համար: «Իւրաքանչիւր պատմուածքի մէջ կատարուած չարաճճիութիւնը միշտ ալ անուղղակի, սակայն դաստիարակիչ աւարտ մը ունի», ըսաւ Արապօղլեան, յաջողութիւն մաղթելով Յասմիկ Շահինեանին եւ մաղթելով, որ յետագային պատանեկան գրականութիւնը եւս բարգաւաճի:
Ապա Համազգայինի «Արեգ» թատերական դպրոցի աշակերտներէն Անժէլինա Սարգիսեան, Մանէ Թորոյեան եւ Ռիթա Գասպարեան ներկայացուցին գիրքէն հատուածներ:
Արա Ազատ ներկայ մանուկներուն բացատրեց մանկական գիրքերու նկարազարդումի արուեստը՝ կեդրոնանալով յատկապէս մանկական գրականութեան մէջ տեղ գտած գծագրական գործերուն վրայ: Ան ներկաներէն կամաւորներ հրաւիրեց բեմ եւ օրինակներ տալով բացատրեց, թէ ինչպէ՛ս տարբեր գործեր կը դիտուին մանուկներու եւ չափահասներու դիտանկիւնէն:
Ձեռնարկի աւարտին խօսք առաւ «Այն Օրը, Երբ…» գիրքի հեղինակ Յասմիկ Շահինեան, որ «փաուըր փոյն»չով ներկայացուց գիրքին պատրաստութեան անցած հանգրուանները՝ գաղափարի յղացումէն մինչեւ հրատարակչատան եւ տպագրական մանրամասնութիւնները:
Շահինեան շնորհակալութիւն յայտնեց Համազգայինի Լիբանանի Շրջանային վարչութեան կատարած նախաձեռնութեան համար եւ իր ուրախութիւնը յայտնեց մանուկներուն ցուցաբերած ուշադրութեան համար: Շահինեան նաեւ մակագրեց գիրքէն օրինակներ:
Նշենք, որ «Այն Օրը, Երբ…» մանկական գիրքին նկարազարդումի գործը կատարած է սպանացի նկարազարդող Տաւիտ Փինթոր:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top