Ս. Յարութեան Տօնն Ու Մեռելոցը Արեւմտեան Թեմէն Ներս

0000Easter1

0000Easter1ԷՆՍԻՆՕ.- Արեւմտեան թեմի բոլոր եկեղեցիներուն մէջ, Կիրակի, Ապրիլ 16ին հանդիսաւոր Ս. պատարագ մատուցուեցաւ Յիսուսի հրաշափառ Ս. Յարութեան տօնին առիթով, եւ պատարագիչ հոգեւոր հայրերը «Քրիստոս յարեաւ ի մեռելոց» աւետիսով ողջունեցին հաւատացեալները։

Առաջնորդ Մուշեղ արք. Մարտիրոսեան Ս. պատարագ մատուցեց Էնսինոյի Ս. Նահատակաց եկեղեցւոյ մէջ։ Ս. սեղանին սպասարկեց եկեղեցւոյ հոգեւոր հովիւը՝ Ռազմիկ Ա. քհնյ. Խաչատուրեան, աղօթակից էր Եփրեմ արք. Թապագեան, եւ ներկայ էին Հայաստանի հիւպատոսարանի խորհրդականներէն Ռազմիկ Ստե-փանեան, Ազգ. վարչութեան ատենապետ Վահէ Յովակիմեան, շրջանի միութեանց եւ կազմակերպութեանց ներկայացուցիչներ, ժողովականներ ու հազարաւոր հաւատացեալներ։

Սրբազանը իր պատգամին բնաբան ընտրած էր՝ «Յարեաւ Աստուած եւ ցրուեցան ամենայն թշնամիք նորա» խօսքը։ Ան նախ փառք տուաւ Աստուծոյ, որ դարձեալ առիթ շնորհած է բոլորիս՝ միասնաբար տօնելու Քրիստոսի հրաշափառ Ս. Յարութիւնը եւ զիրար շնորհաւորելու՝ «Քրիստոս յարեաւ ի մեռելոց» ողջոյնով, այն վստահութեամբ, որ Աւագ Շաբթուան սրբազան արարողութիւնները հաւատացեալներու սիրտերն ու հոգիները պատրաստած են մահուան դիմաց Քրիստոսի տարած յաղթանակի տօնին։

Առաջնորդը անդրադարձաւ հոգեբեկութեան այն վիճակին, որուն մատնուեցան աշակերտները՝ խաչին վրայ Յիսուսի մահուան ու գերեզմանին մէջ թաղուելուն ի տես։ Անոնք շփոթի մատնուած էին, սակայն երբ իմացան Յիսուսի Ս. Յարութեան լուրը, իսկո՛յն վերանորոգուեցան, հաւատքով վերազինուեցան եւ նոր արարածներ դարձան։ Սրբազանը անդրադարձաւ նաեւ Յիսուսի գերեզմանին այցի գացած իւղաբեր կիներու զարմանքին, երբ թափուր գտան գերեզմանը, բայց իրենց յուսալքութիւնը փարատեցաւ, երբ տեսան յարուցեալ Փրկիչը։

Սրբազանը շեշտեց, որ երկրաւոր առաքելութեան երեք տարիներուն ընթացքին Յիսուս բազմաթիւ թշնամիներ ունեցաւ ու դաւադիրներ դիմագրաւեց, սակայն ան յաջողեցաւ պարտութեան մատնել բոլոր այն փորձերը, որոնք կը միտէին մարել իր լոյսը։ «Չարը միշտ ալ ներկայ է այս աշխարհին մէջ։ Ս. Յարութեան տօնը մեզ կը հրաւիրէ հետեւելու արդարութեան ու ճշմարտութեան ուղիին, որդեգրելու բարիի եւ լոյսի ճանապարհը, զոր Քրիստոս բացաւ մեզի համար։ Մեր պատմութեան ընթացքին շատեր փորձած են մեզ շեղել արդարութեան ուղիէն, սակայն բոլոր փորձերը ձախողութեան մատնուած են եւ մենք գոյատեւած ենք։ Այսօր ու վաղն ալ պիտի շարունակենք նահանջի ու պարտութեան մատնել մեր թշնամիները, պիտի յաղթահարե՛նք մեր տկարութիւններն ու վարանումները», եզրափակեց առաջնորդը։

Հաւատացեալներուն ու ծխական համայնքին անունով, Ռազմիկ Ա. քահանան բարի Զատիկ եւ երկար ծառայութիւն մաղթեց սրբազան հօր։ Արարողութեան աւարտին, հաւատացեալները Ս. հաղորդութիւն ստացան։

 

ՀՈԳԵՀԱՆԳԻՍՏ ՄԵՌԵԼՈՑ ՏՕՆԻՆ

 

Երկուշաբթի, Ապրիլ 17ի առաւօտուն, առաջնորդ սրբազան հօր նախագահութեամբ, թեմի հոգեւոր հայրերը համախմբուեցան Հոլիվուտ Հիլզի եւ Կլենտէյլի գերեզմանատուներուն մէջ, ուր Մեռելոց տօնին առիթով հոգեհանգստեան արարողութիւն կատարեցին մեր ազգի բոլոր ննջեցեալներու հոգիներուն համար։ Տեղի ունեցաւ նաեւ Անդաստանի արարողութիւն, որուն ընթացքին, օրհնուեցան աշխարհի չորս կողմերը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top