Ազգ. Ֆերահեան Երկրորդական Եւ Միջնակարգ Կարգերու Վկայականաց Բաշխման Հանդիսութիւններ

0617ferahian4

 

ՍԱԼԲԻ ԹԷՔԿԷԼԵԱՆ

 

Յունիս ամսուան երկրորդ շաբաթավերջի երկու օրերուն, Ազգային Ֆերահեան վարժարանի «Աւետիսեան» սրահէն ներս ցնծութեամբ, ուրախութեամբ եւ հպարտութեամբ լեցուն մթնոլորտ կը տիրէր. մթնոլորտ մը, որ իւրայատուկ է վարժարանի տարեշրջանը յաջողութեամբ աւարտած աշակերտին եւ ծնողքին, իսկ վարժարանի տնօրէնութեան եւ ուսուցչական կազմին համար՝ հպարտութեան եւ գոհունակութեան օր, որովհետեւ իրենց ընծայուած է անգամ մը եւս տեսնել փայլուն շրջանաւարտներ, որոնց մեծ մասը վկայուելով՝ պիտի բարձրանայ այլ դասարաններ, իսկ միւս մասը արդէն իսկ պատրաստ է նետուելու համալսարանական կեանքի մէջ:

Այդ օրերը Սրբոց Նահատակաց Ազգային Ֆերահեանի աւարտականի եւ միջնակարգի վկայականաց բաշխման հանդիսութեան օրերն էին։ Ներկայ էին թեմի առաջնորդ Մուշեղ արք. Մարտիրոսեան, Ռազմիկ քհնյ. Խաչատուրեան, ուսումնական եւ խնամակալ մարմիններու, ՀՅԴի Կեդրոնական կոմիտէի եւ շրջանի կոմիտէութիւններու, ինչպէս նաեւ՝ քոյր միութիւններու ներկայացուցիչներ, գլխաւոր բանախօսներ, Ազգ. Ֆերահեան վարժարանի տնօրէնուհի Սօսի Շանլեան, փոխտնօրէն Վարդգէս Նալպանտեան, ուսուցչական կազմը, ծնողներ եւ մեծ թիւով հարազատներ ու բարեկամներ:

Հանդիսութիւններուն բացումը կատարուեցաւ շրջանաւարտներու սրահ մուտքով, ապա՝ Ամերիկեան եւ Հայկական քայլերգներով: Հանդիսութիւններուն օրհնութիւնը կատարեց Ռազմիկ քհնյ. Խաչատուրեան:

Շաբաթ, Յունիս 10, 2017ին, կէսօրէն ետք ժամը 3ին տեղի ունեցաւ Ազգային Ֆերահեան վարժարանի աւարտական կարգի ամավերջի հանդէսը, որուն ներկայ էին բազմաթիւ հանդիսատեսներ: Ազգային քայլերգներէն եւ Ռազմիկ քհնյ. Խաչատուրեանի օրհնութեան աղօթքէն ետք, բացման խօսքով հանդէս եկան օրուան հանդիսավարներ Թալին Ճանեցեան (հայերէն) եւ Յասմիկ Ռոստամեան (անգլերէն): Աւարտական կարգէն Արտօ Նաշալեան (անգլերէն) եւ Նարեկ Գույումճեան (հայերէն) հրաժեշտի ուղերձները կարդացին, ապա օրուան հանդիսավարը բեմ հրաւիրեց Ազգային վարժարաններու Խնամակալ մարմինի ներկայացուցիչ դոկտ. Յասմիկ Պարանը, որպէսզի խնամակալ մարմինին խօսքը փոխանցէ:

Օրուան գլխաւոր բանախօսն էր 1980ի շրջանաւարտ Քրիս Քէօսեան, որ շրջանաւարտներուն խօսեցաւ իր փորձառութիւններուն մասին եւ յորդորեց, որ անոնք ձգտելով լաւագոյնին՝ առաջ երթան իրենց կեանքին մէջ, կառչած մնալով իրենց ինքնութեան:

Վահէ Պենլեան, փոխանցելէ ետք խնամակալ մարմինին խօսքը, վարժարանի երկրորդականի խորհրդատու Էլիզապէթ Յովհաննէսեան կատարեց կրթական մրցանակներու բաշխումը, իսկ Հայերէն բաժանմունքի պատասխանատու եւ ուսուցչուհի Անի Պերթիզլեան՝ նիւթական մրցանակներու բաշխումները:

Տնօրէնուհի Սօսի Շանլեան, խօսելէ ետք աշակերտներուն դիմագրաւած մարտահրաւէրներուն մասին՝ բարձր գնահատեց աւարտական աշակերտներուն բերած յաջող ձեռքբերումները, որոնց շնորհիւ այս տարի մեծ թիւով աշակերտներ ընդունուած էին բարձր մակարդակի համալսարաններ: Ան նաեւ խորհուրդ տուաւ աշակերտներուն, որ ըլլան միշտ երախտապարտ Աստուծոյ տուած բոլոր պարգեւներուն եւ շնորհքներուն համար, ինչպէս նաեւ՝ իրենց ծնողներուն կատարած անսահման զոհողութիւններուն եւ նուիրումներուն համար, իսկ ծառայելով ազգին ու հայրենիքին՝ հպարտ զգացնեն բոլորը: Ան, շնորհակալութիւն յայտնեց ուսուցիչներուն, վարժարանի աշխատակազմին եւ բոլոր անոնց, որոնք միշտ նեցուկ կանգնած են վարժարանին:

