Դոկտ. Քլոտ Մութաֆեան Պիտի Խօսի Արցախի Տագնապի Արմատներուն Մասին

0000claude-Moutafian

 

0000claude-Moutafian

 

ՇԸՐՄԸՆ ՕՔՍ.- Կազմակերպութեամբ Հայաստանի համար վերլուծութեանց, ուսումնասիրութիւններու եւ ծրագրումի «Արփա» հիմնարկին, Հինգշաբթի, Ապրիլ 6ին, երեկոյեան ժամը 7։30ին, ֆրանսահայ յայտնի գիտնական ու պատմաբան դոկտ. Քլոտ Մութաֆեան պիտի բանախօսէ Արցախի տագնապի արմատներուն մասին։

Դոկտ. Մութաֆեան պիտի կեդրոնանայ յատկապէս Ատրպէյճանի պետական մակարդակով տարուող ապատեղեկատուական արշաւին՝ գիտական փաստերով դէմ դնելու կարեւորութեան վրայ։ Պաքուի նպատակը միշտ եղած է «փաստ»եր հնարել՝ փորձելով աշխարհը համոզել, թէ Արցախը ատրպէյճանական հող եղած է։ Մութաֆեան պիտի քննարկէ յատկապէս հետեւեալ հարցումները.

– Ուրկէ՞ եկած է «Ատրպէյճան» անունը.

– «Ատրպէյճան» անունը ե՞րբ սկսած է օգտագործուելու իբրեւ Արաքս գետէն դէպի հիւսիս գտնուող տարածքին անունը.

– Որո՞նք են ալանները, Աղուանքի ժողովուրդը կամ կովկասեան ալպանացիները, որոնք Ատրպէյճանի կողմէ կը ներկայացուին իբրեւ իր նախնիները.

– Ի՞նչ է Շուշիին դերը հայ մշակոյթի պատմութեան մէջ.

– Արցախի ժողովրդագրութիւնը ինչպիսի՞ փոփոխութիւններու ենթարկուած է։

Փարիզի արուարձաններուն մէջ ծնած դոկտ. Մութաֆեան, որուն ծնողները Հայոց Ցեղասպանութենէն վերապրողներ էին, մասնագիտացած է ուսողութեան ճիւղին մէջ եւ մօտաւորապէս 40 տարի ուսողութիւն դասաւանդած է Ֆրանսայի եւ աշխարհի տարածքին գտնուող զանազան համալսարաններու մէջ։ Սակայն, ան միշտ յատուկ սէր ունեցած է պատմութեան նկատմամբ եւ անկէ մղուած՝ ուսումնասիրած ու հրատարակած է Հայաստանի նուիրուած շարք մը հատորներ, կազմակերպած է ցուցահանդէսներ՝ «Սորպոն» համալսարանի, Վատիկանի եւ զանազան այլ սրահներու մէջ: Ան մասնագիտացած է յատկապէս միջնադարեան պատմութեան մէջ ու 60 տարեկանին ստացած է պատմութեան ճիւղին մէջ իր դոկտորան՝ իբրեւ աւարտաճառ ունենալով Հայկական Կիլիկիան:

Դասախօսական ձեռնարկը տեղի պիտի ունենայ Մերտինեան վարժարանի «Արամ եւ Անահիս Պուլղուրճեան» սրահին մէջ (13330 Riverside Dr. Sherman Oaks, CA 91403):

Յաւելեալ տեղեկութեանց համար, դիմել դոկտ. Յակոբ Փանոսեանին՝ (818) 453-0618 թիւով կամ info@ARPAInstitute.org հասցէով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top