Թուրքիա 2.6 Միլիոն Տոլար Կը Ծախսէ՝ Լոպիիստական Եւ PR-ի Նոր Ընկերութիւններ Վարձելու Համար

Harout-Sassounian

ՅԱՐՈՒԹ ՍԱՍՈՒՆԵԱՆ

 

Harout-SassounianԱնցեալ շաբաթ գրած էի թրքական կառավարութեան կողմէ վարձուած տասնեակէ մը աւելի հանրային կապերու եւ լոպիիստական ընկերութիւններու մասին: Վերջին շաբաթներուն Թուրքիոյ Հանրապետութիւնը անոնց թիւը աւելցուց երկու նոր ընկերութիւններով՝ «Պալըրտ Փարթնըրզ» (Ballard Partners) եւ «Պըրսըն-Մարսթելըր» (Burson-Marsteller):

Թուրք պաշտօեաները կարծես թէ չեն գիտակցիր, որ տասնեակէ մը աւելի լոպիիստական ընկերութիւններ ունենալը ոչ միայն դրամի վատնում է աւելորդ կրկնօրինակման պատճառով, այլեւ թանկարժէք ժամանակի անիմաստ կորուստ՝ Ուաշինկթընի մէջ Թուրքիոյ դեսպանատան առանձին պաշտօնեաներու, որոնք ամէն օր իրենց ժամանակը կը վատնեն այդ լոպիիստական ընկերութիւններուն մանրամասն հրահանգներ տալով, անոնց զեկոյցները կարդալով եւ մեկնաբանելով, անոնց հետ հանդիպումներ ունենալով, անոնց զեկոյցները ծաւալուն բացատրութիւններով արտաքին գործոց նախարարութիւն փոխանցելով եւ Անգարայի արձագանգին հիման վրայ փոփոխութիւններ ընելով: Թիւով այդքան շատ լոպիիստական ընկերութիւններու հետ աշխատելով, առանց եռանդուն եւ լուրջ ջանքեր գործադրելու, թուրք պաշտօնեաները պարզապէս կը վատնեն իրենց երկրին դրամները…

Ես ուրախ եմ, որ Թուրքիոյ կառավարութիւնը որոշած է աւելի գումարներ վատնել՝ համաձայնելով վճարել 1.5 միլիոն տոլար Պրայըն Պալըրտի ընկերութեան, 15 Մայիս 2017էն մինչեւ  14 Մայիս 2018 ինկած ժամանակահատուածին համար: Ըստ արդարադատութեան նախարարութեան մէջ Պալարտի արձանագրութեան՝ ընկերութիւնը թրքական կառավարութեան կը տրամադրէ «շահերու պաշտպանութեան ծառայութիւններ Ամերիկայի Միացեալ Նահանգներ-Թուրքիա երկկողմանի յարաբերութիւններու մէջ»: Լոպիիստական գործունէութիւնը կը ներառէ «իրազեկում, խորհրդատուութիւն եւ օժանդակութիւն (Թուրքիոյ)՝ Միացեալ Նահանգներու պետական պաշտօնեաներու հետ կապերու մէջ» եւ յարաբերութիւններու պահպանում ՆԱԹՕի այս կարեւոր գործընկերոջ հետ»:

Պրայան Պալըրտ եղած է նախագահ Տանըլտ Թրամփի երկար տարիներու լոպիիստը՝ իբրեւ Թրամփի կազմակերպութեան ներկայացուցիչ Թալահասիի մէջ, Ֆլորիտա: Ան հաւաքած է 16 միլիոն տոլար Թրամփի նախագահական ընտրարշաւին համար, երբ կը ծառայէր որպէս անոր նահանգային ֆինանսներու նախագահ, իսկ հետագային՝ որպէս նախագահի երդմնակալութեան յանձնախումբի փոխնախագահ: Պալըրտ հանդէս եկած է յայտարարութեամբ՝ պնդելով, որ ինք «դեռ նախկինին պէս կը խօսի Թրամփի հետ»: Սիւզի Ուիլզ, զոր Պալըրտ Թրամփին ներկայացուցած էր ընտրարշաւին ընթացքին, կ՛աշխատէր որպէս Թրամփի Ֆլորիտայի նախընտրական խումբի ղեկավար: Ան այժմ կ՛աշխատի «Պալըրտ Փարթնըրզ»ին համար: Պալարտ նաեւ վարձած է նախկին քոնկրեսական Ռապըրթ Ուեքսլըրը (դեմոկրատ, Ֆլորիտա)՝ տնօրինելու համար թրքական լոպիիստական հաշիւը: Որպէս Քոնկրեսին մէջ Թուրքիոյ աջակցութեան խումբի համանախագահ, գոնկրեսական Ուեքսլըր աշխուժօրէն քարոզած եւ դէմ քուէարկած է 10 Հոկտեմբեր 2007ին Ներկայացուցիչներու տան առաջարկած Հայոց Ցեղասպանութեան վերաբերեալ բանաձեւին: Ուեքսլըրի նոր աշխատանքը հատուցումն է իր յամառ ջանքերուն՝ երկար տարիներ Քոնկրեսին մէջ Թուրքիոյ աջակցելու ուղղութեամբ…

