Ֆրեզնոյի ՀՅԴ «Սողոմոն Թեհլիրեան» Կոմիտէութեան Վերանորոգուած Ակումբի Հանդիսաւոր Բացում

0000Fresno center9

 

ՍԱՐԳԻՍ ՓԱՆՈՍԵԱՆ

Շաբաթ, Մարտ 11ին տեղի ունեցաւ Ֆրեզնոյի ՀՅԴ «Սողոմոն Թեհլիրեան» կոմիտէութեան վերանորոգուած ակումբին հանդիսաւոր բացումը՝ ներկայութեամբ Կիլիկիոյ աթոռի Արեւմտեան թեմի առաջնորդ Մուշեղ արք. Մարտիրոսեանի, ՀՅԴ Արեւմտեան Ամերիկայի Կեդրոնական կոմիտէի ներկայացուցիչ Տարօն Տէր Խաչատուրեանի եւ իրեն ընկերակցող Կեդր. կոմիտէի այլ ընկերներու, Ֆրեզնօ գաւառի վերահսկիչ խորհուրդի ներկայացուցիչ Անդրէաս Պորկեզի ու մեծ թիւով այլ պետական ներկայացուցիչներու, Լոս Անճելըսի եւ շրջանի ընկեր-ընկերուհիներու, միութիւններու ներկայացուցիչներու, համակիրներու եւ աւելի քան 400 մասնակիցներու:

Ճշդուած ժամանակին, սրբազան հայրը՝ ընկերակցութեամբ Աշոտ քհնյ. Գամպուրեանի եւ սարկաւագներու, կատարեց Անդաստանի արարողութիւնը, որմէ ետք տէր եւ տիկին Կարօ եւ Ալիս Կիւրեղեան ամոլը հատեց ժապաւէնը, իսկ դրան մուտքին անհամբեր սպասող բազմութիւնը՝ «ի՜նչ սիրուն է, ի՜նչ աղուոր է» բացագանչութիւններով մտաւ ներս եւ սեղաններուն շուրջ բազմելով՝ գոհունակութեան ժպիտով զննեց շրջապատը ու իր զգացումները արտայայտեց՝ գոչելով. «Ապրի՛ն մեր երիտասարդ-երիտասարդուհիները»:

Շրջանիս ՀՄԸՄի «Սասուն» մասնաճիւղի սկաուտները կատարեցին դրօշակի արարողութիւն։ Ապա, հանդիսավար Տաթեւիկ Էքիզեան հրաւիրեց Աստղիկ Աճէմեանը, ամերիկեան եւ հայկական քայլերգները կատարելու։ Ան բարձր զգացումով ու հաճելի ձայնով մեկնաբանելէ ետք քայլերգները՝ ներկաներու բուռն ծափահարութեան արժանացաւ:

Սրբազանը, բեմ հրաւիրուելով՝ կատարեց սեղաններու օրհնութիւնը եւ ակումբի բացման առիթով իր սրտի խօսքը փոխանցեց, մաղթելով, որ վերանորոգուած այս ակումբը վերանորոգէ նաեւ մեր ներկայ սերունդի սրտերն ու հոգիները՝ անցեալի մեր պապերուն ապրելու ու գործելու ոգիով:

Հանդիսավար Էքիզեան հերթական կերպով բեմ հրաւիրեց յայտագիրի մասնակից անձնաւորութիւնները, որոնք իրենց ուրախութիւնն ու զգացումները արտայայտելով՝ արժանացան հիւրերու ծափողջոյններուն:

Անդրէաս Պորկեզ, իր եւ ընկերներուն անունով ուրախութիւն յայտնեց այս գեղեցիկ հանդիսութեան գտնուելուն համար, եւ մաղթեց, որ այս վերանորոգուած տունը համախմբէ հայ ազգին նորահաս սերունդը:

Իր կարգին, Րաֆֆի Շխրտմեան, ձեռնարկի   յանձնախումբին անգլերէն խօսքը արտասանելէ ետք, բարի գալուստի խօսք ուղղեց նաեւ պետական հիւրերուն, ապա ակումբի աշխատանքներուն մասին պատմական տեղեկութիւններ փոխանցեց:

Հուսկ, բեմ հրաւիրուեցաւ Խաչիկ Հաւաթեան, «Սողոմոն Թեհլիրեան» կոմիտէին խօսքը յայտնելու համար։ Ան կոմիտէին անունով շնորհակալութիւն յայտնեց սրբազան հօր, որ սիրայօժար ընդունած էր կոմիտէին հրաւէրը, եւ աւելցուց. «Սրբազանին ներկայութիւնը այս հանդիսութեան, մեզի եւ գաղութիս համար մեծ ուրախութիւն է, աւելի գօտեպնդուելու եւ կառչելու համար մեր ազգանուէր աշխատանքին»: Ան շնորհակալութեան խօսք ուղղեց նաեւ Կեդր. կոմիտէի ներկայացուցիչ Տարօն Տէր Խաչատուրեանին եւ իրեն ընկերակցողներուն, ինչպէս նաեւ բոլոր հրաւիրեալներուն, միութիւններու ներկայացուցիչներուն, ընկեր-ընկերուհիներուն եւ բոլոր անոնց, որոնք բարոյապէս օժանդակեցին ու նիւթական իրենց լուման դրին «ազգային գանձանակ»ին մէջ:

