ՀՈԳԵՀԱՆԳԻՍՏ- ՄԱՀԱԽՕՍԱԿԱՆ Կայծակ Օհաննէսեան՝ Համեստ Ու Նուիրեալ Հայորդին

0907ohannesian
0907ohannesian

Ձախէն աջ՝ Անահիտ Օհաննէսեան, առաջնորդ Մուշեղ արք. Մարտիրոսեան եւ Կայծակ Օհաննէսեան

Կայծակ Օհաննէսեան ծնած է Ռումանիոյ Պուխարեսթ քաղաքը, 18 Օգոստոս 1929ին։ Ան միակ զաւակն էր Վահան եւ Նոէմի Օհաննէսեաններուն, որոնք Քեմաղ շրջանէն էին։

Կայծակը իր նախնական եւ երկրորդական ուսումը կը ստանայ Ռումանիոյ մէջ: Շրջանաւարտ կ՛ըլլայ Աքատեմիա Քոմերսիալանայէն՝ մասնագիտանալով տնտեսագիտութեան մէջ։ 24 տարեկանին կ՛ամուսնանայ Թագուհի Սայապալեանի հետ, եւ զոյգը կը բախտաւորուի դուստրով մը, զոր կ՛անուանեն Նատիա։

Կայծակը, բարձր ուսում եւ կարողութիւններ ունենալով՝ կը կարողանայ Ռումանիոյ կառավարական հաստատութիւններուն մէջ վարիչի պաշտօններ ստանձնել։ Ան իր մասնակցութիւնը բերած է Ռումանիոյ հայկական թատերական խումբին եւս։ Տաղանդաւոր անձ ըլլալով՝ Պուխարեսթ գտնուող «Շահումեան» թատերական ակումբին մէջ դերեր կը ստանձնէ։

1971ին, Օհաննէսեան ընտանիքը կը թողու համայնավար Ռումանիան եւ կը հաստատուի Միացեալ Նահանգներ։ Լոս Անճելըս քաղաքին մէջ, Կայծակ իր կնոջ հետ հաշուապահական յաջող գործ մը կը հաստատէ։ 1984ին, ան կը կորսնցնէ իր հայրը՝ Վահանը, իսկ յաջորդ տարին՝ 1985ին, դժբախտութիւնը կ՛ունենայ կորսնցնելու իր կինը՝ Թագուհին՝ 53 տարեկան հասակին։

1986ին, Կայծակը կը հանդիպի Անահիտ Պատալեանին, եւ յաջորդ իսկ տարին անոնք կը պսակուին՝ նոր կեանք մը սկսելով։ Կայծակը ունէր իր դուստրը՝ Նատիան, եւ մայրը՝ Նոէմին, իսկ Անահիտը՝ իր դուստրը՝ Սիլվին։

Տասնմէկ տարիներ ետք Կայծակ կը կորսնցնէ իր մայրը, որ տարիներով վայելած էր իր հարսի՝ Անահիտի սիրալիր հոգատարութիւնը։

Ան իր ընտանիքին հետ միասին մաս կը կազմէ տեղւոյն ռումանահայ գաղութին եւ գործօն մասնակցութիւն կը բերէ «Րաֆֆի» Ռումանահայ մշակութային հայրենակցական միութեան։ Ան համանուն միութեան ծառայած է իբրեւ նախագահ՝ 1994էն մինչեւ 2001, իսկ իբրեւ վարչութեան անդամ՝ մինչեւ իր մահը։

Կայծակը, իր ընտանիքով, նիւթապէս եւ բարոյապէս միշտ օգնած է «Րաֆֆի» Ռումանահայ մշակութային հայրենակցական միութեան եւ Հայ Դատին, Միացեալ Նահանգներու եւ Սփիւռքի տարածքին։

Կայծակ եւ Անահիտ Օհաննէսեան ամոլը վերջերս նիւթական մեծ օժանդակութիւն կատարեց՝ վերականգնելու համար Ռումանիա գտնուող Հաճկատար հայկական վանքը, որ կառուցուած է 1512ին։

Կայծակ Օհաննէսեան շատ կապուած էր Ռումանիոյ, իր ծննդավայրին. ան յաճախ կ՛այցելէր ու կ՛աշխատէր օգտակար ըլլալ ռումանահայ իր հայրենակիցներուն։

