Գումարուեցաւ Գերմանիոյ Հայոց Թեմական-Պատգամաւորական Ժողովը

0000SEROVPE

0000SEROVPEՔԷՕԼՆ.- Յունիս 10էն 11 երկարող շաբաթավերջին, Գերմանիոյ Հայոց թեմի Քէօլնի մէջ գտնուող առաջնորդարանի յարկին տակ տեղի ունեցաւ Գերմանիոյ Հայոց թեմի թեմական-պատգամաւորական հերթական ժողովը՝ նախագահութեամբ Գերմանիոյ Հայոց առաջնորդ Գարեգին արք. Պէքճեանի եւ ատենապետութեամբ տոքթ. Խաչիկ Կազերի: Ժողովին ներկայ գտնուեցան թեմի հովանիին ներքոյ գործող 15 համայնքներու շուրջ 40 աշխարհական պատգամաւորներ, ինչպէս նաեւ Թեմէն ներս իրենց հոգեւոր ծառայութիւնը բերող 6 եկեղեցականներ:

Ժողովի բացումէն ետք առաջնորդական փոխանորդ Սերովբէ վրդ. Իսախանեան, ԹՊԺի դիւանի ատենապետ տոքթ. Խաչիկ Կազեր եւ Թեմական խորհուրդի ատենապետ Սերովբէ Օտապաշեան շնորհաւորեցին թեմակալ առաջնորդ Գարեգին արք. Պեքճեանը՝ Պոլսոյ Նուիրապետական աթոռի պատրիարքական տեղապահ ընտրուելուն առիթով: Անոնք նորընտիր պատրիարքական տեղապահին մաղթեցին ուժ, կորով եւ կարողութիւն՝ իր պատասխանատու առաքելութիւնը Աստուծոյ օրհնութեամբ յաջողութեամբ պսակելու համար: Այնուհետեւ ԹԽի Բ. ատենապետ Արա Վարդանեան ամփոփ գիծերու մէջ ներկայացուց թեմին 25 տարիներու գործունէութիւնը:

Երկօրեայ նիստերուն ընթացքին Թեմական-պատգամաւորական ժողովը քննարկեց օրակարգային զանազան հարցեր: Պատգամաւորներուն ներկայացուեցան առաջնորդարանի գործունէութեան 2016 թուականի տեղեկագրութիւնն ու նիւթական հաշուետուութիւնը, որոնց շուրջ տրուեցան նաեւ անհրաժեշտ լուսաբանութիւններ: Համայնքներու վարչութեանց ատենապետները եւ ընտրեալ պատգամաւորները առիթ եւ ժամանակ ունեցան խօսելու իրենց համայնքներու գործունէութեան, ունեցած դժուարութիւններուն եւ մտահոգութիւններուն մասին: Երկօրեայ նիստերու օրակարգը կ՛ընդգրկէր զանազան այլ հարցեր եւս, ինչպէս օրինակ՝ Թեմի 2016 թուականի հոգեւոր գործունէութիւնը, գերմանահայ միութիւններու եւ հաստատութիւններու, ինչպէս նաեւ Գերմանիոյ մէջ Հայաստանի դեսպանութեան հետ համագործակցութիւնը, թեմակալ առաջնորդի յայտարարութիւնը եւ այլն: Ներկայացուած նիւթերու շուրջ տեղի ունեցան աշխոյժ եւ օգտակար քննարկումներ, յայտնուեցան եւ մշակուեցան զանազան առաջարկութիւններ, որոնք յանձնուեցան Թեմական խորհուրդի ապագայ քննարկումներուն եւ ի պահանջել հարկին գործադրութեան համար:

