Խօսք՝ Հալէպահայութեան Մասին

0519mary

0519mary

ՄԱՐԻ ՄԵՐՏԽԱՆԵԱՆ

Հալէպը ճգնաժամ կ՛ապրի, եւ հալէպահայերը դարձեալ շատերու ուշադրութեան առարկան են: Մամուլի եւ համացանցի մէջ տարաբնոյթ կարծիքներ կը հնչեն այս մասին. այնքան շատ, որ երբեմն կը խուսափինք կարդալ:
Կասկած չունիմ, որ շատեր անկեղծ սրտցաւութեամբ եւ մտահոգութեամբ կը մօտենան այս հարցին: Ոմանց նպատակներուն եւ դրդապատճառներուն վերապահութեամբ կը մօտենամ. սակայն…
Այս ակնարկիս հիմնական պատճառը հալէպահայ համայնքի ղեկավարութեան հասցէին հնչած ամբաստանութիւններն են:
Եթէ դուք այդպէս մտածողներէն էք, կը խնդրեմ որ չշարունակէք կարդալ…
Անցնող 4 տարիներուն հալէպահայութիւնը անկանխատեսելի բազմաթիւ դժուարութիւններու եւ կացութիւններու դիմաց գտնուեցաւ: Այսօր, հաւանաբար, այդ դժուարութիւններու ամէնէն ծանրը կ՛ապրի այս համայնքը:
Բայց, ի պատիւ այնտեղ մնացող պատասխանատուներուն, հալէպահայութեան համայնքային կեանքը կը շարունակուի: Այստեղ միութենական-հաւաքական կեանքը նկատի չունիմ…
Նկատի ունիմ համայնքի անդամներուն կենցաղային եւ ապահովական կարիքներուն քիչ թէ շատ հասնելու պարագան: Աստուած չընէ, որ այլ գաղութներ ալ նման վիճակի մէջ յայտնուին. կը կասկածիմ, որ կրնան դիմանալ եւ գլուխ պահել:
Ոմանք կը կարծեն, որ այդ պատասխանատուները «փառք» վայելելու համար համայնք «կը պահեն»: Տեսակէտ է, ի հարկէ: Իսկ ես համոզուած եմ, որ անոնք բոլորովին այլ պատճառներով կը շարունակեն իրենց աշխատանքը: Ի վերջոյ, եթէ կարգ մը յոռետեսներու սենարիոյին համաձայն, վտանգը ուղղակի հայերուն հասնի, չեմ կարծեր, որ դիմացինը «պատասխանատուները» եւ «համայնքապետերը» պիտի խնայէ: Իմ ընկերներէս եւ ծանօթներէս շատեր իրենց զաւակներով եւ ընտանիքներով դեռ Հալէպ կը մնան եւ ամէն անգամ, երբ նման անտեղի քննադատութեան հանդիպիմ, անոնց փոխարէն ես կը նեղուիմ: Չի բաւեր որ անոնք սեփական ընտանիքի հոգերու կողքին նաեւ հաւաքականութեան բեռը կը տանին, դեռ ալ քննադատութիւն պիտի լսեն եղեր… Արդար չէ: Ճիշդ կամ սխալ. այդ խումբը պատմական իր պատասխանատուութիւնը կը կատարէ: Արեան բաղնիքին մէջ, անգոյն, անդէմ հոսանքներու մէջ կողմնորոշուիլը դիւրին չէ:
Մտահոգներս կրնանք մեր մտահոգութիւնները եւ նկատածները կողմնակի հասցնել իրենց:
Հալէպահայութեան օգնել ցանկացողները առանց այս բարձրագոչ «իմաստութիւններ»ուն ալ կրնան իրենց գործը ընել, առանց «հաւաքական որոշումի բացակայութեան» պատճառաբանութեան… արդէն հազար անգամ ըսուեցաւ, որ Հալէպ մնալ-չմնալու որոշումը անձնական է: Եթէ դուք գիտէք եւ կրնաք հասնիլ անհատներու, որոնք կը ցանկան, սակայն նիւթական պատճառներով չեն կրնար դուրս գալ այդ քաղաքէն, խնդրեմ՝ օգնեցէք: Բայց ձգեցէք, որ մարդիկ առանց յաւելեալ ծանրութեան աշխատին:
Ես, ի տարբերութիւն ոմանց, շնորհակալութիւն պիտի յայտնեմ հալէպահայութեան կեանքին մէջ իրենց բաժինը ունեցող ծանօթ եւ անծանօթ ամէն մէկ անհատի:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

Top