Խիղճի Պարտք

0614PilibosJuniors

0614PilibosJuniors

ԹԱՄԱՐ ԹԻՒՖԷՆԿՃԵԱՆ

 

Արդէն տարի մը անցած է Ապրիլեան քառօրեայ պատերազմի ցնցիչ օրերէն, երբ ազգովին ապրեցանք այն, ինչ կը կատարուէր մեր արծուաբոյն Արցախի սահմանին վրայ: Երբեaք չենք կրնար մոռնալ եւ չենք ներեր մեր ազգային հպարտութիւնը վիրաւորող թրքական սադրիչ արարքը, մեր երկրի սահմանները խոշտանգող անընդունելի գործը, բայց ամէնէն աւելին՝ մեր ազգային մարտունակ բանակի ընտրանին հնձող, անոնց ազնիւ կեանքը խլող բարբարոս գործը:

«Թիզ մը անգամ չենք զիջիր». այս միայն Արցախէն բարձրացող կանչ չէր, այլ՝ ամբողջ աշխարհէն ձեռք մեկնող հայու աղաղակ մը, որուն մէջ կայ հայրենասիրութեան կանչ: Հայրենի կռունկը կը կանչէր եւ անշուշտ այդ կանչին չէին կրնար չանսալ Ամերիկայի հեռաւոր ափերուն վրայ հասակ առնող ու զարգացող հայ պատանին ու երիտասարդը:

«Փոքրիկ Հայաստան»ի Փիլիպոս վարժարանի բաբախող մեծ սիրտին մէջ հասակ առած աշակերտը ապրեցաւ ամէն պահ իր ազգին սպառնացող արհաւիրքը: Թէեւ իր հայրենիքէն հազարաւոր մղոններ հեռու կը գտնուի սփիւռքահայ աշակերտը, բայց հոգիին եւ միտքին խորքը կ՛ապրի իր հայրենիքը: «Փիլիպոս»ի աշակերտը արձագանգեց այդ վտանգին եւ վահան դարձաւ՝ բոլոր այն վտանգներուն դէմ ծառանալով եւ ամէն առիթի իր արժանավայել կեցուածքները դրսեւորելով:

Մեր աշակերտները իրենց դպրոցական առօրեան դարձուցին զինուորներու իրավիճակը, զոհողութիւնը եւ սահմանի վրայ կատարուած իրադարձութիւնները: Անոնց մայրերուն լացով ազդուեցան, անոնց կատարած սխրանքներով հպարտացան եւ իրենց ազգային գիտակցութեան ու պահանջատիրութեան ուխտը վերանորոգեցին՝ հաւատալով, որ հայրենիքի պահապան զինուորը իր արիւնով պէտք է հայրենիքը պաշտպանէ, իսկ թուրքը երբե՛ք պիտի չփոխէ իր վայրագ դիմագիծը: Երբեմն կեանքի դասերը շա՛տ սուղ գին կ՛ունենան, բայց անոնք կրնան ապագայ սերունդին համար դաստիարակիչ բնոյթ կրել:

2016ի Մայիսին, մեր աշակերտները անմիջականօրէն ձեռք մեկնեցին զոհուած ընտանիքներուն: 11րդ կարգի Հայաստան ուխտագնացութեան ընթացքին, անոնք այցելութիւններ տուին Հայաստանի զանազան շրջանները գտնուող զոհուած զինուորներու ընտանիքներուն եւ իրենց նիւթական օժանդակութիւնը բերին՝ անոնց տնտեսական վիճակը քիչ մը մեղմելու յոյսով: Մինչեւ անգամ այցելեցին հայկական բանակի սահմանապահ, զոհուած եւ գլխատուած եզիտի զինուորի ծնողքին ու վշտակցեցան անոր հետ՝ խոնարհելով հերոս զինուորի յիշատակին: Ընտանիքը նիւթական չափազանց համեստ պայմաններ ունէր, բայց հոգեպէս այնքա՛ն հարուստ էր, որ գիտակցութիւնն ունէր ըսելու, թէ «միւս որդիս ալ պատրաստ է հայրենիքին ծառայելու»: Անբացատրելի դաս մըն էր Սլոյեան Քարամի ընտանիքին այցելութիւնը, ուր հանդիպեցանք այնպիսի անձնաւորութիւններու, որոնք հազիւ նստելու կամ քնանալու տեղ ունին իրենց տան մէջ, բայց ամէնէն թանկը՝ որդին, նուիրաբերած են հայրենիքին: Այցելութիւնները այնքա՛ն տպաւորած էին աշակերտները, որոնք ամբողջ տարի մը անոնց մասին մտածեցին ու այդ զինուորներու ընտանիքներուն հետ իրենց կապը շարունակեցին:

