Գէորգ Պետիկեանի «Պապիկը Կարդալ Չի Գիտեր» Հատորի Ողջունահանդէսը

0505Bedigian8

 

ԼԱ ՔՐԵՍԵՆԹԱ.- Ազգային առաջնորդարանի «Տիգրան եւ Զարուհի Տէր Ղազարեան» սրահը Հինգշաբթի, Ապրիլ 28ի երեկոյեան դարձեալ ժամադրավայրը հանդիսացաւ գրասէր հանրութեան: Առաջնորդարանի մշակութային-դաստիարակչական յանձնախումբը կազմակերպած էր ծանօթ գրող ու դաստիարակ Գէորգ Պետիկեանի նորագոյն հատորին՝ «Պապիկը Կարդալ Չի Գիտեր» գիրքի ողջունահանդէսը, հովանաւորութեամբ եւ ներկայութեամբ առաջնորդ Մուշեղ արք. Մարտիրոսեանի: Ներկայ էին նաեւ թեմիս հոգեւորականաց դասու անդամներ, Ազգային վարչութեան, Համազգայինի եւ այլ միաւորներու ներկայացուցիչներ, դաստիարակներ ու հայ գիրքի բարեկամներ:

Երեկոն սկսաւ Տէրունական աղօթքով: Յանուն կազմակերպիչ յանձնախումբին, Ղեւոնդ քհնյ. Քիրազեան ողջոյնի խօսք արտասանեց եւ հանդիպումը նկատեց մշակոյթին ու մարդկային բարձր արժէքներու հանդէպ մեր ժողովուրդի սիրոյն ու յարգանքին մէկ արտայայտութիւնը: Ան հակիրճ ծանօթութիւններ տուաւ հեղինակին մասին ու իր խօսքը աւարտեց գիրքի արժանիքներուն ու մեր ժողովուրդի կեանքին մէջ անոր բարերար դերակատարութեան մասին Արամ Ա. կաթողիկոսէն մէջբերումով մը:

Հանդիսավարն էր Ազգ. առաջնորդարանի դիւանապետ Սարգիս Մահսէրէճեան, որ ներկայացուց յայտագիրը մարմնաւորողները, հանգրուան առ հանգրուան ծանօթութիւններ տալով բանախօսին՝ դոկտ. Ալիս Քիւրիւմեանի, գիրքէն բաժիններ ընթերցող արուեստագէտ Սեդրակ Պրոնզեանի եւ հեղինակին մասին:

Ս. Պրոնզեան, գիրքի ներկայացումէն առաջ եւ ետք, դերասանի իր տաղանդը ի գործ դրաւ՝ բեմական ոճով ընթերցելով երկու պատմուածքներ, որոնք կ՛արտայայտէին հեղինակին զուարթախոհութեան յատկանիշները: Ան յաջողեցաւ մագնիսացնող մթնոլորտի մէջ ներգրաւել ունկնդիրները:

Վաստակաւոր դաստիարակ, գրականագէտ եւ լեզուագէտ դոկտ. Ալիս Քիւրիւմեան ներկայացուց գիրքի բովանդակութիւնն ու անոր էջերէն դրսեւորուող հեղինակին արժանիքները՝ նշելով, որ այս հատորը վկայութիւն մըն է այն հասկացութեան, թէ գիրքը նոյնի՛նքն հեղինակ մարդն է: Նկատի ունենալով, որ Հալէպի Ճեմարանին մէջ եղած է Գ. Պետիկեանի ուսուցիչներէն, բանախօսը հակիրճ կերպով անդրադարձաւ անոր զուարթախոհ նկարագիրին, ապա նաեւ վեր առաւ անոր գրականութեան յատկանիշները, ուր գլխաւոր գիծ է սխալներ տեսնելու եւ ծիծաղի ճամբով զանոնք սրբագրելու անոր տենդը:

Լուսաբանութիւններ տալէ ետք գիրքի ընդհանուր բովանդակութեան ու ներքին երեք բաժանումներուն մասին՝ ան նշեց, որ ամէնէն տարածուն բաժինը՝ 31 պատմուածքներն ու խոհական արտայայտութիւնները, կարելի է ըստ նիւթի դասաւորել չորս խմբաւորումներու տակ. մեծ հօր ու թոռնիկի միջեւ դրուագներ, անձնական խոհեր, ազգային խոհեր ու մտահոգութիւններ, համամարդկային հարցերու արձագանգումներ: Հեղինակը կը տագնապի հայ լեզուի նահանջով, մեր ժողովուրդի այլասերման երեւոյթներով եւ արմատներուն վերադառնալու տենդով, սակայն նաեւ՝ նոր աշխարհին մէջ մանուկն ու երիտասարդը իսկական արժէքներէ հեռու պահող վիճակներուն հետեւանքներով: Ան վեր առաւ մեր լեզուին, մշակոյթին ու հայրենիքին հանդէպ Գ. Պետիկեանի նուիրումը եւ մաղթեց, որ ան նորանոր գործերով շարունակէ իր հպարտալի երթը։