Ռումանահայ «Նոր Կեանք»ին տուած հարցազրոյցի մը ընթացքին, Կայծակ ըսած է. «Ճի՛շդ է, որ մենք այսօր Ամերիկա կ՛ապրինք, բայց մեր հոգին, միտքը միշտ Ռումանիա կ՛ըլլան, քանի որ հո՛ս մեծցած ենք, եւ անշուշտ չենք կրնար մոռնալ մեր ծննդավայրը ու մանաւանդ Հաճկատարը, զոր կ՛այցելենք հոս եղած ժամանակ. մեր միտքը մի՛շտ հոս է։ Այս անգամ ալ, քանի որ ճիշդ Ս. Աստուածածնայ օրը ծնած եմ, փափաքեցայ տարեդարձս Հաճկատար տօնել։ Նախքան հոս գալս, հարցումի միջոցով հոգեւոր առաջնորդէն իմացայ, թէ Հաճկատարի հետ կապուած ինչո՛վ օգտակար կրնամ ըլլալ։ Տեղեկացայ նաեւ, թէ Հաճկատար վանքի գմբէթը աւերուած է, իսկ վանքի շրջափակի աղբիւր-ջրհորը անմխիթար վիճակի մէջ է։ Կինս ըսաւ, թէ ինք աղջկաս՝ Սիլվիին հետ կը փափաքի մասնակցիլ վանքի գմբէթի շինութեան. ես ալ որոշեցի վերանորոգել աղբիւր-ջրհորը, որ գրեթէ փուլ գալու վրայ էր. փափաքեցայ նաեւ այս տարուան մատաղի ամբողջ ծախսը հոգալ։ Այս ուխտով ալ հո՛ս եկայ։ Ցաւօ՛ք, կինս, տկարութեան պատճառով, պզտիկ աղջկաս հետ չկրցաւ գալ. ես եկայ միայն մեծ աղջկաս հետ»։

Ազգային առաջնորդարանին իր ցուցաբերած զօրակցութեան համար, Կայծակ Օհաննէսեան, իր կնոջ՝ Անահիտի հետ, առաջնորդ սրբազան Մուշեղ արք. Մարտիրոսեանի կողմէ պարգեւատրուած է առաջնորդարանի «Ս. Տրդատ եւ Ս. Աշխէն» շքանշանով: Կայծակ, իր նուիրատուութեամբ, հիմը դրած է Սիսի կաթողիկոսութեան դատին ի նպաստ Ազգային առաջնորդարանի հիմնադրամին, ինչպէս նաեւ հովանաւորած է Ազգային առաջնորդարանի շարք մը ծրագիրներ:

 


 

ՀՈԳԵՀԱՆԳԻՍՏ

 

ԿԱՅԾԱԿ ՕՀԱՆՆԷՍԵԱՆ

Հանգուցեալ Կայծակ Օհաննէսեանի մահուան Ա. տարելիցին առիթով, հոգեհանգստեան պաշտօն պիտի կատարուի Կիրակի, Սեպտեմբեր 10, 2017ին, Հոլիվուտի Ս. Կարապետ Մայր եկեղեցւոյ մէջ, 1614 N. Alexandria Ave., յաւարտ Ս. Պատարագի։

Սգակիրներ՝

Այրին՝ Անահիտ (Պաղտատլեան) Օհաննէսեան

Դուստրը՝ Նատիա Օհաննէսեան

Դուստրը՝ Սիլվի եւ Վաչէ Պէպէճեան

Աներորդին՝ Արամ եւ Մարօ Պաղտատլեան

Աներորդին՝ Յովսէփ եւ Հուրի Պաղտատլեան եւ զաւակները

Հօրեղբօր դուստրը՝ Մարի Կլտըրեան եւ զաւակները

Հարազատները՝ Կարպիս եւ Քնարիկ Սայապալեան եւ զաւակները (Ֆրանսա)

Եդուարդ Սայապալեան (Ռումանիա)

Եւ համայն Օհաննէսեան, Պաղտատլեան, Կլտըրեան, Ասլանեան,

Սայապալեան,  Պէպէճեան, Մահսէրէճեան, Տէմիրճեան

ընտանիքները, հարազատներն ու բարեկամները

Հոգեհանգստեան պաշտօնէն ետք հոգեճաշ պիտի մատուցուի Ռումանահայ Միութեան սրահին մէջ, 1711 N. Winona Blvd., Los Angeles, CA 90027։

 


 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top