«Ստեղծարար Հայաստան»ի Եւ Թերի Ճորճի Հաստատած Մրցանքին Աւարտական Հանգրուան Հասնողները Որոշուած Են

0000Finalists CA

 

0000Finalists CA

ԼՈՍ ԱՆՃԵԼԸՍ, ԵՐԵՒԱՆ.- «Ստեղծարար Հայաստան» (Creative Armenia) նախաձեռնութիւնը Սեպտեմբեր 11ին յայտարարեց «Օսքար» մրցանակին տիրացած բեմադրիչ Թերի Ճորճի կողմէ բեմադրիչներու ուղղուած՝ մարդկային իրաւունքներու նիւթով մարտահրաւէրին եզրափակիչ փուլ հասած ֆիլմերը: Յաղթողին պիտի շնորհուի 5000 տոլարի մրցանակ մը:

Եզրափակիչ հանգրուան հասած տասներկու բեմադրիչները կը ներկայացնեն Միացեալ Նահանգները, Գանատան, Սպանիան, Թուրքիան, Հայաստանն ու Արցախը:

Մարդկային իրաւունքներու վերաբերեալ անոնց 60 երկվայրկեաննոց տեսլականները կ՛առերեսուին մեր ժամանակներու ամենակարեւոր հիմնահարցերէն քանի մը հատին հետ՝ սկսելով պատերազմէն, ցեղասպանութենէն, հասնելով մինչեւ երեխաներու իրաւունքներն ու գաղթականներու ճգնաժամը:

«Ստեղծարար մարտահրաւէր 001. Ազդեցութեան արուեստը» («Creative Challenge 001: Art of Impact») անունով մկրտուած մրցանքի աւարտական փուլ հասած են հետեւեալները.

– «Genocide: Eight Stories from Millions» (բեմադրիչ՝ Էդուարդ Յովակիմեան, Հայաստան)

– «Green & Black» (Արամ Շահբազեան, Հայաստան)

– «Home» (Ճուլի Ասրիյեան, Միացեալ Նահանգներ)

– «Human Range» (Գագիկ Ղազարէ, Հայաստան)

– «Human Rights» (Վահէ Տէրտէրեան, Հայաստան)

– «In the Blink of an Eye» (Կիւրուր Պէօզքիւրթ, Թուրքիա)

– «KWE» (Մորնինկսթար Տերոսիէր, Գանատա)

– «Not Carefully Chosen Words» (Գէորգի Ալեքսանեան, Արցախ)

– «Pim Pam Pum» (Ասիէր Ուրպիյէթա եւ Անթոնի տէ Քարլոս, Սպանիա)

– «The Replacement» (Գէորգ Յարութիւնեան, Հայաստան)

– «The Wall» (Արթուր Սարգսեան, Հայաստան)

– «Will Work for Shelter» (Էտուարտօ Կարապալ, Միացեալ Նահանգներ)։

Մասնակիցներուն վերջնական գնահատումը պիտի իրականացուի դատակազմի մը կողմէ, որուն մաս կը կազմեն Թերի Ճորճ, Ատոմ Էկոյեան, Պոնի Ապաունզա, Գարլա Կարապետեան, Ճեսիքա Փիք եւ Փիթըր Պիսանզ:

Մրցանակակիրին անունը պիտի յայտարարուի Կիրակի, Սեպտեմբեր 17ին, Լոս Անճելըսի մէջ, Մարդկային իրաւանց դէտ (Human Rights Watch) կազմակերպութեան մասնակցութեամբ կայանալիք ձեռնարկի մը ընթացքին։

Յիշեցնենք, որ «Ստեղծարար Հայաստան» նախաձեռնութիւնը ծնունդ առած է «Խոստումը» ֆիլմին, «Կիւլպէնկեան» հիմնարկութեան եւ անանուն բարերարի մը եւ անոր աջակիցներու ցանցին շնորհիւ, նպատակ ունենալով զարկ տալ արուեստի զանազան միջոցներով մարդկային իրաւանց հարցերը լուսարձակի տակ առնելու ջանքերուն՝ արտացոլելով հայ համայնքին աճող հետաքրքրութիւնը մարդկային իրաւանց եւ արուեստ-ժամանցի մարզերուն նկատմամբ:

«Ստեղծարար Հայաստան»ը ոչ-հասութաբեր կազմակերպութիւն մըն է, որ հիմնուած է Լոս Անճելըսի եւ Երեւանի մէջ: Անոր համացանցային հարթակը պիտի հանդիսանայ իր ծրագիրներու հանգոյցը՝ ի մի բերելով ստեղծագործական մարտահրաւէրներ, կրթանպաստներ, տեսանիւթերու արտադրութիւններ եւ թուային պարբերաթերթ:

Յաւելեալ տեղեկութիւններու համար, այցելել www.creativearmenia.org կայքը։

«Creative Challenge 001: Art of Impact» խորագիրով ստեղծագործական մրցոյթին կրնային մասնակցիլ աշխարհի բոլոր ծագերէն բեմադրիչներ՝ առաւելագոյնը 60 երկվայրկեան տեւողութեամբ տեսանիւթի մը ընդմէջէն ներկայացնելով մարդկային իրաւունքներու առնչուող նիւթ մը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top