«Հաց Բերող»ի Յիշատակին

razmigshirinian1

ՌԱԶՄԻԿ ՇԻՐԻՆԵԱՆ

 

razmigshirinian1Անգամ մը եւս քաղաքական միտքի տագնապը կ՛ապրինք ու դառն իրականութեան առջեւ կը գտնուինք՝ «Հաց բերող» Արթուրի մահուան տխուր լուրը առնելով: Կը տագնապինք, կը բողոքենք եւ անգամ մը եւս իշխանութիւնը թիրախ կը դարձնենք քաղաքական մեր քննարկումներուն մէջ:

Եթէ հայ իրականութեան մէջ տեղ մը քաղաքական միտք կայ, ապա պէտք է սկսի այլեւս ինքզինք հաւաքելու, կեդրոնանալու եւ գտնելու երկիրը կարգի բերելու ու պետականութիւն կառուցելու իր տեսութիւնը: Այսինքն՝ քաղաքական տեսութիւն մը կամ ծրագիր մը, որ կը բխի երկրի առօրեայ կեանքէն եւ սովորական կենցաղէն: Հասկնա՛լ, որ Արթուրին հաց բերելու գործողութիւնը չի բացատրեր մեր քաղաքականութիւնը, այլ՝ անոր, ինչպէս ինք կ՛ըսէ՝ «հասարակ մի քաղաքացի» ըլլալու իրականութիւնը: Այսինքն՝ հասկնալ ի վերջոյ, որ հաց բերելու նիւթը իշխանութեան կը ծառայէ, իսկ հասարակ քաղաքացիի նիւթը՝ քաղաքականացման:

Քաղաքականացման այս նիւթին կը կապուին նաեւ Երեւանի փողոցներուն մէջ թափառած ու մահացած ինիսունամեայ Գոհարը, Արծուաքար գիւղի ջրհոր փորող Յասմիկը, դպրոցէ ու բժշկական խնամքէ զրկուած բազմահազար ընտանիքները… Իշխանութիւնը չի տեսներ թշուառացած այս ժողովուրդը ու անոր տագնապները, չ՛ուզեր տեսնել, որովհետեւ ասո՛նք են վտանգաւորը, ենթակառոյցին մէջ պահուըտած եւ քաղաքականացման իրական նիւթերը: Բայց կը տեսնէ հաց բերող Արթուրը, որովհետեւ իշխանութեան դէմ ցցուած նիւթ է անիկա, դիւրին է ճզմելը, քաղաքականացման հետ կապ չունի։

Եթէ երկրի մը քաղաքական եւ տնտեսական հաստատութիւնները հիմնաքարերն են պետականութեան, ապա ենթակառոյցն է իրակա՛ն խարիսխը այդ երկրին: Այդ խարիսխն է քաղաքականացման մեր կիզակէտը: Հայաստանի պարագային՝ հոն կը գտնուին քաղաքականացման մեր տեսութիւնը եւ գործը:

 

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top