Թուրքիա-Գերմանիա Դիւանագիտական Ճակատումի Նորագոյն Հանգրուանը

ՊՈԼԻՍ, «Մարմարա».- Թուրքիա-Գերմանիա դիւանագիտական պատերազմը կը շարունակուի առանց մեղմացումի։ Անոր նորագոյն հանգրուանը սկսաւ Թուրքիոյ արտաքին գործոց նախարարութեան կողմէ հրապարակուած յայտարարութեամբ մը, որուն մէջ Անգարա կ՛ազդարարէ Գերմանիա մեկնիլ փափաքող կամ հոն ապրող թուրքերը։ Յայտարարութեան մէջ կը նշուի, որ Գերմանիոյ քաղաքական առաջնորդներու նախընտրական քարոզչութիւնը հիմնուած է հակաթուրք սկզբունքներու վրայ, եւ որ Թուրքիոյ հայրենակիցները գէշ վերաբերումի կ՛արժանանան օդակայաններու մէջ։ Իշխանութիւնները նաեւ դիտել կու տան, որ Գերմանիա ահաբեկիչներուն ապաստան կու տայ ու կ՛արտօնէ, որ ահաբեկիչները ազատօրէն շրջին իր երկրին մէջ։

Փոխադարձելով այս յայտարարութեան՝ Գերմանիոյ վարչապետ Անկելա Մերքել ըսաւ, որ Թուրքիոյ ոեւէ քաղաքացի կրնայ այցելել Գերմանիա։ «Մեր երկրին մէջ լրագրողներ չեն ձերբակալուիր, հսկողութեան տակ չեն առնուիր, մեր երկրին մէջ կը գործեն խօսքի ազատութիւնն ու օրինական պետութեան սկզբունքները, եւ մենք հպա՛րտ ենք անով», յայտարարեց Մերքել։

Միւս կողմէ, գերմանացի փորձագէտ Պերնտ Լիտքեն պնդեց, թէ Թուրքիա այլեւս ռազմավարական վստահելի գործընկեր չի նկատուիր ՆԱԹՕի կողմէ, իսկ Թուրքիոյ զինեալ ուժերու համակարգէն ներս պատահած դէպքերը խոր մտահոգութիւն ստեղծած են ՆԱԹՕի անդամ երկիրներուն մօտ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top