Սան Ֆերնանտօ Հովիտի Ազգային  Վարժարաններու Տարեկան Ձեռնարկին Հանգանակուեցաւ 180,000 Տոլար

0321ferahian

 

0321ferahian

ՍԱԼԲԻ ԹԷՔԿԷԼԵԱՆ

 

Սրբոց Նահատակաց Ազգային Ֆերահեան երկրորդական վարժարանի, Մարի Գապայեան նախակրթարանի եւ ՀՕՄի Աշխէն Փիլաւճեան մանկամսուրի պատասխանատու մարմինին հովանաւորութեամբ, Շաբաթ, 11 Փետրուար 2017ի երեկոյեան, վարժարանի «Աւետիսեան» սրահին մէջ տեղի ունեցաւ «Ֆերահեան»ի տարեկան ճաշկերոյթը: Այս ճաշկերոյթը կը զուգադիպէր նաեւ ՀՕՄի Աշխէն Փիլաւճեան մանկամսուրի 25ամեակին:

Գիտակից ոչ մէկ հայ կրնայ ուրանալ հայ դպրոցին անզուգական դերն ու կարեւորութիւնը մեր ազգային կեանքին մէջ: Հայկական վարժարանները, ուսման հետ զուգահեռ, աշակերտին կը ջամբեն կրթութիւն եւ դաստիարակութիւն: Հայ դպրոցի առաքելութիւններէն են կազմաւորուող նոր սերունդին ապահովել հայեցի մթնոլորտ եւ շունչ, սորվեցնել մեսրոպաշուչ հայ լեզուն, իրեն ծանօթացնել հայ ազգի մշակութային, պատմական ու հոգեւոր հարստութիւնը եւ արթնցնել անոր մէջ ազգային պատկանելիութեան գիտակցութիւնն ու հպարտութիւնը:

«Մեր սիրտերը իբրեւ մէկ ամբողջութիւն կը բաբախեն» վկայութեամբ, երեկոն սկսաւ Ամերիկեան եւ Հայկական քայլերգներով՝ կատարողութեամբ մանկամսուրի աշակերտուհի Նորա Գիթապճեանի: Օրուան հանդիսավար տոքթ. Փօլ Նարկիզեան, ողջունելէ ետք ներկաները, բեմ հրաւիրեց Սրբոց Նահատակաց եկեղեցւոյ հոգեւոր հովիւ Ռազմիկ քհնյ. Խաչատուրեանը՝ սեղաններու օրհնութիւնը կատարելու:

Վարժարանի ուսումնական մարմինի ատենապետ Սերոբ Պէյլերեան, իր կարգին, շնորհակալական եւ երախտագիտական ջերմ խօսքեր ուղղեց ներկաներուն, որոնք եկած էին միասնաբար վայելելու գեղեցիկ երեկոյ մը: Խօսելով օրուան վկայութեան մասին՝ ան ըսաւ, թէ ՀՕՄի Աշխէն Փիլաւճեան մանկամսուրը, Ազգ. Մարի Գապայեան նախակրթարանը եւ Ֆերահեան երկրորդական վարժարանը մէկ ամբողջութիւն են ու այնպէ՛ս ամուռ շաղկապուած իրարու, որ անկարելի է մէկը միւսէն անջատել. այդ իսկ պատճառով, երեկոյին վկայութիւնը կ՛ըսէ՝ «Մեր սիրտերը իբրեւ մէկ ամբողջութիւն կը բաբախեն»:

0321ferahian2«Ուրախ եմ յայտարարելու, որ նախկին տարիներուն նման, վարժարանը այս տարի եւս մեծ նուաճումներ եւ յաջողութիւններ արձանագրեց», յայտնեց Ազգային Ֆերահեան վարժարանի տնօրէնուհի Սօսի Շանլեան: Յաջորդ տարուան ծրագիրներուն մասին խօսելով՝ ան ըսաւ. «Հակառակ այս տարուան նոր նուաճումներուն, եկող տարի ծրագրուած զանազան փոփոխութիւնները առիթ պիտի ստեղծեն մեր աշակերտներուն աւելի՛ եւս յաջողութիւններ արձանագրելու»: Ան, վստահեցուց ներկաներուն, թէ վարժարանը կ՛ուղղուի դէպի լուսաւոր ապագայ՝ իւրացնելով այս տարուան տնօրէնութեան որդեգրած նշանաբանը՝ «Ֆերահեանը՝ լաւագո՛յն վայրը»»:

