Դինքի Գործով Նոր Տեսագրութիւնն Ապացուցում Է, Որ Պետութիւնը Խրուած Է Այս Յանցագործութեան Մէջ

0000Dantsigian2

0000Dantsigian2Պոլսահայ լրագրող, Ստամբուլի հայ համայնքի թերթերից «Ակօս»ի հիմնադիր եւ գլխաւոր խմբագիր Հրանդ Դինքի սպանութեան վերաբերեալ սկանդալային տեսագրութեան մասին «Ակօս»ի իր սիւնակում խօսել է թերթի ներկայիս խմբագիր Երուանդ Տանձիկեանը:

Նշենք, որ տեսանիւթիւմ նկատուող վեց սպաները, որոնք փաստացի արդէն մեղադրւում են Դինքի սպանութեան գլխաւոր պատասխանատուն լինելու համար, կասկածւում են Յուլիսի 15ի յեղաշրջման փորձի կազմակերպման համար մեղադրուող Ֆեթուլլահ Գիւլենի կազմակերպութեան հետ կապերի եւ յեղաշրջման փորձին մասնակցութիւն ունենալու համար:

Տանձիկեանն իր յօդուածում զարմանք է յայտնել, թէ ինչո՛ւ են այս տեսանիւթերը համացանցում յայտնուել հէնց հիմա, եւ արդեօք տեսագրութիւնները հրապարակած իշխանամէտ մամուլի նպատակը գործի բացայայտո՞ւմն է, թէ ոճրագործութիւնը միայն գիւլենականների վրայ բարդելը:

Տանձիկեանի յօդուածը ներկայացնում ենք ստորեւ.

Շաբաթուայ սկզբին իշխանամէտ մամուլում յայտնուեցին Հրանդ Դինքի սպանութեան գործին առնչուող տեսանիւթեր: Այս տեսանիւթերում տեսնում ենք ժանդարմերիայի հետախոյզներին «Ակօս»ի խմբագրութեան մօտակայքում ազատ շրջելիս: Այս տեսանիւթերի՝ համացանցում յայտ-նուելուն զուգահեռ՝ Դինքի սպանութեան գործը կրկին սկսեց քննարկուել մամուլում:

Նախեւառաջ պէտք է արձանագրել հետեւեալը. տեսանիւթերը պատմում են այն մասին, որ պետութիւնը մինչեւ կոկորդը խր-ուած է այս յանցագործութեան մէջ: Սա ակնյայտ է: Սա մենք ասում ենք Դինքի սպանութիւնից ի վեր: Ի՞նչ իմաստ է իր մէջ պարունակում այս տեսանիւթերի հէնց հիմա հրապարակուելը:

Պէտք է ասել, որ այս տեսանիւթերի գոնէ մի մասի առկայութիւնը յայտնի էր տարիներ շարունակ: Այսինքն՝ խօսքը միանգամայն վերջերս յայտնուած տեսագրութիւնների մասին չէ: Պարզապէս դրանք նոր են հրապարակւում: Նորութիւնը հէնց դրանց հրապարակումն է:

Միւս նորութիւնը սպանութեան օրը նրանց ունեցած հեռախօսազանգերի բացայայտումն է: Այս ամէնից մեր մտքին առաջին հերթին այս հարցն է գալիս. այս ամէնը բացայայտելու համար ինչո՞ւ են սպասել շուրջ 9 տարի:

Իշխող կուսակցութեան շրջանակների պատասխանն այս հարցերին հաւանաբար սա է լինելու՝ «գիւլենականներին նոր ենք բացայայտել», կամ էլ «գիւլենականները խոչընդոտում էին, որ անենք»:

Սրանք, անշուշտ, համոզիչ արդարացումներ չեն: Այս սպանութիւնը բացայայտելու համար տարիներ շարունակ մեծ ջանքեր են գործադրւում: Դինք ընտանիքը, ընտանիքի փաստաբանները, մարդու իրաւունքների պաշտպանները, Հրանդի ընկերները եւ, ի վերջոյ, միջազգային շրջանակները տարիներ շարունակ պահանջում են այս սպանութեան արդար բացայայտումը: Մէկ էլ, սպանութիւնից անմիջապէս յետոյ կառավարութեան կողմից տր-ուած «նամուսի» խոստումը կայ:

0000Dantsigian1 Բայց, չնայած այս ամէնին, այս տեսագրութիւնները թաքցուեցին:

Այժմ՝ տեսագրութիւնների յայտնուելուց անմիջապէս յետոյ, իշխանամէտ մամուլն այս յանցագործներին ներկայացնում է որպէս գիւլենականներ: Գուցէ եւ այդպէս է: Չենք կարող իմանալ:

Մինչդեռ այստեղ երկու հարց կայ, որին ահրաժեշտ է գտնենք յստակ պատասխաններ:

Ժանդարմերիայի այդ աշխատակիցների այնտեղ լինելն ո՞ւմ հրամանն էր: Եւ եւս մի հարց, որ պակաս կարեւոր չէ՝ իսկ եթէ այս անձինք բոլորը չէ, որ կապ ունեն գիւլենականների հետ… Այս երկրորդ հարցի պատասխանն աւելի մեծ կարեւորութիւն ունի: Եւս մէկ անգամ եմ կրկնում՝ հնարաւո՞ր է, որ այս անձանցից ոչ բոլորն են, որ կապ ունեն գիւլենականների հետ: Սակայն, վերը նշածս միջավայրում շատ հնարաւոր է, որ ձեռնարկուի «սեւացնելու» գործողութիւն, եւ միւս մասնակիցներն էլ գիւլենականների անուան տակ անցկացուեն:

Ինչպէս գիտենք, այս պետութիւնն այդպիսի գործողութիւններ իրականացնելու հարցում վարպետ է: Եւ վերջապէս ուղղեմ հետեւեալ հարցը. այս ոճրագործութիւնն այս կամ այն պատճառով 9 տարի շարունակ կոծկել յաջողած պետութիւնն ինչպիսի՞ պետութիւն է…»:

 

«ԱԿՈՒՆՔ»

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top