Հայկազեան Համալսարանի Բարգաւաճման Յանձնախումբի Ձեռնարկին Կը Տօնուի Վեր. Մարգարեանի 100րդ Տարեդարձը

0000Markarian100th

 

0000Markarian100th

 

ՍԵՏԸԼ ՌԻՎԸՐ, Նիւ Ճըրզի.- Ամերիկայի Հայ Աւետարանչական միութեան հարիւրամեակին առիթով, Հայկազեան համալսարանի բարգաւաճման յանձնախումբը հիւրընկալած է յատուկ ձեռնարկ մը, որ առիթ հանդիսացած է տօնելու համալսարանի հիմնադիր տնօրէն՝ վեր. դոկտ. Ճան Մարգարեանի 100րդ տարեդարձը։ Ձեռնարկը տեղի ունեցած է Յուլիս 22ին, համալսարանի շրջանաւարտներէն Անտրէաս Ռուպեանի Նիւ Ճըրզիի բնակարանին մէջ։

Ներկաները ողջունած է հանդիսավար Սերժ Պուչաքճեան՝ դրուատելով համալսարանին մատուցած սպասարկութիւնները, իսկ բացման աղօթքը մատուցած է Արեւմտեան Ամերիկայի Հայ Աւետարանչական միութեան գործադիր վարիչ Լեւոն Ֆիլեան։

Իր կարգին, Ամերիկայի Հայ Աւետարանչական միութեան գործադիր վարիչ Զաւէն Խանճեան ներկայացուցած է միութեան իրագործումները՝ Հայաստանի եւ Սփիւռքի տարածքին, որոնց մէկ մասն է Հայկազեան համալսարանին ցուցաբերուող օժանդակութիւնները։ Ան նաեւ դոկտ. Մարգարեանին յանձնած է Արամ կաթողիկոսին յղած շնորհաւորագիրը, ուր կը նշուի, թէ կաթողիկոսը դոկտ. Մարգարեանի ուսանողը եղած է 1970ականներու սկիզբը, Մերձաւոր Արեւելքի Աստուածաբանական վարժարանին մէջ (Պէյրութ)։

Ելոյթ ունեցած է նաեւ Ճոյս Սթայն, որ համալսարանի հիմնադիրներէն՝ Ստեփան Փիլիպոսեանի դուստրն է եւ միաժամանակ՝ Ամերիկայի Հայ Աւետարանչական միութեան վարչութեան ու համալսարանի հոգաբարձութեան անդամ։ Սթայն ներկայացուց վեր. Մարգարեանը, որ համալսարանի առաջին տնօրէնի պաշտօնը ստանձնած էր՝ «Միջին Արեւելքի մէջ կրթութեան դիմագիծը փոխելու» առաջարկով, եւ կրցած էր մէջտեղ բերել որակաւոր համալսարան մը, որ մինչեւ այսօր իր առաքելութիւնը կը շարունակէ ներկայ տնօրէն վեր. դոկտ. Փօլ Հայտոսթեանի գլխաւորութեամբ։

Ապա, մեծարեալը շնորհակալութիւն յայտնած է իր 100ամեակին առիթով կատարուած բարեմաղթութեանց համար, միաժամանակ շնորհակալութիւն յայտնելով բոլոր անոնց, որոնք նպաստած են Հայկազեան համալսարանի վերելքին՝ դրուատելով յատկապէս համալսարանի ներկայ տնօրէնութեան տարած աշխատանքը։

Նշենք, որ այս առիթով դոկտ. Մարգարեանին շնորհաւորական եւ երախտագիտական պատգամ մը յղած էր նաեւ դոկտ. Փօլ Հայտոսթեան։

Նաեւ, ձեռնարկին ընթացքին յայտարարուած է, թէ Թինա եւ Տէյվիտ Սիկըլ պիտի ստանձնեն համալսարանի համացանցային կայքը վերամշակելու ծախսերը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top