Ապա, առաջնորդ Մուշեղ արք. Մարտիրոսեան իր պատգամն ու օրհնութիւնը փոխանցեց՝ փառք տալով Աստուծոյ, որ դարձեալ բոլորին սրտերը հոգեկան գոհունակութեամբ եւ ցնծութեամբ լեցուցած էր՝ ի տես 2016-2017 տարեշրջանի Ֆերահեան Ազգ. վարժարանի 12րդ կարգի շրջանաւարտներու հանդիսութեան: Ան վստահեցուց ծնողներուն, որ իրենց զաւակները չէին կրնար հասնիլ բարձրագոյն արդիւնքի եւ չէին կրնար արժանանալ բացառիկ մրցանակներու՝ եթէ չունենային այն տիպար կրթական պատասխանատուները, որոնք անսակարկ նուիրումով, ազնուութեամբ եւ վեհանձնութեամբ՝ աշակերտներուն տուած էին իրենց լաւագոյնը: Ան աշակերտներուն յանձնարարեց, որ մի՛շտ պատրաստ ըլլան բարին խորհելու, խօսելու, եւ մի՛շտ բարին գործելով՝ դառնան այն սերունդը, որ պիտի ղեկավարէ ազգը եւ ըլլայ յանձնառու ջահակիրը «Ֆերահեան»ի խորհուրդին:

Ազգային Ֆերահեան վարժարանի ութերորդ դասարանի վկայականաց բաշխման հանդիսութիւնը տեղի ունեցաւ յաջորդ օրը՝ Կիրակի, Յունիս 11, 2017ին, կէսօրէն ետք ժամը 3ին: Ամերիկեան եւ Հայկական քայլերգներէն եւ Ռազմիկ քհնյ. Խաչատուրեանի օրհնութեան աղօթքէն ետք, բացման խօսքով հանդէս եկան օրուան հանդիսավարները՝ Սեզա Քիւրտեան (հայերէն) եւ Ովսաննա Գալուստեան (անգլերէն): Շրջանաւարտ կարգի ուղերձները կարդացին Թալին Քրիւմեան (հայերէն) եւ Էրիք Ենիգոմշեան (անգլերէն), ապա Լորի Կարապետեան անգլերէնով արտասանեց «Climb Till Your Dream Comes True», իսկ Թարա Ուրֆալեան՝ «Հայ Դպրոց» բանաստեղծութիւնները: Քանի որ վկայուած աշակերտները յառաջիկայ տարեշրջանին պիտի փոխադրուէին երկրորդական բաժանմունք, ա-նոնց բարի գալուստի խօսքը ուղղեց երկրորդականի 10րդ կարգէն Ովսաննա Աւետիսեան:

Օրուան բանախօսն էր 2007ի շրջանաւարտ Թենի Իսախանեան: Ան յորդորեց աշակերտները, որ պայքարին իրենց երազներու իրականացման համար եւ հասնին հո՛ն, ուր կայ աշխատանքի լաւագոյն հնարաւորութիւններ: Ան նաեւ աշակերտները քաջալերեց՝ ըսելով, որ ո՛ւր ալ տանի կեանքը իրենց, անոնք մնան հպարտ եւ դառնան հայ ազգի պարծանքը: Ուսումնական մարմինի խօսքը փոխանցեց Վիգէն Ֆըստըքճեան, իսկ մրցանակներու բաշխումը կատարեց միջնակարգի խորհրդատու Դրօ Չէքիճեան:

Վարժարանի տնօրէնուհի Սօսի Շանլեան իր հպարտութիւնը յայտնեց, որ միացած է Քալիֆորնիոյ առաջին հայկական ամէնօրեայ վարժարանի անձնակազմին, որպէսզի իր փորձառութեամբ եւ գործով վարժարանին լաւագոյնը նպաստէ եւ նորանոր յաջողութիւններ արձանագրէ։ Ան փառք տուաւ Աստուծոյ, որ միւս նուիրեալ ուսուցիչներուն հետ միասնաբար, կրցած էր աշակերտները մղել իրենց առաւելագոյնը տալու եւ մասնակցելով զանազան մրցոյթներու՝ իսկապէս փաստելու, թէ «Ֆերահեան»ը այն հնոցն է, ուր կարելի է կերտել տիպար հայ քաղաքացիներ, որոնք պարծանք պիտի դառնան իրենց ծնողքին, հայրենիքին եւ վարժարանին:

Տնօրէնուհին շնորհակալութիւն յայտնեց ծնողներուն, որոնք իրենց զաւակներու կրթութիւնը վստահած են այս դպրոցին, որ 53 տարիներէ ի վեր կը շարունակէ սերմանել հայկական ոգի, քրիստոնեայ դաստիարակութիւն եւ տիպար աշակերտի կեցուածք, ինչպէս նաեւ շնորհակալութիւն յայտնեց ուսուցչական կազմին եւ պաշտօնէութեան, որոնց նուիրեալ ջանքերով՝ «Ֆերահեան Ազգ. վարժարանը լաւագո՛յն կրթօճախն է եւ պիտի շարունակէ մնալ այդպիսին», եզրափակեց ան:

Երկու հանդիսութիւններու աւարտին կատարուեցան վկայականաց բաշխում:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top