Հայկական Դեղերու Արտածումը Ընդլայնելու Ուղղութեամբ Աշխատանքներ Կը Տարուին

0812albertsahagian

0812albertsahagianԵՐԵՒԱՆ.- Հայաստանէն դեղերու արտածման աշխարհագրութեան ընդլայնման նպատակով՝ հայկական դեղ արտադրողները աշխատանքներ կը տանին տարբեր երկիրներու մէջ, եւ որոշ արդիւնքներ արդէն արձանագրուած են:

Ըստ «Արմէնփրէս»ի՝ այս մասին խօսած է «Դեղերու եւ բժշկական սարքերու փորձագիտական կեդրոն»ի փոխտնօրէն Ալպերթ Սահակեան:

«Հայաստանի մէջ արձանագրուած դեղերուն շուրջ 10 տոկոսը հայկական արտադրութիւն են. անոնցմով կ՛ապահովուի հանրապետութեան դեղի պահանջարկի շուրջ 7 տոկոսը: Անոնք մասնաւորապէս տարբեր դեղաբանական խումբերու մէջ ընդգրկուած դեղահատեր են, փոշիներ, դեղապատիճներ, կաթիլային ներարկման լուծոյթներ, քսուքներ, մոմիկներ, ներքին եւ արտաքին ընդունման տարբեր լուծոյթներ եւ այլն: Հայաստան կը ներածուի հանրապետութեան բնակչութեան ու բժշկական հաստատութիւններուն անհրաժեշտ դեղերուն շուրջ 90 տոկոսը: Ըստ ներմուծման ծաւալներու յաջորդականութեան՝ 2016ի դրութեամբ, մեծ ներմուծողներն են Զուիցերիան, Հունգարիան, Գերմանիան, Ֆրանսան, Սլովենիան, Ռուսիան, Աւստրիան, Վրաստանը, Միացեալ Թագաւորութիւնը եւ Միացեալ Նահանգները», յայտնեց Ալպերթ Սահակեան եւ աւելցուց, որ դեղերու ներածումը ենթակայ է խիստ կարգաւորման, եւ որեւէ երկիր ներածման մատչելիութեան տեսանկիւնէն չի կրնար առանձնանալ:

Ըստ անոր՝ Հայաստանի մէջ արտադրուող դեղերը մեծ մասամբ կ՛արտածուին Իրաք, Մոլտովա, Ղազախստան, Տաճիկիստան, Ռուսիա, Լաթվիա, Վրաստան, Իւզպեքիստան, Պելոռուս, Ուքրանիա, Եմէն եւ Վիեթնամ: Արտահանող հիմնական ընկերութիւններն են «Արփիմեդ»ը, «Լիկուոր»ը, «Ֆարմատեք»ը եւ Երեւանի քիմիադեղագործական գործարանը:

«Մեր ունեցած տուեալներուն համաձայն՝ արտածման աշխարհագրութեան ընդլայնման նպատակով հայկական դեղ արտադրողները աշխատանքներ կ՛իրականացնեն զանազան երկիրներու մէջ, եւ որոշ արդիւնքներ արդէն արձանագրուած են: Օրինակ՝ «Լիկվոր»ը պատշաճ արտադրական գործունէութեան՝ GMP (ՊԱԳ) հաւաստագիր ստանալէ ետք դեղեր սկսած է  արտածելու դէպի Իրաք եւ Վիեթնամ», ըսաւ Սահակեան:

GMP չափանիշներուն համապատասխանող երեք ընկերութիւններէն մէկուն՝ «Արփիմետ» ընկերութեան գլխաւոր տնօրէն Վաչագան Ղազարեանի յայտնեց, արտածող երկիրներու աշխարհագրութիւնը տարուէ տարի կը մեծնայ: 2014էն ի վեր դեղեր կ՛արտածեն Թուրքմենիստան, Ղազախստան, իսկ այս տարուընէ՝ նաեւ Եմէն: «Ընդլայնման ուղղութեամբ տարբեր քայլեր կ՛իրականացնենք, կ՛ուսումնասիրենք տարբեր երկիրներու շուկաները, ցուցահանդէսներուն կը փորձենք մեր շուկան կարելի եղածին ձափ լաւ ներկայացնել», բացատրեց Ղազարեան:

Ալբերտ Սահակեան, իր կարգին տեղեկացուց, որ դեղերու արտադրութեան բնագաւառին մէջ հիմնական հարցերը նիւթական ներդրումներն են, ինչպէս նաեւ որակաւորուած մասնագէտներու պակասը: Այս հանգամանքներէն են կախուած արտածման հնարաւորութիւններն ու նոր շուկաներու նուաճումը: Սակայն դեղերու շրջանառութեան կարգաւորման նպատակով, վերջին տարիներուն օրէնսդրական դաշտին մէջ իրականացուած են բազմաթիւ աշխատանքներ, որոնցմէ են «Դեղերու մասին» Հայաստանի Հանրապետութեան նոր օրէնքի ընդունումը: «Ներկայիս, Հայաստանի առողջապահութեան նախարարութիւնը զբաղած է մշակումովը այդ օրէնքէն բխող շուրջ 60 իրաւական կանոններու, որոնց զգալի մասը կը գտնուի Հայաստանի կառավարութեան ընդունման, մէկ մասն ալ քննարկման փուլի մէջ:

Շրջանառութեան կարգաւորումը լաւ գործընթաց է եւ անընդհատ կը գտնուի ուսումնասիրութեան եւ կարգաւորման գործընթացին մէջ», եզրակացուց Ալբերտ Սահակեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top