Տիթրոյիթի Մէջ՝ Գէորգ Պետիկեանի «Դիմատետրս» Գիրքին Շնորհահանդէսը

Կազմակերպութեամբ Համազգայինի Տիթրոյիթի մասնաճիւղի վարչութեան, Կիրակի, 6 Մարտի յետմիջօրէի ժամը 2ին, Տիթրոյիթի Սուրբ Սարգիս եկեղեցւոյ սրահին մէջ, մշակութասէր ընտրանին հետաքրքրութեամբ լսեց, ապա ականատես եղաւ գրող Գէորգ Պետիկեանի «Դիմատետրս» երկին շնորհահանդէս-ողջունահանդէսին:

Պատշաճ հիւրասիրութենէ մը ետք բացման եւ բարի գալուստի խօսքը կատարեց տեղւոյն Համազգայինի վարչութեան ատենապետ Յովակիմ Մանուկեան, որմէ ետք ցուցադրուեցաւ գրագէտին կեանքը ներկայացնող տեսաերիզ մը:

Ապա ատենապետ Մանուկեան հանգամանօրէն ներկայացուց հեղինակ Պետիկեանի «Դիմատետրս» երկը, նախ՝ ներկայացնելով հատորի շարք մը պատմուածքներուն նիւթն ու ոճը, միաժամանակ շեշտելով անոնց մէջէն յատկանշուած հեղինակի՝ հասուն գրողի ու մտաւորականի վաստակը, անոր հայ լեզուի, միտքի, մշակի ու երկարամեայ ուսուցիչ-տնօրէնի վաստակին հետ առնչուող կէտերը:

Մանուկեան նաեւ ծանրացաւ Պետիկեանի ինքնատիպ ոճին, անոր, հիւմըրով խառն պարզ, թարմ եւ առողջ կերպով հայաշխարհը ներկայացնելուն, որ կը բխի իրապաշտութեան ակունքներէն:

Իրենց կարգին, գաղութի ՀՕՄի շաբաթօրեայ վարժարանի ուսուցչուհիներէն Սոնա Վանտըվըր եւ գաղութի վաստակաշատ դէմքերէն Մանուկ Տէր Յովակիմեան յաջորդաբար կարդացին, ապրեցան եւ ապրեցուցին Պետիկեանի «Դիմատետրս» գիրքէն մէկական պատմուածքներ, իբրեւ ցայտուն նմոյշ հեղինակի մտաւոր վաստակին: Թատերական բնոյթով եւ ոճով ներկայացուած երկու պատմուածքները մեծապէս գնահատուեցան ներկաներուն կողմէ:

Աւարտին, սրտի եւ շնորհակալական ու երախտագիտական յատուկ խօսքերով ելոյթ ունեցաւ հեղինակ Գէորգ Պետիկեան, որմէ ետք մակագրեց հատորէն օրինակները: Ապա ներկաները առիթ ունեցան անձամբ շնորհաւորելու հիւր մտաւորականը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top