Հայաստան Կը Մերժէ Հեռանալ Իր «Գրաւած Տարածքներէն». Ալիեւ

0321ALiyev

0321ALiyev

ԵՐԵՒԱՆ, «Ազատութիւն».- Ատրպէյճանի նախագահ Իլհամ Ալիեւ, Նովրուզի առթիւ իր ելոյթին մեծ մասը տրամադրած է Արցախի հարցին:

«Մեր արտաքին քաղաքականութեան եւ ընդհանուր քաղաքականութեան հիմնական հարցը ղարաբաղեան հակամարտութեան կարգաւորումն է: Դժբախտաբար, այդ խնդիրի լուծման համար լուրջ տեղաշարժ չկայ», ըստ նախագահի պաշտօնական կայքին մէջ տեղադրուած հաղորդագրութեան՝ ըսած է Ալիեւ, մեղադրելով Հայաստանը:

Ալիեւ պնդած է, թէ Հայաստան չի փափաքիր խաղաղութիւն հաստատել, այլ կը նախընտրէ ներկայ իրավիճակը պահպանել՝ մերժելով հեռանալ իր «գրաւած տարածքներ»էն: Միաժամանակ, ան յայտարարած է, թէ Պաքու ամէն գնով պիտի վերականգնէ «իր տարածքային ամբողջականութիւնը»:

«Հայաստանը որքա՛ն շուտ հասկնայ, որ չի կրնար պահել գրաւեալ տարածքները, այնքա՛ն լաւ է իրեն համար: Մենք պիտի չհաշտուինք նման իրավիճակի հետ: Մենք աւելի հզօր սկսած ենք դառնալու ռազմական եւ քաղաքական ոլորտներուն մէջ՝ ամրապնդելով մեր միջազգային դիրքը», ըսած է ան:

Ալիեւ, ըստ էութեան, սպառնացած է Հայաստանին՝ ըսելով. «Անցեալ տարուան ապրիլեան կռիւը կարճատեւ կռիւ էր. անոնք պէտք է ճիշդ եզրակացութեան յանգին ու հասկնան, որ մենք ամէն գնով պիտի վերականգնենք մեր տարածքային ամբողջականութիւնը»:

Ան նաեւ յայտնած է. «Այսօր ատրպէյճանական դրօշակը կը ծածանի Լելէ Թեփէին (Արցախի եւ Ատրպէյճանի զինուած ուժերու շփման գիծի հարաւը գտնուող բարձունք մը, որ անցեալ տարի, Ապրիլեան պատերազմին ժամանակ անցաւ ատրպէյճանական ուժերուն հսկողութեան տակ) եւ Աղտերէի մէջ (Լեռնային Ղարաբաղի Մարտակերտի շրջանը), եւ անիկա պիտի ծածանի նաեւ Շուշիի ու Խանքենդիի (Ստեփանակերտ) մէջ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top