«Պատրաստ Ենք Լայնածաւալ Գործողութիւնների»

0616jalalharutyunian

0616jalalharutyunian

«ՀԱՅ ԶԻՆՈՒՈՐ»Ի ՀԱՐՑԱԶՐՈՅՑԸ ՊԱՇՏՊԱՆՈՒԹԵԱՆ ԲԱՆԱԿԻ N ՄԻԱՒՈՐԻ ՀՐԱՄԱՆԱՏԱՐ, ԳՆԴԱՊԵՏ ՋԱԼԱԼ ՅԱՐՈՒԹԻՒՆԵԱՆԻ ՀԵՏ

 

Վարեց՝ ՇՈՒՇԱՆ ՍՏԵՓԱՆԵԱՆ

 

ՇՈՒՇԱՆ ՍՏԵՓԱՆԵԱՆ.- Պարոն Յարութիւնեան, Միջազգային ճգնաժամային խմբի (ICG) փորձագէտները վերջերս շուրջ 40 էջանոց զեկոյց են հրապարակել եւ յանգել այն հետեւութեան, որ Արցախում պատերազմի ամպեր են կուտակւում: Զեկոյցում անդրադարձել են ապրիլեան ռազմագործողութիւններին, 2014թ. օգոստոսեան լարուածութեանն ու նշել, որ Հայաստանն ու Ադրբեջանը դեռ երբեք այսքան մօտ չեն եղել պատերազմի վերսկսմանը: Համամի՞տ էք:

 ԳՆԴԱՊԵՏ ՋԱԼԱԼ ՅԱՐՈՒԹԻՒՆԵԱՆ.- Պատերազմը կանխագուշակել հնարաւոր չէ: Այն միշտ յանկարծակի է սկսւում:

Այնուամենայնիւ, հակառակորդի զինտեխնիկայի տեղաշարժերը, ծաւալած ինժեներական աշխատանքները, սահմանի երկայնքով անցկացուող զօրավարժութիւնները յարձակողական բնոյթի են: Մեր առաջապահ ստորաբաժանումները համալրուած են համապատասխան միջոցներով, որոնք հնարաւորութիւն են ընձեռում անհրաժեշտ խորութիւնում հետախուզութիւն իրականացնելու եւ մշտապէս դիտարկելու ադրբեջանական զինուժի բոլոր գործողութիւնները: Այնպէս որ՝ հակառակորդը չի կարող ծածուկ, գաղտնի նախապատրաստուել լայնածաւալ պատերազմի: Այդ է պատճառը, որ ադրբեջանական զինուժը առաջնագծում դիմում է տեղային գործողութիւնների՝ յաճախ ստեղծելով ապրիլեան իրադրութեանը մօտ իրավիճակներ:

 

 ՇՈՒՇԱՆ ՍՏԵՓԱՆԵԱՆ.- Այսինքն՝ այսօր էլ դիրքային պատերազմի մէջ ենք:

 ՋԱԼԱԼ ՅԱՐՈՒԹԻՒՆԵԱՆ.- Այո՛: Հակառակորդը գործարկում է հրաձգային, դիպուկահար զէնքեր, կիրառում է 60, 82 եւ 120 մմ.ոց ականանետներ: Երբեմն թիրախաւորում է ինչ-որ տեղամաս, յենակէտ եւ մի քանի ժամուայ ընթացքում 50-60 արկ կրակում: Հակազդիչ գործողութիւններով ցանկացած սադրիչ քայլ անմիջապէս կանխում ենք: Ընդհանրապէս, առաջնագծում այժմ իրավիճակը կայուն լարուած է: Նայէ՛ք, այս պահին հանգիստ է, բայց լռութիւնը խաբուսիկ է: Մէկ կամ երկու ժամ անց հնարաւոր է լարուածութեան շեշտակի աճ: Զօրքը անընդհատ բարձր զգօնութեան վիճակում է՝ պատրաստ ցանկացած պահի արձագանգելու իրադրութեան փոփոխութեանը: Թոյլ չենք տալու, որ հակառակորդն անգամ աննշան յաջողութիւն ունենայ:

 

ՇՈՒՇԱՆ ՍՏԵՓԱՆԵԱՆ.- Ի դէպ, Փետրուարի 24ի լոյս 25ի գիշերը հակառակորդի յատուկ նշանակութեան խումբը փորձել էր ներթափանցել ձեր ղեկավարած միաւորման ենթակայ զօրամասի մարտական յենակէտը: Դիրքապահների հմուտ գործողութիւնների արդիւնքում թշնամին մի քանի դիակ էր թողել չէզոք գօտում: Ինչպէ՞ս կ՛որակէք տեղի ունեցածը‘ «Ապրիլը» կրկնելու փո՞րձ էր:

