Կը Մերժենք

apo-oreorin

ԱԲՕ ՊՈՂԻԿԵԱՆ

 

apo-oreorinՉարլիսթընի եկեղեցւոյ մէջ հաւաքուած սեւամորթներուն թէ Օրլանտոյի միասեռականներու հաւաքավայր՝ գիշերային ակումբին դէմ մահասփիւռ յարձակումները, ցեղապաշտական հակումներով ոստիկաններու բռնութիւնները թէ կրօնի ու հաւատքի անունով անհեթեթ ահաբեկումները, բոլո՛րն ալ կը դատապարտենք, կը մերժենք հիմնովի՛ն:

Կը մերժենք ատելութեան սանձազերծած բրտութիւնը:

Կը մերժենք մարդկային արարածը ինչ որ դասակարգումով մը նսեմացնելու բոլոր փորձերը:

Կը մերժենք անմեղներ թիրախ դարձնող, վախկոտներու ու դասալիքներու հոգեկան անհաւասարակշռութեան զէնք դարձած խելագար վայրագութիւնները:

Կը մերժենք դատելու անկարողութեան մատնող, կուրացնող խտրականութիւնը՝ իր բացայայտ դրսեւորումներով թէ բարեպաշտութեան շղարշով թաքնուած կեղծիքով:

Կը մերժենք տգիտութիւնն ու նախապաշարումներ խրախուսող, զանգուածային ջղագրգռութիւն բռնկեցնող քաղաքական կամ ընտրական շահարկումները, որոնց ամէնէն տգեղ արտայայտութիւններուն ականատես կը դառնանք, բայց մեղսունակ համակերպութիւնը կեանքի սկզբունք դարձնելով՝ լռութեամբ կ՛անցնինք անոնց կողքով:

Կը մերժենք ժողովրդավարական արժէքային համակարգը գլխիվայր դարձնող, այդ արժէքներն իսկ ճնշումի ու համակերպութեան, նոյնիսկ՝ ստրկացման զէնքերու վերածող ուժի, մենաշնորհեալներու կեդրոնները, որոնք իրենց լծակից դարձուցած են պետութեան հզօր լծակները, եւ օրինականութեան շղարշին տակ՝ ամէնէն դաժան, ամէնէն քստմնելի ոճիրները կը հեղինակեն այստեղ եւ ամէնուր:

Կը մերժենք ըստ էութեան ընկերային անարդարութեանց սարդոստայնի մէջ մեզ ապրելու դատապարտող գաղափարախօսութիւնը, որուն անպարտելիութեան առասպելը սկսած է ճեղքեր ցոյց տալու, վկայ՝ վերջին նախագահական ընտրապայքարին ընթացքին երիտասարդական ընդվզումն ու պոռթկումը քաղաքական շարժումի վերածելու ամերիկեան պատմութեան մէջ աննախընթաց ճիգը, որ տակաւին արդիւնաւորուելու մեծ կարելիութիւններ ունի։

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top