Օպամա Երկրի Քաղաքական Մթնոլորտը Բարելաւելու Կոչ Ըրաւ

ՈՒԱՇԻՆԿԹԸՆ, «Ռոյթըրզ».- Միութեան վիճակին մասին տարեկան ելոյթին մէջ, նախագահ Պարաք Օպամա Յունուար 12ին, ընդհանրապէս լաւատես ճառախօսութեան մը ընթացքին քննադատեց բոլոր անոնք, որոնք «Իսլամական պետութեան» ահաբեկչութեան տեղի տալով՝ հակաիսլամ քարոզչութիւն կը կատարեն, վնաս հասցնելով ամերիկեան արժէքներուն։ Օպամայի գլխաւոր թիրախը հանրապետականներու նախագահական գլխաւոր թեկնածու Տանըլտ Թրամփն էր, որուն անունը չնշուեցաւ ելոյթին ընթացքին։

Օպամա նաեւ կոչ ըրաւ օրէնսդիրներուն, որ երկրի քաղաքական մթնոլորտը բարելաւելու համար վերջ տան միջկուսակցական վէճերուն, որոնք կ՛անդամալուծեն կառավարութիւնը։ Ան խստօրէն դատապարտեց անհանդուրժողութիւնը՝ ցաւ յայտնելով, որ իր պաշտօնավարութեան ընթացքին ցարդ չէ կրցած երկրին քաղաքական մթնոլորտը բարելաւել, մինչ կուսակցութեանց միջեւ լարուածութիւնը աւելի սրած է։

Օպամա անհիմն համարեց այն պնդումները, թէ երկրին տնտեսութիւնը նահանջի մէջ է՝ լուսարձակի տակ առնելով իր պաշտօնավարութեան օրերուն արձանագրուած տնտեսական իրագործումները։

Միւս կողմէ, Սպիտակ տունը, անդրադառնալով Ներկայացուցիչներու տան հանրապետական ղեկավարութեան կողմէ՝ Իրանի հիւլէական ծրագիրին վերաբերեալ կնքուած համաձայնագիրին իրականացումը խանգարող օրինագիծը օրակարգի վրայ բերուելու որոշումին՝ յայտարարեց, որ Օպամա մտադիր է վեթոյի ենթարկելու զայն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top