Սուրբ Խաչ Մայր Տաճարի Հոգեգալստեան Սիրոյ Ճաշկերոյթը

0617hokekalousd

0617hokekalousdՄեր թեմի Սուրբ Գրոց սերտողութեան խմբակներու Հոգեգալստեան սիրոյ ճաշկերոյթ-հաւաքոյթը տեղի ունեցաւ Կիրակի, Յունիս 4ին, կ.ե. ժամը 2ին, Սուրբ Խաչ Մայր տաճարի «Թումանեան» սրահին մէջ։

Այս գեղեցիկ հաւաքոյթը կը վայելէր թեմիս բարեխնամ առաջնորդ Մուշեղ արք. Մարտիրոսեանի ներկայութիւնը եւ հովանաւորութիւնը։

Ներկայ էին նաեւ Մայր տաճարիս հոգեւոր տեսուչ Միւռոն Ծ. վրդ. Ազնիկեան, հոգեւոր հովիւ Աշոտ քհնյ. Գամպուրեան, Ազգային վարչութեան ներկայացուցիչ Անդրանիկ Գասպարեան եւ հոգաբարձութեան ներկայացուցիչ Կարպիս Աշըգեան։

Սիրոյ ճաշը բացուեցաւ սեղաններու օրհնութեամբ։ Առաջնորդ սրբազան հայրը բացատրեց Հոգեգալստեան խորհուրդը, որով հիմնուեցաւ առաջին քրիստոնէական եկեղեցին։ Ան քաջալերեց որ շարունակենք այս գեղեցիկ սովորութիւնը։ Առաւել, ան շեշտեց Հոգեգալստեան իմաստը՝ իրարու հետ միասին, միացած ենք մեր Տիրոջ Յիսուս Քրիստոսի։ Հայր Միւռոն նոյնպէս շեշտեց Հոգեգալստեան իմաստը. առաքեալները ու առաջին քրիստոնեաները միասնական կերպով եւ հաւատքով, Սուրբ Հոգիին զօրութեան ու հրաշքին ականատես եղան։

Ապա տէր Աշոտ գեղեցիկ կերպով երգեց «Առաքելոյ Աղաւնոյ» հոգեպարար շարականը։

Գրիգոր Մսըրլեան բարի գալուստ մաղթեց բոլորիս, յիշեցնելով թէ առաքեալները ու հաւատացեալ ժողովուրդը Սուրբ Հոգիով զօրացած, հիմը դրին քրիստոնեայ առաջին եկեղեցւոյ, ապա հրաւիրեց Յակոբ Տիգրանեանը՝ վարելու հաւաքոյթը։ Վերջինս շնորհակալութիւն յայտնեց բոլորին՝ իրենց ներկայութեան համար եւ հրաւիրեց Հեղինէ Հարպոյեանը, որ իր գեղեցիկ ձայնով երգեց «Հաւիկ մի պայծառ» շարականը։

Շաքէ Սեդրակեան եւ Հուրի Մսըրլեան կարդացին «Գործք Առաքելոց» Գիրքի երկրորդ գլուխ, 1-13 համարները. Ղուկաս Առաքեալ անոր մէջ կը նկարագրէ Սուրբ Հոգիին գալուստը. «Յանկարծ սաստիկ հովի մը սուլոցին պէս ձայն մը հնչեց երկինքէն եւ լեցուց ամբողջ տունը, ուր անոնք նստած էին։ Յետոյ անոնք տեսան հրեղէն լեզուներ, որոնք տարածուեցան եւ հանգչեցան իւրաքանչիւրին վրայ։ Բոլոր ներկաները Սուրբ Հոգիով լեցուեցան եւ սկսան տարբեր լեզուներով խօսիլ, ինչպէս որ Հոգին խօսիլ կու տար»։

Սագօ Կենճեան եւ Հրաչ Եսայեան, իրենց գեղեցիկ ձայնով ու նուագով ուրախ եւ տօնական մթնոլորտ մը ստեղծեցին բոլորիս համար։ Ապա Սիլվա Աւագեան երկու լեզուներով կարդացին Սուրբ Գրիգոր Նարեկացիի «Մատեան Ողբերգութեան» հատորէն հատուած մը, Նուարդ Պալըգճեան ընթերցեց Պօղոս Առաքեալի նամակը ուղղուած Կորնթոսի հաւատացեալներուն (Ա. Կորնթ. գլուխ 12, համարներ 4-11), որուն մէջ Պօղոս Առաքեալ հաւատացեալներուն կը բացատրէ Սուրբ Հոգիին շնորհքները եւ կարողութիւնները… «Սուրբ Հոգին ամէն մէկուն մէջ կը յայտնուի տարբեր ձեւով մը, հասարակաց օգուտին համար»։

