Այս Հզօր Համայնքը

apo-oreorin

ԱԲՕ ՊՈՂԻԿԵԱՆ

 

apo-oreorinԼոս Անճելըսի հայ համայնքը բնութագրելու փորձ մը ընենք:

Թիւի մասին տարբեր գնահատականներ կան. ոմանք աւելի տրամաբանական, ուրիշներ՝ աւելի զգացական հաշուարկումներով:

Համազգային նշանակութեամբ հանգանակային ձեռնարկներուն տպաւորիչ մասնակցութիւնը՝ սկսելով Հայաստան Համահայկական հիմնադրամի թելեթոնէն, մինչեւ Սուրիոյ հայութեան օժանդակութեան հանգանակութիւնները, եւ անոնց տրուած իսկական համահամայնքային ուշադրութիւնը,

Հայաստանի եւ Արցախի մէջ տնտեսական եւ բարեսիրական լայն, բազմատեսակ ու բազմակողմանի գործունէութիւնը, որուն լծուած են ոչ միայն յայտնի կազմակերպութիւններու միութիւններ, այլեւ սեփական նախաձեռնութիւններով ճամբայ ելած փոքր խումբեր, շրջանակներ…,

Ջաւախքի հանդէպ պարտաւորութիւն ստանձնելու պատրաստակամութիւնը,

Ազգային պահանջատիրական պայքարի քաղաքական, քարոզչական ու ցուցական աշխատանքներուն մէջ գործօն ու լայնածաւալ ներկայութիւնը,

Ազգային վարժարաններու աշակերտութեան տարեկան ուխտագնացութիւններով, երիտասարդութեան աշխատանքային, կամաւորական ծրագիրներով, բանակումներով ու մարզախաղերով երիտասարդութիւնը դէպի երկիր առաջնորդելու գովելի ճիգերը,

Մասնագիտական խորհրդաժողովներու որակական եւ թուական բարձր մասնակցութիւն բերելու նախանձախնդրութիւնը,

Հայաստանի ընկերային կեանքին ամէնօրեայ, կեդրոնացուած ուշադրութեամբ հետեւելու, հայրենիքի դժուարութիւններուն ու իրագործումներուն անմիջականօրէն արձագանգելու աւանդութիւնը,

Ներհամայնքային համագործակցութեան մթնոլորտը ամրապնդելու գիտակից ու հետեւողական ճիգերը, մրցակցութեան մոլուցքը թեւաւորելու եւ այդ ճամբով միութենական աշխուժութիւնը խթանելու փոխարէն՝ փոխհասկացողութեան, փոխզիջումին գերապատուութիւն տալու գրեթէ ընդհանրացած վարքագիծը…

Այս բոլորը իւրայատուկ նկարագիր մը կու տան Լոս Անճելըսի համայնքային պատկերին, ուր զարմանալի յաճախակիութեամբ կողք կողքի կանգնած կը տեսնուին պատասխանատու դիրքերու վրայ կանգնած քաղաքական, հոգեւոր, մշակութային եւ հասարակական գործիչները:

Համայնքը, որ իր հզօրութեան ապացոյցը քանիցս տուաւ վերջերս, աւելի՛ն իրագործելու բոլոր տուեալները ունի։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top