Սուրիա Եւ Ռուսիա Կը Դատապարտեն Սուրիոյ Մէջ Ամերիկեան Յարձակումը

ԴԱՄԱՍԿՈՍ, «Ա.Էֆ.Փէ.».- Սուրիոյ իշխանութիւնները Մայիս 19ին խստօրէն դատապարտեցին մէկ օր առաջ սուրիական բանակային դիրքի մը վրայ Միացեալ Նահանգներուն գլխաւորած միջազգային դաշինքի օդային յարձակումը՝ աւելցնելով, թէ այդ բռնարարքը ցոյց կու տայ, որ սո՛ւտ են այն պնդումերը, թէ դաշինքը կը պայքարի ահաբեկչութեան դէմ։

Ռուսիոյ արտաքին գործոց նախարար Սերկէյ Լաւրով եւս «ապօրինի» որակեց յարձակումը։

Նշենք, որ ամերիկեան զինուորական աղբիւրներ հաղորդած էին, որ Մայիս 18ին Ուաշինկթընի ղեկավարութեամբ միջազգային դաշինքը հարուածած էր սուրիական բանակին աջակցող զինեալ խմբաւորում մը: Ըստ աղբիւրին՝ նախքան օդային հարուածը, ամերիկեան օդուժը զգուշացման կրակոց կատարած է, երբ նշեալ խմբաւորման ուժերը սկսած են շարժելու Միացեալ Նահանգներու աջակցութիւնը վայելող ուժերուն գտնուած վայրին ուղղութեամբ:

Փենթակոնի աջակցութիւնը վայելող ընդդիմադիր «Մաղաուիր Սաուրա» խմբաւորման պաշտօնատարներէն Մազահիմ Սալլում, նախապէս «Ռոյթըրզ» լրատու գործակալութեան յայտնած էր, թէ միջազգային ուժերու օդանաւերը հարուածած են սուրիական բանակի եւ Իրանի աջակցութիւնը վայելող զինեալ խմբաւորումի մը շարասիւնը, որ կ՛ուղղուէր Սուրիոյ հարաւը գտնուող Թանաֆ ռազմակայան, ուր կը գտնուին ամերիկեան մասնայատուկ ուժեր. ան աւելցուցած էր, որ շարասիւնը կը գտնուէր ռազմակայանէն 27 քիլոմեթր հեռու, երբ միջազգային դաշինքի օդուժը զայն հարուածեց:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top