Սագօ եւ Հրաչ մէջընդմէջ նուագով ու երգով խանդավառ պահեցին բոլորս։

Յակոբ Տիգրանեան հայերէնով բացատրեց, թէ Սուրբ Հոգին մեր մէջ կը բնակի, Ան մեզ կը մխիթարէ, Ան կ՛օգնէ մեզ մեր տկարութեան մէջ։ Սուրբ Հոգին մեզ կը վերանորոգէ եւ կը կնքէ, եւ գրաւական է, թէ պիտի ժառանգենք Աստուծոյ խոստումը (Բ. Կորնթ., գլուխ 1, համար 22)։

Նայիրի Գոճապապեան անգլերէնով պատգամեց, թէ Պենտեկոստէի օրը Պետրոս Առաքեալ Սուրբ Հոգիով լեցուն իր բազմաթիւ վկայութիւններուն եւ յորդորներուն վրայ «ոմանք համոզուեցան եւ մկրտուեցան»։ Այդ օր հաւատացեալներուն թիւը շուրջ երեք հազար հոգիով աւելցաւ (Գործք Առաքելոց, գլուխ 2, համարներ 1-42)։

Մատլէն Թաթոյեան իր գեղեցիկ առոգանութեամբ կարդաց Վահան Թէքէեանի «Եկեղեցին Հայկական» բոլորիս ծանօթ եւ խորիմաստ բանաստեղծութիւնը։

Էմմա Նովշադեան ընթերցեց Պօղոս Առաքեալի Հռոմի հաւատացեալներուն համար գրուած Թուղթէն (Հռոմ. գլուխ 12, համարներ 3-9)։ Առաքեալը հոս կը բացատրէ, թէ «ինչպէս մեր մարմինը բազմաթիւ անդամներ ունի, որոնց պաշտօնը նոյնը չէ սակայն, այնպէս ալ Քրիստոսի միացած ըլլալով՝ մենք բոլորս մէկ մարմին ենք։ Բայց Աստուծոյ շնորհքը իւրաքանչիւրիս տարբեր պարգեւ մը տուած է՝ զոր պէտք է գործածենք, ծառայելու, ուսուցանելու, յորդորելու, իր ունեցածը ուրիշներուն բաժնելու, վերակացու ըլլալու եւ խնդութեամբ ողորմութիւն ընելու»։

Աստուածաշունչի վերջին ընթերցումը կատարեց Թագուհի Սիմոնեան (Թուղթ Եփեսացւոց, գլուխ 4, համարներ 4-7)։ Պօղոս Առաքեալ կը պատուիրէ. «Միշտ խոնարհ ու հեզ եղէք եւ համբերատար, եւ ձեր սէրը ցոյց տուէք հանդուրժելով իրարու։ Ջանացէք Սուրբ Հոգիին շնորհած միութիւնը պահել խաղաղութեան շաղկապով. մէկ է մարմինը եւ մէկ՝ Սուրբ Հոգին, ինչպէս մէկ է յոյսը՝ որուն հրաւիրեց ձեզ Աստուած»։

Հանդիսութեան աւարտին Յակոբ Տիգրանեան շնորհակալութիւն յայտնեց բոլոր մասնակցողներուն։ Նաեւ շնորհակալութիւն՝ Սուրբ Խաչ Մայր տաճարի հոգաբարձութեան, «Թումանեան» սրահը մեզի տրամադրելով։

«Կիլիկիա» երգով վերջ գտաւ այս հոգեպարար եւ քրիստոնէական սիրոյ ճաշ-հաւաքոյթը, բոլորս միացնելով մեր Տիրոջ Յիսուս Քրիստոսի մարմինին։

Սրտաբուխ նուիրատուութեանց գումարը յանձնուեցաւ Մայր տաճարիս հոգաբարձութեան՝ գործածուելու եկեղեցւոյս պայծառութեան համար։

 

ՆԵՐԿԱՅ ՄԸ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top