Սրտի խօսք արտասանեց հեղինակը: Ան առաջին հերթին շնորհակալութեան ու երախտագիտութեան խօսք ուղղեց առաջնորդ սրբազանին, Ազգ. վարչութեան անդամ դոկտ. Տիգրան Պապիկեանին, կազմակերպիչ յանձնախումբին, դասախօսին, արուեստագէտին, հանդիսավարին ու իրեն զօրակցող կողակիցին, ապա անդրադարձաւ Սփիւռքի մէջ ծնող ու յաճախ տեղաշարժներու ենթակայ եղող հայու վիճակներուն, կանգ առաւ գրելու իր մղումին ու գլխաւոր նպատակներուն վրայ: Ան հաստատեց, որ գիրքը լեզու է, միտք է ու շունչ, իսկ նման երեկոներ ապացոյց են, որ «գիրք» արժէքը բոլորովին անտարբերութեան մատնուած չէ. ան երախտիք արտայայտեց իր անձի կազմաւորման նպաստողներուն եւ հաւաստեց, թէ յանձնառու պիտի մնայ գրողի իր առաքելութեան:

 

«ՎԱՅԵԼՔԻ ՊԱՀ ՄԸ»

 

Գնահատանքի ու օրհնութեան իր խօսքը արտասանեց նաեւ առաջնորդ սրբազանը: Ան նկատեց, թէ երեկոն եղած է վայելքի պահ մը, գնահատանքով արտայայտուեցաւ հեղինակին ու յայտագիրը մարմնաւորողներուն մասին եւ ըսաւ, թէ իբրեւ քաջալերանքի գործնական արտայայտութիւն՝ առաջնորդարանը պատրաստ է հրատարակելու Գ. Պետիկեանի յաջորդ գիրքը: Ան յատուկ գնահատանքով խօսեցաւ դոկտ. Ա. Քիւրիւմեանի ամբողջական ու դաստիարակիչ ներկայացումին, ինչպէս նաեւ՝ Ս. Պրոնզեանի գեղարուեստական մատուցումին մասին, ապա անդրադարձաւ նոյն օրը առաւօտուն, նոյն սրահին մէջ տեղի ունեցած այլ հանդիպումի մը, ուր Ազգ. Ռոզ եւ Ալէք Փիլիպոս վարժարանի աշակերտները, նախքան Հայաստան իրենց ուխտագնացութիւնը, ուխտի եկած էին Ազգ. առաջնորդարան ու ներկայացուած էին աշակերտական մշակութային յայտագիր մը՝ խոստանալով հաւատարիմ մնալ մեր լեզուին, հայրենիքին ու հաւատքին: Առաջնորդը գնահատեց ճիգը Գ. Պետիկեանի ու բոլոր անոնց, որոնք կ՛աշխատին վերակենսաւորելու մեր արմատները, ու շեշտեց Արարատին, ճշմարտութեան ու հայկականութեան վերադառնալու հրամայականը: Ան նաեւ նշեց, որ հայրենիքէն ու աւանդական մեր օճախներէն հեռու ապրող մեր գաղութները բազմապատիկ ճիգի կը կարօտին՝ աշխատանքներու արդիւնաւորման համար, եւ մաղթեց, որ անհատական ու հաւաքական ճիգերը շարունակուին՝ անկարելին կարելի դարձնելու եւ պտղաբերելու կամքով: Ան իր խօսքը եզրափակեց՝ խրախուսելով կազմակերպիչ յանձնախումբը, որ բազմացնէ նման ձեռնարկներ:

Յայտագիրին պաշտօնական բաժինը վերջ գտաւ սրբազանի «Պահպանի»չով ու «Կիլիկիա»ի խմբերգումով:

Յանձնախումբը ծաղկեփունջեր նուիրեց հեղինակին ու յայտագիրը մարմնաւորողներուն, ներկաները պատուեց կոկիկ հիւրասիրութեամբ մը, մինչ հեղինակը կը մակագրէր գիրքէն օրինակներ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top