Էրտողան «Սպառնացած Է» Չմասնակցիլ Ռաքքան Գրաւելու Գործողութեան

0520Erdogan trump

0520Erdogan trump

ՊՈԼԻՍ.- Ամերիկայէն Թուրքիա վերադարձած նախագահ Ռեչեփ Թայիփ Էրտողան, Մայիս 18ին ելոյթ մը ունեցած է թուրք գործարարներու «Թուսիատ» կազմակերպութեան խորհուրդի նիստին ընթացքին՝ յայտարարելով, որ Սուրիոյ հիւսիսը գտնուող Ռաքքա քաղաքի ազատագրման գործողութեան հարցով Միացեալ Նահանգներ տուած է իր որոշումը, այն է՝ համագործակցիլ Սուրիոյ տարածքին գործող քիւրտերու «Ժողովուրդի պաշտպանութեան ջոկատներ»ուն հետ:

Թրքական «Տիքեն» կայքը կը հաղորդէ, որ Էրտողան ըսած է, թէ Միացեալ Նահանգներու նախագահ Տանըլտ Թրամփի հետ հանդիպման ընթացքին յայտնած է այն կարծիքը, թէ այդպիսի մօտեցում մը անընդունելի՛ է Թուրքիոյ համար:

Էրտողան, որ յայտնապէս յուսախաբ եղած է Ուաշինկթընի այս կեցուածքէն, ամերիկացիներուն յայտնած է. «Եթէ դուք Ռաքքայի գործողութիւնը պիտի իրականացնէք քիւրտերու «Ժողովուրդի պաշտպանութեան ջոկատներ»ուն հետ, ապա մենք հոն ընելիք չունի՛նք։ Եթէ Սուրիոյ քիւրտերուն կողմէ մեր վրայ յարձակում մը գործուի, ապա առանց ոեւէ մէկուն հետ խորհրդակցելու՝ մենք անմիջապէ՛ս պիտի հակադարձենք։ Այդ հարցին մէջ կորսնցնելու ժամանակ չունինք։ «Եփրատի վահան» գործողութիւնը առաջին օրինակը եղաւ, ասկէ ետք եւս, եթէ հարկ ըլլայ, պիտի ձեռնարկենք նմանօրինակ գործողութիւններու»։

Ան աւելցուցած է. «Յայտնի է, որ չեն յարգուիր մեզի կատարուած խոստումները։ Ահաբեկչական կազմակերպութիւններու հետ միասին քաղաքական խաղեր սարքելով՝ կ՛ուզեն մեզ արտաքսել մեր աշխարհագրութենէն։ Դժբախտաբար, հասած ենք հոն, ուր խօսքը վերջացա՛ծ է։ Պարտաւոր ենք առնելու այն քայլերը, զորս պէ՛տք է առնենք այսուհետեւ։ Վստահ եղէք, որ այս քայլերը բնաւ պիտի չտկարացնեն Թուրքիան»։

Էրտողան նաեւ ըսած է, թէ Թուրքիա եւ Միացեալ Նահանգներ վճռական են երկկողմանի յարաբերութիւններու զարգացման հարցին մէջ, մինչդեռ «Ժողովուրդի պաշտպանութեան ջոկատներ»ու հարցին մէջ անոնց տարակարծութիւնները կը մնան անլոյծ:

Յիշեցնենք, որ իր ազգային ապահովութեան հարցերու նախկին խորհրդական եւ թրքամոլ Մայքըլ Ֆլինի հեռացումէն ետք, նախագահ Թրամփ որոշած էր շարունակել նախորդ նախագահ Պարաք Օպամայի օրերուն որդեգրուած՝ «Ժողովուրդի պաշտպանութեան ջոկատներ»ը զինելու քաղաքականութիւնը, ինչ որ խիստ հակազդեցութեան արժանացած է Թուրքիոյ կողմէ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top