«50ական թուականներուն, պրն. Մատթէոս Ֆերահեան իր կալուածը նուիրեց առաջին հայկական երկրորդական վարժարանի մը հիմնադրման, որ պէտք էր բացուէր Ամերիկայի մէջ, որուն նպատակը շատ յստակ էր՝ բարձրագոյն որակեալ ուսման կողքին հայեցի դաստիարակութիւն եւ հայկական նկարագիրի ջամբում», իր կարգին ըսաւ Ազգ. Մարի Գապայեան նախակրթարանի տնօրէն Ժան Գոսագեան: Ան եւս խօսելով վարժարանի յաջողութիւններուն մասին՝ յայտնեց, թէ վարժարանը մինչեւ օրս ունի 2000է աւելի շրջանաւարտներ, որոնցմէ շատերը վերադառնալով՝ իրենց զաւակները վստահած են վարժարանին, շատեր ստանձնած են մեծ պաշտօններ, իսկ շատեր կը ծառայեն Հայ Դատին եւ Հայաստանին, ինչ որ կը նշանակէ, որ Մատթէոս Ֆերահեանի երազը իրականացա՛ծ է:

Սրբոց Նահատակաց մանկապարտէզ-նախակրթարանին մէջ ՀՕՄի Շրջանային վարչութեան նախաձեռնած մանկամսուրը, որ ներկայիս կը կոչուի՝ Սրբոց Նահատակաց ՀՕՄի Աշխէն Փիլաւճեան մանկամսուր, արդէն իսկ կը նշէ իր հիմնադրութեան 25ամեակը:

«25 տարի առաջ, իր դռները բանալով ընդամէնը քանի մը աշակերտներու համար, այնուհետեւ նաեւ շարունակելով իր անշահախնդիր աշխատանքները՝ շնորհիւ նուիրեալ ուսուցիչներու, ծնողներու, նուիրատուներու եւ հովանաւորներու նիւթական, ֆիզիքական եւ բարոյական աջակցութեան ու օգնութեան, մինչեւ 2016 թուական, մանկամսուրի ճանապարհով անցած են 1445 մանուկներ, որոնք ապագային ընտանիքներ կազմելով՝ մանկամսուրը փոխանցած են սերունդէ սերունդ», ըսաւ մանկամսուրի վարչուհի Վեհիկ Գաբրիէլեան: Ան իր կարգին բարի գալուստ մաղթելէ ետք, շնորհակալութիւն յայտնեց ներկաներուն, որոնք եկած էին միասնաբար տօնելու մանկամսուրին 25ամեակը:

Շարունակելով իր խօսքը՝ Գաբրիէլեան աւելցուց. «50 տարիներէ ի վեր, վարժարանը ներկայութիւն է՝ շնորհիւ հայ գաղութի յաճախակի աջակցութեան: Այսօր, այս մանկամսուրին մէջ իրենց երջանիկ մանկութիւնը կ՛անցընեն երեխաները, ծաղիկի պէս աճելով, ունենալով ուղեղի զարգացման բոլոր հնարաւորութիւնները, ձեռք բերելով ինքնավստահութիւն, ինքնուրոյնութիւն, համարձակութիւն եւ ամէնէն կարեւորը՝ հայեցի դաստիարակութիւն, հասնելու համար կեանքի մեծ նպատակներու»: Ապա, մանկամսուրին մասին ժապաւէն մը ցուցադրուեցաւ ներկաներուն:

0321ferahian1 Պաշտօնական յայտագիրին եզրափակիչ խօսքը արտասանեց առաջնորդ սրբազանը: Ան փառք տուաւ Աստուծոյ, որ հաւաքաբար խմբուած են վարժարանի սրահին մէջ, մասնակից ըլլալով վարժարանի տարեկան ճաշկերոյթին, վերահաստատելու համար անվերապահ զօրակցութիւն եւ աջակցութիւն հայկական այս օճախին, որուն ՀՕՄի Աշխէն Փիլաւճեան մանկամսուրը այս տարի կը տօնէ իր 25րդ տարեդարձը: Ապա անդրադառնալով վարժարանի հիմնադրութեան նպատակներուն՝ սրբազանը նշեց, թէ աւելի քան 50 տարի առաջ երկրորդականէն սկսելով՝ վարժարանը այժմ ունի նախակրթարանի եւ մանկամսուրի բաժիններ, որոնք կը կազմեն մէկ ամբողջութիւն եւ ունին նոյն նպատակը՝ հայ աշակերտին դաստիարակութիւնը:

Ճաշկերոյթի պաշտօնական բաժինը վերջ գտնելով՝ սկսաւ խնճոյքը, որ ընթացաւ խանդավառ մթնոլորտի մէջ: Երեկոն խանդավառեց «Ալէն Կ.» (Allen G.) երգչախումբը: Տարեկան այս ճաշկերոյթը նաեւ առիթ ընծայեց, որ մեծագումար հանգանակութիւն կատարուի՝ ի նպաստ դպրոցին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top