«ՍԵՄԱՍ»ի Այնճարցի Աշակերտները UNESCO-ի Մրցումէն Վերադարձան Հինգ Բաժակով եւ 14 Ոսկէ Մետալով

0000AYNJAR

0000AYNJAR

26 Մայիսի առաւօտեան ժամը 10էն սկսեալ, ԵՈՒՆԵՍՔՕ-ի պալատին մէջ «ՍԵՄԱՍ» (Սորպոն էճիւքէյշըն ֆոր մենթըլ արիթմեթիք սիսթըմ) հաստատութենէն այնճարցի խումբ մը աշակերտներ իրենց մասնակցութիւնը բերին «ՍՄԱՐԹ» հաստատութեան կազմակերպած մտային հաշուարկութեան երկրորդ տարեկան մրցումին՝ հովանաւորութեամբ Լիբանանի կրթութեան նախարար Մարուան Համատէի:

Լիբանանի տարբեր շրջաններէ աւելի քան 800 աշակերտներ կը մասնակցէին այս մրցումին։ Այնճարի «ՍԵՄԱՍ» հաստատութիւնը ներկայացաւ 14 աշակերտներով՝ Քրիսթել Գազանճեան, Սարել Գարաքէշիշեան, Կարէն Պոյաճեան, Գաբրիէլ Հաւաթեան, Շանթ Քենտիրճեան, Լիւսի Հերկելեան, Կարէն Հերկելեան, Գառին Քենտիրճեան, Ժիւլի Փամպուքեան, Սելին Ապրումեան, Ալիսա Չափարեան, Լալէ Զէյթլեան, Մոսիկ Հերկելեան եւ Արթիւր Հեքիմեան:

Մրցումը ընթացք առաւ նախ 6 վայրկեան ABACUS-ի մասով, ապա՝ 2 վայրկեան մտային հաշիւի մասով: Մրցումին յաջորդեց մասնակցողներու վկայականի տուչութիւնը. կէսօրէն ետք տեղի ունեցաւ պաշտօնական բաժինը, որուն ներկայ էին Լիբանանի կրթութեան նախարարի խորհրդատու Անուար Տաու, հռչակաւոր բեմադրիչ եւ դերասան Տորետ Լահհամ, դպրոցներու տնօրէններ, ներկայացուցիչներ, ծնողներ եւ հոծ բազմութիւն մը:

Լիբանանի քայլերգը յոտնկայս ունկնդրելէ ետք խօսք առաւ «ՍՄԱՐԹ»ի տնօրէն Թարեք Հարմուշ, որ ողջունելէ ետք օրուան հովանաւորը՝ յատուկ ձեւով ողջունեց Լիբանանի մէջ «ԿԱՃՍՄԱ»ի (GAJSMA-Կլոպըլ ասոշիէյշըն աֆ ճեփընիզ Սորպոն էնտ մենթըլ արիթմեթիք) տնօրէն Պօղոս Քենտիրճեանը, ինչպէս նաեւ իր խօսքի աւարտին հրաւիրեց զայն, որ իր խօսքը արտասանէ:

Ձեռնարկի աւարտին տեղի ունեցաւ մրցանակաբաշխութիւն եւ բաժակներու տուչութիւն. բոլոր աշակերտները ստացան ոսկեայ մետալներ՝ բացառիկ յաջողութիւն արձանագրած ըլլալնուն պատճառով, ինչպէս նաեւ բաժակներ ստացան իւրաքանչիւր խմբակի բարձրագոյն նիշ հաւաքողները:

«ՍԵՄԱՍ»ի Այնճարի մասնաճիւղէն հետեւեալ աշակերտները ստացան բաժակներ բարձր գնահատանքով՝ Սելին Ապրումեան (սուփըր ախոյեան), Ալիսա Չափարեան (առաջին), Արթիւր Հեքիմեան (երկրորդ), Քրիսթել Գազանճեան (երրորդ), Գաբրիէլ Հաւաթեան (չորրորդ): Նշենք, որ տուեալ կարգը ընտրուած է իրենց ընդհանուրի հաւաքած նիշերու կարգով:

Աշակերտները վերադարձան Այնճար՝ հինգ բաժակ եւ 14 ոսկեայ մետալներով։

Նշենք, որ «ՍԵՄԱՍ» հաստատութիւնը միակ հայկական կեդրոնն է Լիբանանի մէջ, ուր համաշխարհային չափանիշներով կը դասաւանդուի մտային հաշիւ՝ ուղեղի զարգացման համար:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top