Այս տարի եւս աւանդութիւնը շարունակեցինք: Որոշած էինք 2017ի Յունուարէն ի վեր Արցախի եւ Հայաստանի հողին համար կռուող եւ զոհուող զինուորներու ընտանիքներուն այցելութիւններ կատարել ու նիւթական օժանդակութիւն տրամադրել անոնց: Ինչպէս նաեւ այցելեցինք ՊՆ «Մուրացան» հիւանդանոցին մէջ բուժուող՝ պատերազմի ընթացքին վիրաւորուած զինուորներուն: Անբացատրելի յուզիչ տեսարաններ էին, որոնց ընթացքին խոնաւ աչքերով, երբեմն ալ փղձկալով ու հեկեկալով, շուտափոյթ ապաքինում մաղթեցինք անոնց ընտանիքներուն: Յուզում եւ հպարտութիւն, ցասում եւ համբերութիւն, «փարատոքս»ային այս զգացումներով շա՜տ բան սորվեցան մեր աշակերտները: Անոնք տեսան, թէ Բերձոր բնակող եւ իր անդրանիկ որդին կորսնցուցած հերոս Արայիկի հայրը կը շարունակէ յայտարարել. «Ես 8 զաւակ ունիմ, իմ զոհուած Արայիկս միշտ մեր հետ է»: Իսկ պատասխանելով այն հարցումին, թէ միւս որդիները պիտի ծառայե՞ն, հպարտօրէն կը յայտնէ. «Շուտով երկրորդ որդիս կը զօրագրուի»:

Աշակերտները առիթ ունեցան 13 այցելութիւններ կատարելու. անոնցմէ մասն մը զոհուածներու ընտանիքներու, իսկ ոմանք՝ վիրաւոր զինուորներու եւ երկարատեւ դարմանումներու ընթացքի մէջ եղողներու: Այցելութիւնները հոգեկան խռովք, հպարտութիւն ու ցաւ յառաջ բերող զգացական պահեր էին՝ բոլորի՛ն համար:

Այցելեցինք հետեւեալ զոհուած զինուորներու ընտանիքներուն.

Մարատ Խաչանեան, Արամ Առուշանեան, Արման Ստեփանեան, Էրիկ Նազարեան, Արայիկ Օրդուբէկեան (Քաշաթաղ) եւ Բարիզ Օնմանեան (եզիտի)։

Իսկ հետեւեալ զինուորները կամ սպաները, որոնք պատերազմի կամ խաղաղ օրերու հերթապահութեան ժամանակ վիրաւորուած էին, անոնց հետ անձամբ հանդիպելու առիթը ունեցանք.

Արսէն Առաքելեան, Սարգիս Մովսիսեան, Ալեքսան Աւաննէսեան, Դաւիթ Թադէոսեան, Ազնաւուր Բալէյեան, Շիրազ Սահակեան եւ Նարեկ Գրիգորեան։

Հպարտ ենք մեր զոհուած զինուորներով եւ անոնց ընտանիքներով, յատկապէս՝ անոնց հերոսածին մայրերով, որոնք նոյնիսկ իրենց ամէնէն խոր վիշտին մէջ կրցան մեզ դիմաւորել ու ի հարկին՝ մեզի հայրենասիրութեան եւ համբերատարութեան դաս փոխանցել:

Առաքելութիւն եւ ազնիւ պարտականութիւն, զորս կատարեցինք հպարտութեամբ՝ մեր ազգային խիղճը հանգստացնող պարտքը տալով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top