Կիրակի օրուան նիստին ընթացքին յատուկ յայտարարութեամբ հանդէս եկաւ թեմակալ առաջնորդ Գարեգին սրբազանը: Գարեգին արքեպիսկոպոս ժողովականներուն տեղեկացուց, որ ինք 2017 Դեկտեմբեր 31ին պիտի հրաժարի Գերմանիոյ Հայոց առաջնորդի պաշտօնէն, իսկ մինչ այդ տրուած ըլլալով, որ ընտրուած է պատրիարքական տեղապահ եւ մեծաւ մասամբ պիտի բացակայի թեմէն, առաջնորդական փոխանորդ Սերովբէ վրդ. Իսախանեանը լիազօրած է ստանձնելու թեմին գործունէութիւնը ղեկավարելու պարտականութիւնները: Ան իր վստահութիւնը յայտնեց, որ Սերովբէ վարդապետ, որ կը վայելէ թեմական եւ համայնքային մարմիններու եւ հաւատացեալ ժողովուրդի սէրն ու յարգանքը, ամենայն պատասխանատուութեամբ պիտի փոխարինէ զինք եւ համակարգէ առաջնորդարանի եւ իրեն կապուած համայնքներու գործունէութիւնը: Առաջնորդ սրբազանը կոչ ըրաւ ժողովականներուն՝ աջակից ու լծակից ըլլալու առաջնորդական լիազօր փոխանորդին եւ հայցեց Աստուծոյ օրհնութիւնն ու օգնութիւնը իրեն: Ներկաները ծափահարութիւններով իրենց ուրախութիւնը արտայայտեցին թեմակալ առաջնորդին կատարած տնօրինութեան առիթով: Հայր Սերովբէ իր ակնածանքն ու շնորհակալութիւնը յայտնեց թեմակալ առաջնորդին եւ վստահեցուց, որ ամենայն բարեխղճութեամբ պիտի կատարէ իրեն վստահուած իրաւասութիւններն ու պարտականութիւնները:

Թեմակալ առաջնորդ Գարեգին արքեպիսկոպոս տեղեկացուց նաեւ, որ մօտ ապագային Թեմական խորհուրդին հետ համախորհուրդ կ՛որոշուի արտակարգ ԹՊԺ գումարելու թուականը եւ մինչեւ տարեվերջ տեղի կ՛ունենայ նոր թեմակալ առաջնորդին ընտրութիւնը՝ ըստ թեմական կանոնադրութեան տրամադրութիւններուն: Առաջնորդ սրբազանը նշեց նաեւ թէ՝ ինք պիտի փափաքէր, որ գումարուելիք ԹՊԺը նոր թեմակալ առաջնորդ ընտրէ Սերովբէ վրդ. Իսախանեանը եւ իր ամբողջական զօրակցութիւնը յայտնեց անոր:

Հայաստանի դեսպանութեան հետ համագործակցութեան օրակարգային հարցի քննարկման սկիզբը առաջնորդ սրբազանին հրաւէրով ԹՊԺին միացաւ նաեւ Գերմանիոյ մօտ Հայաստանի դեսպան Աշոտ Սմբատեան: Ան իր ուրախութիւնը յայտնեց հրաւէրին համար եւ նշեց, որ նաեւ այսուհետեւ պատրաստ է ամէն ջանք ներդրելու սերտացնելու համար փոխշահաւէտ համագործակցութիւնը առաջնորդարանին եւ անոր հովանիին տակ գործող համայնքներուն հետ: Պատգամաւորները առիթը ունեցան դեսպանին յղելու իրենց հարցումներն ու մտահոգութիւնները, որոնց դեսպանը տուաւ անհրաժեշտ լուսաբանութիւններ: Ան մանրամասնօրէն անդրադարձաւ նաեւ Հայաստանի Հանրապետութեան եւ Գերմանիոյ պետական, դիւանագիտական եւ տնտեսական փոխյարաբերութիւններուն, Արցախի հարցին մէջ Գերմանիոյ կեցուածքին եւ հնարաւոր զարգացումներուն:

Երկօրեայ ժողովը փակուեցաւ առաջնորդ սրբազանի օրհնութեան խօսքով, որուն յաջորդեց «Պահպանի»չ աղօթքը եւ միասնաբար արտասանուած Տէրունական աղօթքը:

 

Թղթակցութիւնը՝ Գերմանիոյ Հայոց Թեմի Առաջնորդարանի Դիւանէն

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top