Արամ Ա. Կաթողիկոս Հանդիպում Ունեցաւ Քուէյթի Էմիրին Հետ

0000KWEIT

 

0000KWEITԱՆԹԻԼԻԱՍ.- Չորեքշաբթի, 17 Մայիսի առաւօտուն, Արամ Ա. կաթողիկոս այցելեց Քուէյթի պետութեան էմիրին ապարանքը, ուր հանդիպում ունեցաւ Քուէյթի էմիր Շէյխ Սապահ Ալ Ահմատ Ալ Ժապէր Ալ Սապահի հետ: Հանդիպումին ներկայ էին Քուէյթի եւ շրջակայից թեմի առաջնորդ Մասիս Ծ. վրդ. Զօպույեան եւ Քուէյթի մօտ Լիբանանի դեսպան Մահեր Խեր:

Սիրալիր մթնոլորտի մէջ տեղի ունեցած հանդիպման ընթացքին վեհափառը իր շնորհակալութիւնը յայտնեց էմիրին Քուէյթի հայութեան նկատմամբ իր ցուցաբերած հայրական հոգածութեան համար: Կաթողիկոսը յիշեց, որ հակառակ գաղութին պակսող հնարաւորութիւններուն, այսօր շնորհիւ իր զաւակներու տքնաջան աշխատանքին ու նուիրումին գաղութը օժտուեցաւ սեփական նոր եկեղեցիով ու նոր առաջնորդարանով: Ապա, հայրապետը աւելցուց, որ եկեղեցւոյ շինութիւնը, ներկայ ժամանակներուն մանաւանդ, պերճախօս վկայութիւն մըն է Քուէյթի պետութեան քրիստոնէութեան նկատմամբ ունեցած լայնախոհ ոգիին:

Արամ Ա. կաթողիկոս նաեւ հակիրճ կերպով անդրադարձաւ Լիբանանի եւ Քուէյթի միջեւ զարգացող քաղաքական ու տնտեսական յարաբերութիւններուն մասին: Ան յիշեց, որ Քուէյթը յատուկ տեղ ունի լիբանանցիներու սիրտին մէջ եւ քուէյթցիները կը սիրեն յատկապէս ամառը անցընել Լիբանանի գեղածիծաղ ափերը եւ լեռնային զով գիւղերուն մէջ: Իր խօսքի աւարտին, վեհափառը յոյս յայտնեց, որ Քուէյթի պետութիւնը իր բարոյական աջակցութեան առընթեր նաեւ նիւթապէս օժանդակէ Քուէյթի հայ գաղութին՝ եկեղեցւոյ ու առաջնորդարանի շինութեան գծով կատարուած հսկայ ծախսերուն՝ բերելով իր մասնակցութիւնը:

Էմիրը, իր իսկ բառերով, եղբայրական ջերմ սիրով ընդունեց վեհափառը, յիշեց վեց տարիներ առաջ կաթողիկոսին այցելութիւնը Քուէյթ, գնահատեց իր միջ-կրօնական երկխօսութեան բերած նպաստը, բարձր գնահատանքով խօսեցաւ Քուէյթի հայութեան մասին՝ ըսելով, թէ ո՛չ մէկ հայ ապօրէն ու սխալ ընթացքի մէջ եղած է Քուէյթի մէջ, ընդհակառակը, հայերը իրենց հաւատարմութեամբ ու աշխատասիրութեամբ կարեւոր նպաստ բերած են Քուէյթի զարգացման: Էմիրը նաեւ ողջունեց վերականգնումի ու յառաջդիմութեան մէջ եղող Լիբանանը, յիշեց որպէս արտաքին գործոց նախարարի իր այցելութիւնները Լիբանան եւ վստահեցուց վեհափառը, որ եկեղեցւոյ ու առաջնորդարանի շինութեան ծախսերուն իր նպաստը պիտի բերէ:

Սիրալիր հանդիպման աւարտին, վեհափառը հրաւիրեց առաջնորդ հայր սուրբը, որ իր շնորհակալութիւնը յայտնէ գաղութին կողմէ էմիրին, ինչպէս նաեւ Լիբանանի դեսպանը, որ ողջունէ Լիբանանի ու Քուէյթի եղբայրական յարաբերութիւններու զարգացումը:

Յայտնենք, որ կաթողիկոսը հիւրն է պետութեան եւ կը վայելէ բարձրաստիճան օտար հիւրերու վերապահուած բոլոր պատիւները:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top