 ՋԱԼԱԼ ՅԱՐՈՒԹԻՒՆԵԱՆ.- Գրեթէ կասկած չունեմ, որ հակառակորդը որդեգրել էր «մարտ-հետախուզութեամբ» մարտավարութիւնը, այսինքն՝ փորձել են ստուգել մեր թոյլ եւ ուժեղ կողմերը, ինչպէս նաեւ՝ սեփական զինծառայողների մարտական պատրաստութիւնը: Սակայն գերագնահատել էին իրենց հնարաւորութիւններն ու թերագնահատել առաջնագծում մեր կողմից իրականացուած աշխատանքների ծաւալները: Ադրբեջանի վերջին՝ փետրուարեան դիւերսիան  ցոյց տուեց, որ նրանք ունակ չեն նաեւ յաղթական արդիւնքով յատուկ նշանակութեան լոկալ գործողութիւնների: (Սահմանափակ տա-րողութեամբ-Խմբ.)

 

 ՇՈՒՇԱՆ ՍՏԵՓԱՆԵԱՆ.- Մէկ տարի առաջ դուք ստանձնեցիք միաւորման հրամանատարի պարտականութիւնները: Ինչպէ՞ս էք գնահատում ձեր ծառայութիւնը այս պաշտօնում: Ի՞նչ ձեռքբերումներ էք արձանագրել:

 ՋԱԼԱԼ ՅԱՐՈՒԹԻՒՆԵԱՆ.- Ինձ համար կարեւոր էր կարճ ժամանակահատուածում յստակ տիրապետել առաջնային գծի այս հատուածի առանձնայատկութիւններին, վեր հանել սպաներին ու զինուորներին մտահոգող եւ անհանգստացնող խնդիրները, խորապէս ճանաչել զօրքը: Հիմա յստակ պատկերացնում եմ, թէ ով ինչի է ընդունակ: Ինչ վերաբերում է հարաւային ուղղութեամբ իրականացուած աշխատանքներին, ապա յիշեալ ժամանակահատուածում, կարելի է ասել, ունեցանք նոր առաջնագիծ, որը յագեցած է տեխնիկապէս, ապահովուած է այլընտրանքային համակարգերով, բազմաթիւ անվտանգ ճանապարհներով, միաւորում-գունդ օղակում անհրաժեշտ արդիական սպառազինութեամբ: Մէկ տարուայ ընթացքում մի քանի անգամ բարձրացել է մարտական հերթապահութիւն իրականացնող զինուորի ապահովութեան աստիճանը: Իհարկէ, հիմնաւոր փոփոխութիւններ են կատարուել մարտական պատրաստականութեան ու հերթապահութեան կազմակերպման հարցերում, մարտավարութիւնում: Հիմնական շեշտը դրուել է տարբեր զօրատեսակների՝ հրետանի, հակաօդային պաշտպանութիւն, զրահատանկային զօրքեր, մոտօհրաձգային ստորաբաժանումներ, փոխգործակցութեան կատարելագործման վրայ: Պահպանելով գաղտնիութեան ռեժիմը՝ չեմ կարող մանրամասներ նշել: Այժմ մեր առաջնահերթութիւններից մէկը ծաւալուն քօղարկման միջոցառումների իրականացումն է:

 

 ՇՈՒՇԱՆ ՍՏԵՓԱՆԵԱՆ.- Պարոն գնդապետ, գիտեմ, որ շտապում էք հարաւ-արեւելեան պաշտպանական շրջան՝ ամփոփելու Մայիսի 29ից Յունիսի 2ը ենթակայ զօրամասերի ներգրաւմամբ անցկացուած մարտական հրաձգութեամբ գնդային մարտավարական զօրավարժութիւնը: Արդիւնքները բաւարա՞ր են:

 ՋԱԼԱԼ ՅԱՐՈՒԹԻՒՆԵԱՆ.- Ես կ՛ասէի՝ լաւ: Որոշ ստորաբաժանումների դէպքում՝ նոյնիսկ գերազանց: Զօրավարժութեանը ներգրաւուած էր միաւորման ամբողջ համազօրային պահեստուժն ու հրետանին: Հաշուի են առնուել ինչպէս ապրիլեան առճակատման օրերին տեղի ունեցած մարտական գործողութիւնների առանձնայատկութիւնները, այնպէս էլ հակառակորդի հաւանական գործողութիւնների բնոյթը: Մարտական հրաձգութեան փուլին հետեւել է ՊԲ հրամանատար, գեներալ-լէյտենանտ Լեւոն Մնացականեանը: Յատկապէս տպաւորիչ էին զրահատանկային գումարտակի գործողութիւնները, հրետանու եւ հակատանկային ստորաբաժանումների ուղիղ նշանառութեամբ եւ փակ կրակային դիրքից վարած դիպուկ կրակը:

Զօրավարժութիւնը ներդաշնակեց գունդը: Մեր ստորաբաժանումները պատրաստ են աւելի լայնածաւալ մարտական գործողութիւնների:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top