«Հոս կ՛ուզենք «Սողոմոն Թեհլիրեան» կոմիտէին կողմէ շնորհակալութեան խօսք արտասանել Կարօ եւ Ալիս Կիւրեղեան ամոլին՝ իր իշխանական նուիրատուութեան համար, եւ հրապարակաւ կ՛ուզենք յայտարարել, թէ այս թուականէս սկսեալ՝ 11 Մարտ 2017, «Ասպարէզ» կեդրոնը պիտի կոչուի նուիրատուներուն անունով՝ «Կարօ եւ Ալիս Կիւրեղեան Մշակութային Կեդրոն»», ըսաւ ան:

Հաւաթեան նաեւ տեղեկութիւններ փոխանցեց ակումբի անցեալին եւ վերանորոգման աշխատանքներուն մասին, ապա շարունակելով իր խօսքը՝ այսպէս եզրափակեց. «Սիրելի՛ ներկաներ, ձեր բոլորին նիւթական եւ բարոյական օժանդակութեան արգասիքն է, որ այս երեկոյ, ձեր հայու աչքերով կը դիտէք ու կը վայելէք այս գեղեցիկ կառոյցը՝ ակումբը: Հրապարակաւ կը յայտարարենք, որ «Կարօ եւ Ալիս Կիւրեղեան» մշակութային կեդրոնին մէջ հասակ պիտի առնէ մեր նորահաս սերունդը, եւ մեր պապերէն մեզի աւանդ մնացած բոցավառ ջահը մեր ձեռքերուն՝ պիտի շարունակենք քայլարշաւը պատմութեան մեծ ճանապարհին վրայ, իսկ տարաբախտ բանաստեղծին խօսքերը մեր սիրտերուն՝ պիտի դիմենք դէպի ապագայի պայծառ հորիզոնները, չէ՞ որ «Մեզ հայ են ասում»»:

Հանդիսավար Տաթեւիկ Էքիզեան բեմ հրաւիրեց օրուան պատգամաբեր, ՀՅԴ Արեւմտեան Ամերիկայի Կեդրոնական կոմիտէի ներկայացուցիչ Տարօն Տէր Խաչատուրեանը, իր սրտին խօսքը արտայայտելու համար։ Ան սկսաւ իր խօսքը՝ ըսելով, որ ահաւասիկ մեր սիրելի ու վիթխարհի Ֆրեզնօն կ՛օժտուի իր հին-նոր կառոյցով։ Կարօ եւ Ալիս Կիւրեղեաններու նուիրատուութեամբ վերանորոգուած Հայ մշակութային կեդրոնը այսօր իրականութիւն է բոլորիս աչքին առջեւ»: Պատգամաբերը իր մտածումերը կեդրոնացուց Սփիւռքի 100ամեայ պատմութեան ընթացքին ակումբներուն, Հայ կեդրոններուն եւ ժողովրդային տուներուն կարեւոր դերակատարութեան վրայ՝ նշելով, որ անոնք կը հանդիսանան «այն դարբնոցներն ու վայրերը, ուր մենք կերտեցինք ապագայ սերունդը»:

(Կեդրոնական կոմիտէի ներկայացուցիչ Տարօն Տէր Խաչատուրեանի խօսքը ամբողջութեամբ կարելի է կարդալ «Օրը Օրին» սիւնակով)։

Պատգամաբերը Կեդր. կոմիտէին անունով իր խորին շնորհակալութիւնը յայտնեց Կիւրեղեան ամոլին ու ընտանիքին, եւ փակեց իր խօսքը՝ ըսելով. «Այս շէնքը եւ անոր վերանորոգումը սեպեցէք մէկ փոքր, բայց կարեւո՛ր օղակը մեր ազգային իղձերու իրականացման ճամբուն վրայ»:

Հանդիսավար Տաթեւիկ Էքիզեան ապա բեմ հրաւիրեց երգիչ Հրաչ Պողարեանը։ Սրահին մթնոլորտը փոթորկեցաւ, երբ հնչեցին երգիչին ժողովրդական, յեղափոխական եւ արաբական երգերը։ Բոլորը ոտքի, ոմանք շրջանակ կազմած, իսկ ուրիշներ սեղաններուն դիմաց կանգնած՝ պարեցին մինչեւ ուշ ժամերը: Իրապէս գեղեցիկ տեսարան էր, երբ երիտասարդները բեմ բարձրացան եւ դրօշները ձեռքերնին՝ ընկերացան երգիչին:

«Սողոմոն Թեհլիրեան» կոմիտէութեան վերանորոգուած «Կարօ եւ Ալիս Կիւրեղեան» մշակութային կեդրոնին մէջ, կոմիտէութեան հովանիին տակ գործող միութիւնները ունին իրենց յատուկ սենեակները: Հանդիսութեան ընթացքին, ՀՕՄի անդամուհիները խնդրեցին սրբազանէն, որ այցելէ նաեւ ՀՕՄին տրամադրուած «Անուշ Շամլեան» սենեակը:

Կամաց-կամաց սրահը դատարկուեցաւ։ Վստահաբա՛ր, իւրաքանչիւր ներկայ իր սիրտին մէջ նորոգեց ազգային ոգին:


 

Այս Էջերը Կը Հովանաւորէ

Ֆրեզնոյի ՀՅԴ «Թեհլիրեան »Կոմիտէն

 


 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top