Հայրապետական Կոնդակ Եւ Վարդապետական Լանջախաչ՝ Տաճատ Վրդ. Աշըգեանին

0000Dajad Ashekian1

ՖՐԵԶՆՕ.- Ս. Էջմիածինի տաճարի հիմնադրութեան տօնին եւ Հայրերու օրուան առիթով, Արեւմտեան թեմի առաջնորդ Մուշեղ արք. Մարտիրոսեան Կիրակի, Յունիս 18ին, Ֆրեզնոյի Ս. Երրորդութիւն Մայր եկեղեցւոյ մէջ հանդիսապետեց Ս. պատարագին, քարոզեց եւ Արամ Ա. կաթողիկոսին կողմէ շնորհած հայրապետական կոնդակն ու լանջախաչը հանդիսաւոր կերպով յանձնեց հոգեւոր հովիւ Տաճատ վրդ. Աշըգեանին։

Պատարագին ընթացքին, «Ուրախ Լեր» շարականին երգեցողութենէն ետք, առաջնորդը ընթերցեց կոնդակը եւ լանջախաչը յանձնեց հայր Տաճատին։ Այս պատիւին առիթով, սրբազանը շնորհաւորեց հոգեւոր հովիւը եւ յայտնեց, որ գեղեցիկ զուգադիպութեամբ մը, հայր սուրբին վարդապետական օծման 5րդ տարեդարձն էր, գնահատեց մեր եկեղեցւոյ ու մասնաւորապէս Ֆրեզնոյի ծխական համայնքին մատուցած ծառայութիւնները։

Նկատի ունենալով, որ նոյն օրուան կը զուգադիպէր նաեւ առաջնորդ սրբազանին կուսակրօն քահանայ ձեռնադրութեան 41րդ տարեդարձը, ան յատուկ կարեւորութեամբ կանգ առաւ քահանայական ծառայութեան կոչուող հոգեւորականի մը արժանիքներուն ու անկէ սպասումներուն մասին, նշելով, որ ան կոչուած է ըլլալու բարի հովիւ, ղեկավար, ուսուցիչ, խորհրդատու եւ դեռ աւելին։

Սրբազանը գնահատանքով խօսեցաւ հայր սուրբին արժանիքներուն մասին, նշելով, որ ան հաւատարիմ է իր կոչումին եւ մաղթեց, որ այս պատիւը նոր մղում տայ իր ծառայական կեանքին եւ հաւատացեալները հրաւիրեց անոր հետ գործակցաբար յառաջ տանելու ծխական համայնքի աշխատանքները։

Կիրակին նաեւ Հայրերու տօնն էր։ Առաջնորդը շնորհաւորանքի խօսք ուղղեց բոլոր հայրերուն, վեր առնելով ընտանիքի հոգատարը ըլլալու, դաստիարակի եւ տիպար օրինակ ըլլալու անոնց առաքինութիւնները։ Ան հայրերը յորդորեց լիարժէքօրէն անդրադառնալու իրենց արժանիքներուն եւ յանձնառութիւններուն, նաեւ իրագործելու ընտանիքին ու մարդկային ընկերութեան մէջ իրենց վերապահուած առաքելութիւնը՝ ի խնդիր իրենց զաւակներուն հոգեմտաւոր զարգացումին։

Իր պատգամին մէջ, առաջնորդը կանգ առաւ օրուան խորհուրդին վրայ, յիշելով, որ մեր եկեղեցին այդ օրը կը տօնէ Ս. Էջմիածինի Տաճարի տօնը, իսկ նախօրեակին նշուած էր Ս. Գրիգոր Լուսաւորիչ հայրապետի Խոր Վիրապէն ելքի յիշատակը։ Սրբազանը հակիրճ կերպով անդրադարձաւ Ս. Էջմիածինի հիմնադրութեան եւ ըսաւ, որ Ս. Գրիգոր Լուսաւորիչ ունէր հզօր ու անսասան հաւատք, որուն շնորհիւ, ան 13 տարի տոկաց ամէն տանջանքի եւ փրկուեցաւ Խոր Վիրապէն։

Վերջապէս, առաջնորդը անդրադարձաւ օրուան Աւետարանի հատուածին, ուր Յիսուսի կողմէ կը շեշտուէր ճշմարիտ աշակերտութիւնը, եւ իբրեւ իր հօտին անդամները՝ մեզ կը հրաւիրէ հետեւելու իր ուղիին։

«Այս տօնական օրը, եւ ներշնչուած տօնին խորհուրդէն, ընթերցումէն եւ մասնաւորաբար մեր Հաւատոյ Հօր օրինակէն, եկէ՛ք, վերանորոգենք ու ամրացնենք մեր հաւատքը», եզրափակեց առաջնորդ սրբազանը։

Արարողութիւնը վերջ գտաւ «Կիլիկիա»ի խմբերգումով։

Աւարտին, հաւատացեալները շնորհաւորեցին հայր Տաճատը. հոգաբարձութիւնը կազմակերպած էր ճաշի ընդունելութիւն։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top