Թուրքիա Ամերիկեան Լոպիիստական Նոր Ընկերութիւններ Կը Վարձէ, Որովհետեւ Իր Հեղինակութիւնը Աւելի Շատ Արատաւորուած Է

Harout-Sassounian

ՅԱՐՈՒԹ ՍԱՍՈՒՆԵԱՆ

 

Harout-SassounianՆկատի ունենալով որ Թուրքիա դարձած է համաշխարհային դատապարտման թիրախ՝ երկրին մէջ արձանագրուած մարդկային իրաւունքներու խախտումներուն պատճառով, թրքական կառավարութիւնը որոշած է հսկայական գումարներ ծախսել քարոզչութեան եւ հանրային կապերու ուղղութեամբ՝ փորձելով մաքրել իր վարկաբեկուած հեղինակութիւնը:

Ապրիլ 16ի խայտառակ հանրաքուէն, որուն աւարտին հազիւ յաղթելով՝ Էրտողան ինքնիրեն  բռնապետական լայն լիազօրութիւններով օժտեց, իսկ ատկէ ետք տեղի ունեցած՝ Ուաշինկթընի մէջ Թուրքիոյ դեսպանատան առջեւ անմեղ ցուցարարներու վրայ անոր թիկնապահներուն դաժան յարձակումը, արժանացան համընդհանուր քննադատութեան Միացեալ Նահանգներու իշխանութեան գործադիր եւ օրէնսդիր ճիւղերուն կողմէ, ներառեալ Ներկայացուցիչներու տան ընդունած բանաձեւը՝ ձայներու 397-0 յարաբերակցութեամբ…

Սակայն, Թուրքիոյ բռնապետ նախագահին պատճառով երկրին հեղինակութիւնը այնքան արատաւորուած է, որ հանրային կապերու ընկերութիւնները որքան ալ հզօր եւ հեղինակաւոր ըլլան, պիտի չկարենան վերականգնել անոր հեղինակութիւնը: Թուրք ղեկավարները պարզապէս միլիոնաւոր տոլարներ պիտի վատնեն իրենց հարկատուներու գումարներէն, փորձելով լուծել անկարելի խնդիր մը:

Թուրքիոյ կառավարութիւնը տարեկան արդէն հինգ միլիոն տոլար կը վճարէ տասը լոպիիստական ընկերութիւններու. անոնք են՝ Gephardt Group՝ 1 միլիոն 700 հազար տոլար, Amsterdam Partners՝ 600 հազար տոլար, Greenberg Traurig՝ 480 հազար տոլար, Capitol Counsel՝ 384 հազար տոլար, Mercury՝ 240 հազար տոլար, Madison Group՝ 240 հազար տոլար, Signal՝ 240 հազար տոլար, Jim Arnold՝ 240 հազար տոլար եւ MediaFix՝ 108 հազար տոլար…: Բացի ասոնցմէ, Էրտողանի գործընկերը 2016 Սեպտեմբերին 540 հազար տոլար վճարած է նախագահ Թրամփի վարկաբեկուած ազգային անվտանգութեան հարցերով նախկին խորհրդական Մայքըլ Թ. Ֆլինի՝ Թուրքիոյ կառավարութեան օգտին քարոզչութիւն ընելու համար…

Վերջին ամիսներուն ընթացքին, փորձելով դուրս գալ PR-ի ճահիճէն, Թուրքիոյ իշխանութիւնները եւ անոնց կապուած խումբերը վարձած են երեք նոր ընկերութիւններ: Այս շաբաթ կը ներկայացնենք այդ լոպիիստական ընկերութիւններէն մէկը, մնացեալ երկուքը թողելով յաջորդ խմբագրականի համար:

«Մոնթէ» խորհրդատուական խումբը վարձած են 2016 Օգոստոսին, 400 հազար տոլար վարձատրութեամբ: Ըստ Daily Beast-ին՝ ընկերութիւնը կը ղեկավարէ Տակլըս Պէյքըր՝ հանրապետական Ճէյմզ Պէյքըրի (նախագահ Ճորճ Պուշի աշխատակազմի ղեկավար եւ արտաքին գործոց նախարար եւ Ռանըլտ Ռեկընի աշխատակազմի ղեկավար եւ գրասենեակի պիւտճէի ղեկավար) որդին: Այս ընկերութիւնը պէտք է բարելաւէր Թուրքիոյ հասարակական ընկալումները…: Տակլըս Պէյքըր «Մոնթէ» խորհրդատուական խումբի «միակ եւ գործող անդամ»ն է: Պայմանագիրը կնքուած է սթամպուլեան հասարակական խորհրդաւոր կազմակերպութեան կողմէ, որ յայտնի է որպէս Տնտեսական գիտելիքներու ընկերութիւն (KEA): Daily Beast կը հաղորդէ, որ KEA-ի «գործունէութիւնը երբեմն կը համապատասխանէ Թուրքիոյ կառավարութեան շահերուն»: Ըստ Daily Beast-ին՝ առաւել մտահոգիչ է այն, որ «KEA-ի ղեկավարութեան առնուազն մէկ անդամը եղած է Թուրքիոյ կառավարութեան ներկայացուցի»չ: Աւելին, Daily Beast-ը կը տեղեկացնէ, որ KEA-ի հիմնադիր եւ նախկին նախագահ Տաւութ Քաւրանօղլու այժմ Էրտողանի գիտական խորհրդականն է: Քաւրանօղլու «թուիթըր»ի վրայ տեղադրած է Ճէյմզ Պէյքըրի հետ առնուած իր լուսանկարը…

