Պաքու Կը Շահագործէ Ֆրանսական Ատեանը՝ Լռութեան Մատնելու Համար Լրագրողները

0906french
0906french

Լորան Ռիշար

 

ԵՐԵՒԱՆ, «Ազատութիւն».- Ֆրանսայի մէջ ատեան մը Սեպտեմբեր 5ին սկսած է քննելու Ատրպէյճանի կառավարութեան բացած դատը՝ ընդդէմ երկու ֆրանսացի լրագրողներու՝ Էլիզ Լիւսէի եւ Լորան Ռիշարի: Նշեալները երկու տարի առաջ Ֆրանսական հանրային պատկերասփիւռի կայանէն հաղորդումի մը ընթացքին բռնատիրական որակած էին Ալիեւի վարչակազմը։ Պաքուն, իր բացած դատին մէջ, այս հաստատումը «զրպարտութիւն» կը համարէ:

Արդարեւ, 2015ի Սեպտեմբերին, «Ֆրանս 2» կայանէն սփռուած յայտագիրի մը ընթացքին նշեալ լրագրողները բացայայտած են Ատրպէյճանի մէջ արձանագրուող մարդկային իրաւունքներու ոտնակոխման բազմաթիւ դէպքեր, միաժամանակ մանրամասնելով իրենց դիմագրաւած հալածանքը՝ իրենց կատարած նկարահանումներուն ընթացքին եւ անկէ ետք։

Հետաքննող լրագրողները ներկայացուցած են նաեւ եւրոպացի փորձագէտներու հետ հարցազրոյցներ, որոնց ընթացքին կը քննադատուին «Ալիեւի ձեռքը սեղմող» միջազգային կառոյցներու ղեկավարները, երբ Ատրպէյճանի նախագահը իր երկրին մէջ կը բանտարկէ բոլոր անոնք, որոնք վարչակազմէն տարբեր կը մտածեն:

Ֆրանսացի լրագրողները նաեւ բացայայտած են Ատրպէյճանի Առաջին տիկին Մեհրիպան Ալիեւայի հետ բաւական ուշագրաւ երկխօսութիւն մը: Արդարեւ, Փարիզի մէջ կայացած շարք մը միջոցառումներու ընթացքին Ատրպէյճանը իբրեւ հանդուրժող երկիր ներկայացնող Ալիեւան նեղ կացութեան մատնուած է, երբ լրագրողը անոր յիշեցուցած է, թէ Ատրպէյճանի մարդկային իրաւունքներու վիճակին մասին բազմաթիւ միջազգային ուսումնասիրութիւններ հակառակը կը վկայեն. այնուհետեւ տիկինը արագօրէն հեռացած է, իսկ անոր թիկնապահները լրագրողին հրահանգած են լուռ մնալ: «Մենք ֆրանսացի՛ ենք», թիկնապահներուն յիշեցուցած է լրագրողը՝ ընդգծելով, որ Ֆրանսայի մէջ լրագրողները հարցումներ հնչեցնելու իրաւունք ունին:

«Չբաւարարուելով իր երկրին մէջ բազմակարծութիւնը արմատախիլ ընելով՝ Ալիեւի վարչակազմը այժմ իր քննադատները թիրախ կը դարձնէ նաեւ արտերկրի մէջ», դատական նիստէն առաջ յայտարարած է «Լրագրողներ առանց սահմաններու» կազմակերպութիւնը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top