Ինչպէս կը յայտնէ «Թեմթա Պէյ Թայմզ»ը (Tampa Bay Times)՝ Պալըրտի առաջին գործակցութիւնը Թրամփի հետ տեղի ունեցած է քանի մը տարի առաջ, երբ ան նամակ գրած էր Թրամփին, վերջինիս «Գործարքներ Կնքելու Արուեստը» գիրքը կարդալէ ետք, եւ Թրամփ պատասխանած էր անոր: Իր պատասխան-նամակին մէջ Պալըրտ նշած էր. «Ֆլորիտայի մէջ որեւէ հարց ունենալու պարագային, կը խնդրեմ, որ առանց երկմտելու հեռաձայնէք ինծի»: Թրամփ Պալըրտին հեռաձայնած էր 1985ին, «Մար-ա-Լանկօ»ն (Mar-a-Largo) գնելէ ետք եւ անոր վճարած՝ առնուազն 460 հազար տոլար՝ 2013էն 2015 կատարած լոպիիստական աշխատանքին համար: Թրամփ անձամբ հեռաձայնած էր Պալըրտին՝ խնդրելով անոր օգնութիւնը իր նախընտրական քարոզարշաւը սկսելու ատեն: Պալըրտ այժմ Թրամփի համար կը կազմակերպէ դրամահաւաք-ճաշկերոյթ, որ տեղի պիտի ունենայ Յունիս 28ին: Իւրաքանչիւր անձի համար սակ ճշդուած է 35 հազար տոլար, իսկ հիւրընկալող յանձնախումբին միանալու համար՝ 100 հազար տոլար:

Պալըրտ չի թաքցներ նախագահ Թրամփի հետ ունեցած իր յատուկ կապերը: Ան «Թեմթա Պէյ Թայմզ»ին ըսած է. «Ես չեմ պատկերացներ, որ հոս կ՛ըլլայի, եթէ ընտրուէր Հիլըրի Քլինթընը»: Պալըրտ ըսած է, թէ «ինք չի քննարկեր, թէ ինչպես կ՛աշխատի կամ ինչպէս կը  շփուի նախագահին հետ: Այսուհանդերձ ինք երեւցած է Սպիտակ Տան մէջ, եւ Թրամփ կը պահպանէ հեռախօսային կապերը իր դաշնակիցներուն հետ»:

Բացի ասկէ, Թուրքիոյ դեսպանատունը Ուաշինկթընի մէջ 1.1 միլիոն տոլարի պայմանագիր ստորագրած է «Պըրսըն-Մարսթելըր» ընկերութեան հետ, 1 Մայիսէն մինչեւ 31 Դեկտեմբեր 2017  ինկած ժամանակահատուածին համար: Զարմանալի է, որ 2012-2015 թուականներուն, «Պըրսըն-Մարսթելըր» լոպիիստական աշխատանք կը կատարէր Ընդհանուր արժէքներու միութիւն խումբին համար, որ կապուած էր թուրք մահմետական հոգեւորական Ֆեթուլլահ Կիւլենի հետ, որուն Էրտողան դէմ է եւ կը ձգտի Միացեալ Նահանգներէն Թուրքիոյ անոր արտայանձնման: Թուրքիոյ կառավարութիւնը սպառնացած է «Պըրսըն-Մարսթելըր»ի գործունէութեան՝ Թուրքիոյ մէջ, եթէ ընկերութիւնը շարունակէ լոպիինկ ընել Կիւլենի համար:

Կը նախատեսուի, որ «Պըրսըն-Մարսթելըր»ը կը տրամադրէ «ամբողջական հանրային կապերու ծառայութիւններ, որպէսզի աջակցի (թրքական) դեսպանատան հաղորդակցութեան նպատակներուն, Միացեալ Նահանգներու մէջ: Գործունէութիւնը կը ներառէ լրատուական միջոցներու իրազեկում, հոսկողութիւն եւ վերլուծութիւն, ձեռնարկի աջակցութիւն, շահագրգիռ կողմերու ներգրաւում, ընկերային լրատուական միջոցներու խորհրդատուութիւն եւ աջակցութիւն Թուրքիոյ հիւպատոսութիւններու՝ Պոսթընի, Շիքակոյի, Հիւսթընի, Լոս Անճելըսի, Մայամիի եւ Նիւ Եորքի մէջ:

Ուշագրաւ է այն, որ հակառակ Թուրքիոյ կողմէ տասնեակէ մը աւելի հաշուող լոպիիստական եւ հանրային կապերու հզօր ընկերութիւններու վրայ միլիոնաւոր տոլարներ ծախսուելուն, այս վերջինները չեն կրնար հակադրուիլ մեծ թիւով շրջան ընող այն լուրերուն եւ հեռատեսիլի լուսաբանումներուն, որոնք կը քննադատեն Թուրքիոյ կառավարութիւնը՝ խաղաղ ցուցարարներու վրայ Էրտողանի թիկնապահներու յարձակման համար, Մայիս 16ին, Ուաշինկթընի մէջ, Թուրքիոյ դեսպանի նստավայրին դիմաց: Այս փաստը կը հաստատէ իմ այն խորին համոզումը, որ Թուրքիա տարեկան միլիոնաւոր տոլարներ կը վատնէ՝ Միացեալ Նահանգներու մէջ իր պատկերը (image) մաքրելու համար, ինչ որ աւելի եւս կը վարկաբեկուի Թուրքիոյ կառավարութեան դաժան քաղաքականութեամբ՝ երկրին թէ՛ ներսը, թէ՛ դուրսը…

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top