Daily Beast-ը կը հաղորդէ, որ ըստ արդարադատութեան նախարարութեան մէջ «Մոնթէ» խորհրդատուական խումբի ներկայացուցած արձանագրութեան, ընկերութիւնը KEA-ի անունով «զբաղած է Թրամփի նախագահական ընտրարշաւի եւ նախագահական անցումային խումբի աջակցութեամբ»՝ «Թուրքիոյ եւ Միացեալ Նահանգներու միջեւ ընդհանուր յարաբերութիւնները եւ հասարակական ընկալումները բարելաւելու համար»: «Մոնթէ» նաեւ շփումներ ունեցած է «Օպամայի վարչակարգէն հեռացող պաշտօնեաներու հետ, հանդիպումներ ունեցած է պաշտպանութեան նախարարութեան անձնակազմին հետ եւ ելեկտրոնային նամակներ ուղարկած է՝ այդ օրերու փոխնախագահ Պայտընի անվտանգութեան հարցերով խորհրդական Քոլին Քալին»։

Ըստ Daily Beast-ին՝ Արդարադատութեան նախարարութեան ներկայացուցած գիրին մէջ, սթամպուլցի իրաւաբան Իսրաֆիլ Քահրաման նշուած է որպէս KEA-ի օրինական ներկայացուցիչ: Իսրաֆիլ յայտարարած է, որ պայմանագիրին նպատակն է «զարգացնել բարեկամութիւնն ու համագործակցութիւնը Թուրքիոյ եւ Միացեալ Նահանգներու միջեւ գիտական եւ տնտեսական զարգացման ասպարէզին մէջ»: Daily Beast-ը, մէջբերելով Քահրամանը՝ նշած է, որ KEA-ն հիմնադրուած է «խումբ մը յարգարժան գիտնականներու կողմէ՝ քաղաքացիական հասարակութեան գործունէութիւնը ղեկավարելու նպատակով, որպէսզի Թուրքիոյ մէջ բարձրացուի իրազեկութիւնը տնտեսութեան զարգացման մասին»:

Սա անհեթեթութիւն է: Ինչո՞ւ պէտք է խումբը, որուն նպատակն է տնտեսութեան մասին իրազեկութեան բարձրացումը Թուրքիոյ մէջ, լոպիիստական խումբ վարձէ Ուաշինկթընի մէջ: Սա աւելի շատ կը նմանի թրքական կառավարութեան համար ստեղծուած ծածուկ ներկայացուցչութեան մը, քան գիտնականներու անկախ խումբի մը: Կարեւոր է պարզել, թէ ո՞վ կը ֆինանսաւորէ KEA-ն…

Հետաքրքրականը այն է, որ Հետաքննող լրագրողներու բիւրոյին հետ կապ հաստատելու ընթացքին, Տակլըս Պէյքըր նշած է. «Կայ այն մտահոգութիւնը, որ Միացեալ Նահանգներ-Թուրքիա յարաբերութիւնները «քիչ մը վատթարացած են» Օպամայի վարչակազմի վերջին տարիներուն: Թերեւս կարելի ըլլայ կա՛մ ամրապնդել, կա՛մ անտեսնել այդ յարաբերութիւնները, կախուած այն բանէն, թէ ինչպէս աւելի մեծ վնաս կը հասցուի անոնց: Եւ այդ է պատճառը, որ (KEA-ն) վարձակալած է «Մոնթէ»ն՝ օգնելու համար իրեն, այդ անցումային փուլին»:

Տակլըս Պէյքըր աւելցուցած է, որ KEA-ի համար իր ընկերութեան աշխատանքը «երբեք չէ նախատեսուած իբրեւ հանրային կապերու ընդհանուր քարոզարշաւ: Այս քիչ մը աւելի մեծ կարելիութիւն է՝ ներկայացնելու անոնց տեսակէտը…: Անոնք կը զգան, որ մենք ի վիճակի ենք օգնելու իրենց՝ անհրաժեշտ ծանօթութիւններով»:

Ըստ Հետաքննող լրագրողներու բիւրոյին՝ զարմանալի չէ, որ Թրամփի երդմնակալութենէն եւ KEA-ի ու Թրամփի վարչակազմի պաշտօնեաներու միջեւ «անհրաժեշտ ծանօթութիւններ» հաստատելէ ետք, KEA-ն չթարմացուց պայմանագիրը «Մոնթէ»ի հետ, երբ վերջինիս նախնական վեցամսեայ ժամկէտը լրացաւ 2017 Փետրուարին: «Պայմանագիրի այս կէտով նախատեսուած 400 հազար տոլարին դիմաց ցարդ վճարուած է միայն 105 հազար տոլար»:

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top