Սթիվըն Հոքինկի Աշխարհայեացքը Ձեւաւորած Է Իր Հայ Ուսուցիչը

0310stephen-hawking

0310stephen-hawking ԵՐԵՒԱՆ, «ՓանԱրմինիըն».- Հանրաճանաչ բրիտանացի տիեզերաբան եւ բնագէտ Սթիվըն Հոքինկ խօսած է այն մարդուն մասին, որուն շնորհիւ իրեն մէջ սէր արթնցած է գիտութեան հանդէպ: Հոքինկ հայկական ծագումով իր ուսողութեան ուսուցիչին՝ Տիգրան Թահթայի մասին պատմած է «Global Teacher Prize» կայքով հրապարակուած իր ուղերձին մէջ, նոյնանուն մրցանակաբաշխութեան առիթով։

Ռուսական «Լենթրա» կայքին համաձայն՝ Հոքինկ գրած է. «Շնորհիւ պարոն Թահթայի, ես դարձայ Քէյմպրիճի համալսարանի ուսողութեան փրոֆեսէօր, այսինքն՝ պաշտօն մը, զոր ժամանակին Այզըք Նիութընը ստանձնած էր: Ամբողջ կեանքիս ընթացքին կը փորձեմ բացայայտել տիեզերքի գաղտնիքները: Մեզմէ իւրաքանչիւրը կը կարծէ, թէ կարեւոր իրագործումի մը կրնայ հասնիլ իր կեանքին ընթացքին, իսկ անոր մենք կրնանք հասնիլ մեր ուսուցիչներուն շնորհիւ»։

Տիգրան Թահթա Հոքինկի ուսուցիչը եղած է Անգլիոյ Հարթֆորտշիր քաղաքի Սէյնթ Ալպանզ վարժարանին մէջ եւ օժանդակած է յատկապէս Հոքինկի առաջին համակարգիչը պատրաստելու աշխատանքին:

Տիգրան Թահթա, որ ծնած է 1928ի Օգոստոս 7ին, զաւակն է հայ ընտանիքի մը, որ Անգլիոյ Մանչեսթըր քաղաքը հասած է Հայոց Ցեղասպանութենէն ետք: Ան մկրտուած է Մանչեսթըրի հայկական եկեղեցւոյ մէջ եւ անոր հայկական դաստիարակութիւնն ու կրօնքի ազդեցութիւնը նկատելի են իր գիրքերուն մէջ։

Ատոմ Էկոյեանի բեմադրած «Արարատ» ֆիլմի ազդեցութեան տակ Թահթայի հեղինակած «Արարատի Զուգորդութիւններ» հատորին մէջ, հեղինակը գրած է Արարատ լերան շնորհիւ իրեն մէջ յառաջացած բազմաթիւ զուգորդութիւններուն եւ յուշերուն մասին։

Տիգրան Թահթա նաեւ դասաւանդած է համալսարաններու մէջ եւ պատրաստած է ուսողութեան դասաւանդման նորարարական նիւթեր։ Թահթա, որ հեղինակ է 5 հատորներու եւ բազմաթիւ գիտական յօդուածներու, մահացած է 2006ին։

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top